Mairie Veern
De Mairie Veern weer in de Franzosentied (1810 bet 1813) een von de dree Mairien, in de de Kanton Veern indeelt weer. De Seet weer in Veern. Se harr 4464 Inwahners.[1]
Historie
[ännern | Bornkood ännern]De Ümgegend von Veern hett vör de Franzosentied to de Stadt Veern un dat Amt Wessen in dat Hartogdom Veern höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Veern een von de ölven Mairien in’n Kanton Veern von’n Distrikt Veern, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Veern weer nu een von de dree Mairien in’n Kanton Veern, Distrikt Bremen, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de dree Mairien Veern, Groot Huttbargen un Stäbargen ut’n Kanton Veern höört harrn. Blots de Oort Ahnbargen ut de Mairie Stäbargen is an de Mairie Wessen in’n Kanton Rethen wesselt.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
[ännern | Bornkood ännern]Dor hebbt düsse Öörd tohöört:
- Kaiserriek Frankriek:[1]
- Veern (3523 Inwahners), Hänsch (142), Groot Huttbargen (168), Lüttjen Huttbargen (63), Stäbargen (165), Wahnbargen (172), Döölbargen (125), Rie’e (106)
Vondaag sünd düsse Öörd all Deel von de Gemeen Veern.
Footnoten
[ännern | Bornkood ännern]- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 100
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 22