Namaka (Maand)

Vun Wikipedia
Wesseln na: Navigatschoon, Söök

Namaka is de binnere un lüttere vun de beiden Maanden vun den Dwargplanet (136108) Haumea.

Namaka is an’n 30. Juni 2005 vun Michael E. Brown, M. A. van Dam, A. H. Bouchez, D. Le Mignant, R. D. Campbell, J. C. Y. Chin, A. Conrad, S. K. Hartman, E. M. Johansson, R. E. Lafon, David Lincoln Rabinowitz, P. J. Stomski, Jr., D. M. Summers, Chadwick A. Trujillo, and P. L. Wizinowich bi Beobachten an de Keck-Steernwacht op’n Mauna Kea op Hawaii opdeckt worrn. De lütte Maand hett en middleren Dörmeter vun ruchweg 170 km, wat ungefähr en Teihntel is vun’n middleren Dörmeter vun Haumea sülvst.

As vörlöpigen Naam harr de Grupp vun Forschers Blitzer vörslahn. Dat is de Naam vun en Rendeer vun’n Wiehnachtsmann. De offizielle vörlöpige Beteken weer S/2005 (2003 EL61) 2. Bekannt geven worrn is de Opdecken an’n 29. November.

De Maand löpt op en meist kreisrunne Bahn in’n Afstand vun ruchweg 39.300 km üm (136108) Haumea. Dorto bruukt he üm un bi 39 Daag un 17 Stünnen. Gegenöver den annern Maand Hi’iaka is de Ümloopbahn üm ruchweg 40 ° verkippt, wat in dat Sünnsystem teemlich ungewöhnlich is. De Masse vun den Maand is nich bekannt, blots de vun dat hele System. Wenn een aver för de Dicht un de Albedo den glieken Weert annimmt, as bi Haumea, denn kummt bi de Reken üm un bi 0,2 % vun den Weert rut as bi’n Mudderkörper. Starke Absorpschonen bi Bülgenlängen vun 1,2 un 2 μm in’t infrarode Spektrum wiest dorop hen, dat de Böverflach to’n gröttstehn Deel ut Wateries besteiht.

Dat mag goot angahn, dat Namaka ut dat Material entstahn is, dat bi’n Inslag vun en annern Körper op Haumea entstahn is.

Weblenken[ännern | Bornkood ännern]