Río de La Pasión
| Río de La Pasión | |
|---|---|
| Laag | Departamento Petén, Guatemala |
| Stroomsystem | Río Usumacinta |
| Läng | 345 km |
| Afströömrebeed | 12.156 km² |
| Born | Río Raxruhá/Río Cancuén |
| Münn | in’n Río Usumacinta (op 200 m över de See) |
| Water je Sekunn | 322 m³/s |
| linke Blangenströöm | Río Petexbatún |
| rechte Blangenströöm | Riachuelo Machaquilá, Río Machaquilá, Río San Juan, Río El Subín |
 | |
De Río de La Pasión is en üm un bi 345 Kilometer langen Stroom in dat Departamento Petén, Guatemala, de in’n Río Usumacinta münnt.
De Stroom billt sik an de Steed, an de Río Raxruhá un Río Cancuén tohoopfleten doot. Dat is gliektiedig de Grenz twüschen de Departamentos Petén un Alta Verapaz. För üm un bi 20 Kilometer billt de Stroom denn de Grenz twüschen de beiden Departamentos un triddt denn op dat Rebeed von Petén. He flütt na Noorden un vörbi an El Zapote, El Pato, Champerico un Bolivia El Colorado un nimmt dorbi von rechts de Strööm Riachuelo Machaquilá, Río Machaquilá un Río San Juan op. Düsse rechten Blangenströöm kaamt all von de Westhäng von de Maya-Bargen. Bi de Maya-Ruinen von Seibal dreiht de Stroom na Westen. Bi’n Oort Sayaxché löppt denn de Straat PET-11 mit en Fähr över’n Río de La Pasión. Hier münnt von links de Río Petexbatún. Kort achter Sayaxché münnt von rechts de Río El Subín. Toletzt löppt de Stroom an’n Oort Cooperativa Mario Méndez vörbi un kummt denn an de Staatsgrenz to Mexiko. Hier flütt de Río de La Pasión bi dat lüttje Dörp Nueva Esperanza mit’n Río Salinas tohoop un billt den Río Usumacinta, de later in’n Golf von Mexiko münnt.
De Fähr in Sayaxché an de PET-11 is de eenzige Steed, an de en gröttere Straat över’n Stroom föhrt. Anners gifft dat noch en poor lüttjere Fähren, de aver vör allen för’n Verkehr von Dörp to Dörp dor sünd un nich för Dörgangsverkehr:
- in de Neegd von de Münn von’n Río San Juan twüschen de beiden Öörd Santo Tomás un La Reinita,
- in Bolivia El Colorado,
- an de Münn von’n Río Machaquilá,
- bi El Pato,
- un dicht bi de Steed, an de Río Raxruhá un Río Cancuén tohoopfleten doot.
De Stroom flütt dör en Rebeed, dat fröher maal Oorwoold weer, vondaag aver meist to en groten Deel in Weiden för dat Veh ümwannelt worrn is. In en Afsnidd langs den Stroom warrt ok von dat Ünnernehmen Reforestadora de Palmas de Petén, S.A. Palmööl-Plantaaschen bedreven.
Weblenken[ännern | Bornkood ännern]
Koordinaten:16° 29′ N, 90° 33′ W