Riviera Maya
De Riviera Maya (Utspraak op spaansch: [ri'βjeɾa 'maʝa]) is en Küstenafsnidd an de Oostküst von de mexikaansche Halvinsel Yucatán an de Karibische See. Dat Rebeed is vör allen as Tourismusregion bekannt.
De gröttsten Städer in dat Rebeed sünd Cancún un Playa del Carmen.
Geografie[ännern | Bornkood ännern]
De Riviera Maya liggt in’n Bundsstaat Quintana Roo von Mexiko. Dat reckt över de Municipios Isla Mujeres, Benito Juárez, Puerto Morelos, Solidaridad, Tulum un Cozumel.
Vör de Küst liggt dat Great Maya Reef. In dat Binnenland wasst sieden Tropendschungel. De Ünnergrund is Kalksteen, de von’n Nedderslag to Karstformen so as Cenotes utwuschen warrt. Strööm gifft dat dorüm meist gorkeen. Dat Water flütt ünnereerdsch af. Deelwies hett dat Water dorbi grote Höhlen utspöölt, ünner annern de Höhlen von Sac Actun un Ox Bel Ha.
Na Süden slütt sik an de Riviera Maya de Costa Maya an.
Klima[ännern | Bornkood ännern]
De Dörsniddstemperatur över dat Johr liggt bi 24–25 °C. De Regentied is von Mai bet November. Regen gifft dat över dat Johr üm un bi 1500 mm.
Dat Grundwater hett dat ganze Johr en Temperatur von 25 °C, de See von 26 °C in’n Januar bet 29 °C in’n August.
De Region warrt jümmer wedder von swore Hurrikans drapen.
Historie[ännern | Bornkood ännern]
De Naam lehnt sik an de bekannte Tourismusregion von de Riviera an de Küst von de Middellandsche See un an de Mayas an. Ähnlich warrt de Touristenöörd an’n de mexikaansche Pazifikküst Mexikaansche Riviera nöömt.
De Tourismus in de Region hett in de Johren 1970 in Cancún anfungen un in de Johren 1990 sünd denn ok de Öörd Playa del Carmen un Tulum bilütten to wichtige Touristenöörd worrn.
Weertschop un Infrastruktur[ännern | Bornkood ännern]
För Touristen intressant sünd de Natur an de Riviera Maya, to’n Swemmen, Duken, Snorkeln un Angeln. An de Küst un in dat Binnenland sünd verscheden Maya-Ruinen to finnen (ünner annern in Tulum un Cobá).
De Touristen in dat Rebeed kaamt to en groten Deel ut de USA un Kanada, aver ok ut Europa.
Verkehr[ännern | Bornkood ännern]
De Öörd an de Küst sünd över de Carretera Federal 307 mitenanner verbunnen.
De wichtigste Flegerplatz is de Aeropuerto Internacional de Cancún. Tosätzlich gifft dat den Aeropuerto de Playa del Carmen un den Aeropuerto Internacional de Cozumel. Twüschen dat Eiland Cozumel un den fasten Wall gifft dat ok en Fähr.
Ok vele Krüüzfohrtscheep doot an verscheden Steden an de Riviera Maya anleggen.
