Carretera Federal 307

Vun Wikipedia
(wiederwiest vun MEX 307)
Symbol von de Straat

Karte

MEX 307 bi Bacalar

De Carretera Federal 307 (kort MEX 307) is en Bundsstraat in’n Mexiko. Düsse Överlandstraat hett twee Afsneed, de nich tohoophangt: De een liggt in’n Bundsstaat Quintana Roo, is 366 Kilometer lang un löppt von Cancún över Playa del Carmen, Tulum, Felipe Carrillo Puerto un Bacalar na Chetumal; de annere liggt in’n Bundsstaat Chiapas, is 458 Kilometer lang un löppt von Palenque langs de Grenz na Guatemala över Benemérito de las Américas na La Trinitaria.

Verloop[ännern | Bornkood ännern]

De beiden Afsneed sünd Luftlien meist 400 Kilometer uteneen.

Afsnidd in Quintana Roo[ännern | Bornkood ännern]

De Straat fangt in Cancún an de Carretera Federal 180 an un löppt von dor na Süüdwesten an de Küst von de Karibische See langs. En Stück in’n Süden von Cancún löppt se an’n Aeropuerto Internacional de Cancún vörbi un föhrt denn över Villa Morelos na Playa del Carmen. Dor münnt de Carretera Federal 305D in de 307.

De Straat geiht wieder langs de Riviera Maya över Puerto Aventuras un Akumal na Tulum. Dor föhrt de Straat von de Küst weg en beten wieder in dat Binnenland un üm dat Schuulrebeed von Sian Ka'an rüm. Över Pino Suárez un Tres Reyes löppt de Mex 307 mit en Ümtostraat üm Felipe Carrillo Puerto rüm un drippt dor op de MEX 295 un MEX 184. De Straat löppt von dor na Süden dör Uh May, Andrés Quintana Roo un Limones un knickt kort vör de Bacalar-Laguun wedder na Süüdwesten af. Kort vörher geiht na Süüdoosten de Straat na Mahahual un Xcalak af. Bi dat Dörp Pedro Antonio Santos münnt de Carretera Federal 293 in de MEX 307. De Straat löppt över Buenavista un Bacalar na Xul-Ha un münnt dor in de Carretera Federal 186. De 186 föhrt in’n Oosten na Chetumal un över en Siedenstraat na Belize un in’n Westen na de Bundsstaten Campeche, Chiapas un Tabasco.

Afsnidd in Chiapas[ännern | Bornkood ännern]

De Straat fangt an en Steed en Stück in’n Süden von Palenque an de Carretera Federal 199 an un löppt von dor na Süüdoosten. Se geiht över José Castillo Tielemans un drippt bi Río Chancalá op de Carretera Federal 353. Denn löppt de Straat över San Martín Chamizal, Busiljá, Nuevo Francisco León na Benemérito de las Américas un denn wieder över Roberto Barrios un Nuevo Chihuahua. Düsse ganze Afsnidd löppt an de Grenz na Guatemala langs un verlöppt groff parallel to Río Chancalá, Río Usumacinta un Río Salinas. En lütt Stück in’n Süden von dat Dörp Flor de Cacao knickt Staatsgrenz un Straat all beid na Westen af un loopt nu stracks liekut. De Straat geiht dör Nuevo Orizaba, Nuevo Veracruz un La Nueva Unión.

Hier löppt de Straat in dat Daal von’n Río Lacantún hoog in de Montañas del Oriente. Öörd an de Straat sünd hier in de Bargen El Ixcán, Flor de Café, Maravilla Tenejapa, Santo Domingo Las Palmas, Nuevo Huixtán, Nuevo San Juan Chamula un Tziscao. Achter Tziscao kummt de Straat wedder in sieder Land un föhrt över de Öörd Miguel Hidalgo, Lázaro Cárdenas un Juncaná na La Trinitaria an de Carretera Federal 190 un is dor toenn.