Parthenopeesche Republiek
De Parthenopeesche Republiek is en Staat ween, de an'n 23. Januar 1799 in dat Königriek Neapel utropen wurrn is, nadem de König Ferdinand IV. vun Republikaners, de dat mit de Franzosen holen döen, verdreven wurrn weer. De Naam wiest up Parthenope, en ole greeksche Kolonie in de Gegend vun dat hüdige Neapel.
Ferdinand, en Despoten, de sik toeerst de Upklärung towennt harr, stell sik mit all Kraft gegen de Ideale vun de Franzöösche Revolutschoon. He hett 1793 bi de 1. Koalitschoon gegen Frankriek mitmaakt un weer achter all Anhängers vun de Franzosen in sien Königriek achterher. 1799 sund avers Truppen vun de franzööschen Revolutschonäre in Neapel inmarscheert un he is slank utbüxt na Sizilien.
En poor Dage later hett de franzöösche General Jean-Étienne Championnet de Republiek utropen un hett eerst Mol en Regeerung mit 21 Liddmaten instellt. De scholl dat Land demokraatsch regeern. Man nu weern de Fiende ok nich fuul un Truppen vun de Gegenrevolutschoon, dat weer en Armee vun den Paavst unner Kardinal Fabrizio Ruffo di Calabria, en engelsche Flott unner Horatio Nelson, dorto noch Truppen ut Sardinien un Grootbritannien, sund fix inmarscheert in de Republiek. Dor sund bannig veel Republikaners bi afslacht' wurrn. Al an'n 20. Juni 1799 is Neapel wedder innahmen wurrn un mit de Parthenopeesche Repuliek is dat al wedder ut. Ferdinand konn wedder up sien Throon sitten gahn. He kehr na den Verdrag vun Amiens in dat Johr 1802 endgüllig torüch.