Lucien Petit-Breton

Vun Wikipedia
Zur Navigation springen Zur Suche springen
Lucien Petit-Breton

Lucien Mazan (* 18. Oktober 1882 in Plessé; † 20. Dezember 1917 in Troyes) weer en franzöösch Radrennfohrer. Bekannt wurr he ünner de Naam Petit-Breton (lütt Bretone). Daröver herut hett man hüm ok „de elegant Argentinier“ nömmt.

Leven[ännern | Bornkood ännern]

De Familie vun Lucien Mazan is nah Argentinien utwannert, as he twee Johr old weer. Bi en Lotterie hett he sien eerst Rennrad wunnen. Sien Vader weer aber tegen en Sportlerkarriere vun sien, wiel he de Ansicht weer, dat Radrennfohrer Zirkusclowns glieken deen. Ut dissen Grund hett sück Mazan de Naam „Breton“ nah sien Heimat, de Bretagne, toleggt. Sien eerst Erfolge fier he up de Bahn. So wurr he in dat Öller vun 17 Jahren argentiensch Bahnradmeester. 1905 − sien Vader weer nu nich mehr gegen den Sport – stell he in Paris mit 41,110 Kilometern en neen Stünnenweltrekord up un wurr dormit eerstmals internatschonal bekannt.

Mazan truck mit sien Öllern torüch nah Frankriek in de Bretagne un leev dor in Poudrantais; in Vallet hett he heiraadt. He wurr Profi-Radrennfohrer. Dat erforder allerdings en Naamsännern, wiel dat in Frankriek all en Radrennfohrer mit de Naam Breton geev: he kreeg den Tosatz „Petit“.

De „lütt Bretone“, de as eerst Tietfohrspezialist gellt, hörr in de heroischen Epoche vun den Radsport to de best Fohrers överhoopt. Up de negente Deelstreck vun de Tour de France 1907 hett he sück dör en 250 Kilometer lang Alleenfohrt tüschen Bayonne un Bordeaux an de Tipp vun de Gesamtwertung sett. He hett dorbi de Führung vun Émile Georget, sien Kameraden ut dat Peugeot-Team övernommen, un geev de de bit to dat Enn‘ vun de Tour in Paris nich mehr af. 1908 geev dat för hüm so good as kien Konkurrenz. He is weer för de Peugeot-Mannschap, antreeden, övernehm up de tweet Deelstreck de Führung un kunn de bitt o dat Enn‘ hollen. Dat Peugeot-Team wunn bi disse Tour sämtliche Deelstrecken. Dör dissen Sieg weer Mazan de eerste Düppelsieger vun de noch jung Tour de France.

In de Johren 1906 bit 1908, up den Hööchtpunkt vun sien Loopbahn, wunn he ok noch anner groot Radrennen as bispeelswies de Klassiker Paris–Tours un Mailand–Sanremo. Nahdem he bi de Tour de France 1909 nich antreeden, kunn he in de Folgejohren nich mehr an sien vörherigen Erfolge anknütten.

In‘ Eersten Weltkrieg wurr Petit-Breton an de Ardennenfront vun en Lastwagen anfohren. He is an de Besehren in dat Öller vun 35 Johr storven un wurr in Pénestin besett.

Ehrungen[ännern | Bornkood ännern]

In de Bretagne find man noch hüüd tallriek Sporen, de up Mazan henwiesen. So wurr an sien Gebortshuus in Plessé en Tafel mit de Inschrift „Maison natale de Lucien Mazan – Vainqueur de Tour de France 1907 et 1908“ anbrocht un in den Oort en Straat up de Naam „Rue Petit Breton“ döfft.

In St. Herblain (nich to verwesseln mit Saint-Herblain), en westlich Stadtdeel vun Nantes, befind sück dat „Stade Vélodrome Petit-Breton“. In dit ehmalge Radstadion wurrd hüüd Rugby speelt. In dat Oval vun de Sportstäe steiht en vun den argentiensch Radsportverband stift Gedenksteen to Ehren vun Mazan.

In Pénestin is hüüd de Vereen „Les amis de Petit-Breton“ ansässig, de sück um sien Andenken bemöht, un in de Oortschap Vallet wurr en Wiensoort nah hüm nömmt.

Platzeeren bi de Tour de France[ännern | Bornkood ännern]

  • 1905: 5. Platz
  • 1906: 4. Platz
  • 1907: Sieger un twee Deelstreckensiege
  • 1908: Sieger un fiev Deelstreckensiege
  • 1909: nich deelnommen
  • 1910: utscheeden
  • 1911: utscheeden
  • 1912: utscheeden
  • 1913: utscheeden
  • 1914: utscheeden

Palmarès[ännern | Bornkood ännern]

Weblenken[ännern | Bornkood ännern]

Commons-logo.svg Lucien Petit-Breton. Mehr Biller, Videos oder Audiodateien to’t Thema gifft dat bi Wikimedia Commons.