Mairie Rethen
De Mairie Rethen weer in de Franzosentied (1810 bet 1813) een von de dree Mairien, in de de Kanton Rethen indeelt weer. De Seet weer in Rethen. Se harr 2644 Inwahners.[1]
Historie[ännern | Bornkood ännern]
De Ümgegend von Rethen hett vör de Franzosentied to de Ämter Rethen un Aalen in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Rethen een von de acht Mairien in’n Kanton Rethen von’n Distrikt Veern, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Rethen weer nu een von de dree Mairien in’n Kanton Rethen, Distrikt Neenborg, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to fiev Mairien höört harrn: de Mairien Rethen, Hülsen un Heern ut’n Kanton Rethen un de Mairien Groten Hüßel un Olenwahlje ut’n Kanton Hudemöhlen. Von de Mairie Olenwahlje is de gröttere Deel an de Mairie Rethen fullen. Blots de Oort Böhm is an de Mairie Kerkboitzen kamen. Von de Mairie Hülsen is allens utbenahmen den Oort Hülsen an de Mairie Rethen gahn un Hülsen sülvs an de Mairie Wessen.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd[ännern | Bornkood ännern]
Dor hebbt düsse Öörd tohöört:
- Kaiserriek Frankriek:[1]
- Rethen (1102 Inwahners), Karkwahlje (122), Olenwahlje (211), Groten Hüßel (272), Stöcken (188), Landwehr (16), Kreyershorst (14), Donnerhorst (34), Horst (25), Wohlendörp (151), Olendiek (21), Klotzeborg (8), de grote Stapel (5), Olenborg (8), Lütjen Hüßel (46), Heern (110), Frankenfeld (137), Bosse (174)
Vondaag sünd düsse Öörd Deel von de Gemeen Dörbern un de Samtgemenen Reten un Heemsen.
Footnoten[ännern | Bornkood ännern]
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 112
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 23