Margaret Rhea Seddon

Rhea Seddon 2004

Margaret Rhea Seddon (* 8. November 1947 in Murfreesboro, Tennessee) is en ehmalge US-amerikaansch Astronautin.

Seddon kreeg 1970 en Bachelor in Physiologie vun de University of California, Berkeley un 1973 en Doktertitel in Medizin vun de University of Tennessee. Se hett in de allgemeen Chirurgie in Memphis praktizeert.

Astronautentätigkeit

Rhea Seddon is in' Januar 1978 vun de NASA as Astronaut utsöcht wurrn. In' September 1996 hett se an de Vanderbilt University Medical School medizinisch Experimente vörbereit, de mit de Columbia-Neurolab-Mission im April 1998 in den Weltruum brocht wurrn.

STS-41-F

|STS-41-F weer för August 1984 mit de Ruumfähre Discovery plaant.Dat weer de eerste Floog vun de Discovery ween, wenn se nich wegen Verspätungen vun de bruuklast afseggt wurrn weer. As Besatten weern Karol Bobko, Donald Williams, Rhea Seddon, David Griggs un Jeff Hoffman vörsehn.

De Floog wurr denn de Mission STS-51-E.

STS-51-E

Disse Floog vun dat Space Shuttle Challenger wurr wegen Problemen vun de IUS-Böverstuuf afseggt. Bi disse Mission harr en TDRS-Satellit utsett wurrn sullt. As Besatten weern Karol Bobko, Donald Williams, Rhea Seddon, David Griggs, Jeffrey Hoffman, de franzöösch Bruuklastspezialist Patrick Baudry un de Politiker Jake Garn vörsehn.

STS-51-D

An’ 12. April 1985 is Rhea Seddon mit de Ruumfähre Discovery as Missionsspezialistin eerstmals in’t All flaagen. Bruuklast weern de beid Satelliten TELESAT-9 un LEASAT-3. Bi de letztere funktioneer aber de automatische Inbedrievnahm vun de Antenn un vun dat Drievwark nich. Trotz en Weltruumutstieg dör de Astronauten Jeffrey Hoffman un David Griggs kunn disse Defekt nich repareert wurrn. Vun de Besatten her weer dat meest so as bi den afseggten Floog STS-51E, blots dat de Bruuklastspezialist nich mehr Patrick Baudry weer, sonnern Charles David Walker.

STS-71-E

De Start vun de Atlantis-Mission STS-71-E/Spacelab SLS-2 weer för April 1987 plaant ween, wurr aber wegen de Challenger-Katastrophe afseggt. Neben Seddon weern as Besattensliddmaaten vun disse SLS-1-Mission Vance Brand, David Griggs, John Fabian, James Bagian, Francis Gaffney und Robert Phillips plaant.

STS-40

Hör tweet Ruumfloog fung an’ 5. Juni 1991 an. Seddon is an dissen Dag as Missionsspezialistin mit dat Space Shuttle Columbia to de Mission STS-40 ünner dat Kommando vun Bryan O'Connor start. Pilot weer Sidney Gutierrez. Dorto keemen de beid Missionsspezialisten James Bagian un Tamara Jernigan as ok de beid Bruuklastspzialisten Drew Gaffney un Millie Hughes-Fulford.

Dat weer de fievte Spacelab-Mission, de eerste, de sück ahn Utnahm mit Biowetenschapen befaaten dee. Dat wichtigst Experiment weer Spacelab Life Sciences-1. Dorbi wurrn physiologisch Ünnersöken an Minschen, 30 Gnaagdeerten un dusenden winzig Quallen dörführt. Vun de 18 Eenzelexperimenten hemm sück teihn mit de Minschen, söben mit de Gnaagdeerten un een mit de Quallen befaat.

STS-58

An’ 18. Oktober 1993 is Seddon as Missionsspezialistin mit de Columbia to’n letzten Mal in’t All flaagen. Kommandant vun disse Mission weer John Blaha un sien Pilot Rick Searfoss. Dorto keemen de Missionsspezialisten William Surles McArthur, David Wolf un Shannon Lucid as ok de Bruuklastspezialist Martin Fettman vun de Colorado State University.

Dat weer de Spacelab-Mission SLS-2 un deen to dat Utforschen vun de Utwirkungen vun de Swoorlosigkeit up den minschlichen Körper. Aber ok Forschungen an Rötten sünd vörnommen wurrn. Dat weer de bit dorhen längste Shuttlefloog överhoopt mit 14 Daag und 12 Minüüt. De Lannen funn up de Edwards Air Force Base statt.

Nah de NASA

In’ November 1997 is Seddon ut de NASA utscheeden un wurr Assistant Chief Medical Officer vun de Vanderbilt Medical Group in Nashville, Tennessee.

Privates

Se is in tweete Ehe mit den ehmalgen Astronaut Robert Lee Gibson verheiraadt. Tosommen hemm se 3 Kinner.

Ehrungen

• 2015: Astronaut Hall of Fame

Weblenken

Margaret Rhea Seddon. Mehr Biller, Videos oder Audiodateien to’t Thema gifft dat bi Wikimedia Commons.

• NASA: Biografie (engelsch)
• spacefacts.de: Körtbiografie