Stadtwarken Buxthu

Vun Wikipedia
Zur Navigation springen Zur Suche springen

De Stadtwarken Buxthu (SWB) sünd en Versorgungsünnernehmen in Buxthu in Neddersassen. Dat Ünnernehmen hett üm un bi 120 Mitarbeiders un höört to 100 % de Stadt Buxthu to.

De Stadtwarken bedrievt ok de Swemmbäder in Buxthu, ünner annern dat Aquarella.

2013 harrn de Stadtwarken en Ümsatz von 52,22 Millionen Euro.[1] In’t Johr 2000 harr dat Ünnernehmen en Ümsatz von 161 Millionen Mark un 3,9 Millionen Mark Gewinn.[2]

Historie[ännern | Bornkood ännern]

De Vörlöper von de Stadtwarken keem 1864 na Buxthu. An’n 11. Mai 1864 hett de Stadt Buxthu mit de Firma Noblée ut Horborg en Verdrag ünnerschreven, dat Noblée för 25 Johr Gas an de Stadt levern un 55 Gaslanternen bedrieven schall. An’n 1. Oktober 1864 sünd de Lanternen in Bedriev gahn. To Anfang sünd 10.000 Kubikmeter Öölgas in’t Johr verbruukt worrn. Dat Gaswark is op dat hüdige Gelänn von de Stadtwarken an’n Tegelkamp boot worrn. Nadem de 25 Johr Pachttied vörbi weren, hett de Stadt Buxthu dat Gaswark övernahmen un sülvs wiederbedreven. Dat hüdige Ünnernehmen is also 1889 grünnt worrn.

Toeerst is för dat Gas Teer destilleert worrn, von 1900 af an is dat ut engelsche Fettköhlen herstellt worrn.

1914 hett dat Ünnernehmen en Waterwark boot. 1919 hett Buxthu en Hoogspanunngsleitung kregen, de de Stadt mit dat Nett von dat Överlandwark Noord-Hannover verbunnen hett. 1931 sünd Ooldklooster un Neeland Deel von de Stadt Buxthu worrn un dat Ünnernehmen weer denn ok dor as Versorger mit tostännig. 1937 hett dat Ünnernehmen denn den Naam Stadtwarken kregen.

An’n 8. April 1943 hebbt se in Buxthu ophöört, sülvs Gas hertostellen. Dat Gas keem denn ut de Gaswarken in Hamborg. De Gasometer is 1961 afreten worrn. 1971 warrt von Kokereegas op Eerdgas ümstellt.

De Swemmbäder in Buxthu hebbt de Stadtwarken 1994 övernahmen un 1998 sünd se ok för dat Afwater tostännig worrn. Bet 2001 weren de Stadtwarken en Egenbedriev, denn is dor en GmbH von worrn. Dat Afwater is dorbi aver en Egenbedriev von de Stadt bleven un nich mit in de GmbH flaten. 2005 hebbt de Stadtwarken de P+R-Anlagen in Buxthu övernahmen.

An’n 1. Januar 2013 hebbt de Stadtwarken ok dat Stroomnett in de Öörd Eindörp, Imbeek, Öbergünn, Ketzendörp, Doans, Pippens un Arsdörp övernahmen.

Rebeed[ännern | Bornkood ännern]

As Stroomversorger sünd de Stadtwarken vondaag för dat Rebeed von de Stadt Buxthu un för de Gemeen Obbens (ahn Grundolendörp) tostännig. 2012 hebbt se 125 GWh Energie afgeven.[3]

As Gasversorger sünd de Stadtwarken in de Stadt Buxthu un de Gemenen Beekdörp, Bliersdörp, Nottensdörp, Hornborg, Greundiek, Gauderhandviddel, Mittelskark, Neekark, Steenkark un Jörk aktiv. 2012 hebbt se 553 GWh Energie in Form von Gas afgeven.[3]

As Waterversorger versorgt de Stadtwarken de Keernstadt Buxthu un de Öörd Ooldklooster, Neeklooster, Ottens, Dammhusen, Heitmannshusen un Neeland. Stand 31. Dezember 2013 weren 8767 Huushollen an dat Waternett anslaten.[4] De Stadtwarken bedrievt 13 Sööd, ut de se 3.150.000 Kubikmeter Water rophalen dröfft. Stand 2013 hebbt se 2.131.604 Kubikmeter rophaalt.[4]

P+R-Anlagen bedrifft dat Ünnernehmen an de Bahnhööv Neeklooster un Buxthu.

Footnoten[ännern | Bornkood ännern]

  1. http://de.statista.com/unternehmen/269705/stadtwerke-buxtehude-gmbh
  2. http://www.abendblatt.de/archiv/pdf.php?url=ha%2F2001%2Fpdf%2F20010726.pdf%2FHAHR20010726lf000011.pdf
  3. a b http://www.leuphana.de/fileadmin/user_upload/portale/inkubator/images/personen/3_energieforum-sw_buxtehude_mueller-wegert_130905.pdf
  4. a b http://www.stadtwerke-buxtehude.de/buxtehuder-trinkwasser.htm

Weblenken[ännern | Bornkood ännern]


Koordinaten:53° 28′ N, 9° 41′ O