Logan’s Run

Vun Wikipedia
Filmdaten
Plattdüütsch Titel:
Originaltitel: Logan’s Run
Düütsch Titel: Flucht ins 23. Jahrhundert
Produkschoonsland: USA
Johr vun’t Rutkamen: 1976
Läng: 120 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Michael Anderson
Dreihbook: David Zelag Goodman,
William F. Nolan,
George Clayton Johnson
Produkschoon: Saul David
Musik: Jerry Goldsmith
Kamera: Ernest Laszlo
Snitt: Bob Wyman
Szenenbild: Dale Hennesy
Kledaasch: Bill Thomas
Dorstellers

Logan’s Run (o Platt so veel as „Logan sien Weglopen“; dt. Titel: Flucht ins 23. Jahrhundert) is de Titel vun en US-amerikaanschen Science-Fiction-Film ut dat Johr 1976. De Film baseert op de Romanvörlaag vun William F. Nolan un George Clayton Johnson.

Inholt[ännern | Bornkood ännern]

De Film speelt in’n Noordoosten vun de USA in en Stadt in de Tokamen Tiet. De Minschen leevt in en vun de Butenwelt afsneden un vun en gewaltig Kuppel afslatene Stadt. ’N Weg na buten gifft dat nich, un nümms weet, woans dat buten de Kuppel utsütt. Wenn een nich witer doröver nadenkt, föhrt de Minschen en fein Leven: Dat gifft Freetietparks un Wunnerwarken vun de Architektur. Drogen maakt dat Leven schön, kosmetische Operatschonen warrt gau un ahn Wehdaag dörföhrt, sexuell kann een to jede Tiet Spaaß heben un Monogamie warrt nich hooch acht. Dat schient, as weer disse Welt en recht Paradies, man een Haken hett de Saak: Dat de Tall vun de Inwahners nich to groot warrt, dröff nümms öller as dörtig Johr warrn. An’n 30. Geboortsdag mutt jedeen in dat so nöömte Karussell, wat een Oort religiös Zentrum dorstellt. Dor warrt en Ritual dörföhrt, dat as „Neemaken“ betekent warrt – de Lüüd glöövt, dat de Minschen „wedderboren“ warrt un dorbi op en högere Even vun’t Denken kamt. Man in Wohrheit warrt se eenfach blots dood maakt.

De Minschen drägt all en Levenskristall in jemehr Handflach. An den künnt de Sandmänner, wat de Polizisten in de Stadt sünd, sehn, wo oolt een is. Över verscheden Klören, de na en fastleggt Öller wesseln doot, kann dat Öller afschätzt warrn. Bito drägt de Lüüd ok jemehr Kledaasch in de Klöör, de to jemehr Öller passt. De Sandmänner dorgegen drägt swarte Kledaasch. Teihn Daag vör den 30. Geboortsdag fangt de Kristall an to blinkern. Dat is dat Teken, dat de Gang in’t Karusell ansteiht.

De Kristallen warrt vun en Reekner in de Stadt kontrolleert, de ok de Sandmänner op de so nöömten Löper – dat sünd de Minschen, de nich in’t Karusell gahn wüllt – ansett. De Löpers glöövt an een Vertellen, wona dat en Oort geven schall, de as de „Toflucht“ oder ok Sanktuarium betekent warrt. Keeneen weet, wat dat den Oort wohrhaftig geven deit oder nich. Se hebbt sik in en verstekenen Winkel in de Stadt en Oort söcht, woneem se sik drapen doot un över de Toflucht philosophiert.

Een Dag warrt Logan 5, en Sandmann, de süvst blots noch veer Johr to leven vör sik hett, vun’n Reekner utwählt, de Löpers to ünnerwannern. He kriggt vun den Reekner de Opgaav, de Toflucht to finnen un tonichten to maken. Dat he dat lichter hett un de Löpers em glöven doot, dat he een vun jem is, warrt sien Levensklock, alyso de Kristall, op dörtig Johren vördreiht. Wat he sien verloren veer Johr na den Opdrag torüch kriggt, dorop kriggt he keen Antwoort.

Dör en Tofall dröpt Logan 5 op de junge Jessica 6, de to dat Nett vun Löpers tohöört. Mit Möh kann he ehr övertügen, dat he nu ok en Löper is un dat he nich starven will. Mit ehr Help finnt he den Togang to den geheme Steed, woneem sik de Löpers draapt. Man, Logan twievelt allmählich sülvst ok an de Geschicht vun dat Neemaken. Francis 7, wat de beste Fründ is vun Logan 5, warrt mit de Tiet argdenkern un löpt em na. Dorbi warrt he Tüüg, as Logan 5 en Löper nich doodmaken deit, as dat sien Plicht weer, man em sogor helpt wegtolopen. Francis 7 schütt den Löper dood un verfolgt dorna Logan 5 un Jessica 6, de utneihn künnt un in de Ünnerstadt weglopen künnt.

Dör en Labyrinth vun verfallen olle un, as dat utsütt, siet lange Tiet nich mehr bruukte Rüüm un technische Anlagen kamt de beiden an’n Enn in en Höhl baven vun de Stadt, woneem se toeerst vun den Roboter BOX grööt warrt. He vertellt jem, dat he na sien Programmeren all de velen bitherigen Löpers, de op den glieken Weg weglopen weern, infroren hett, dormit se bestännig blievt. Dat jem nich dat glieke Schicksal drauht, schütt Logan 5 em twei. So kamt se opletzt an de Bavenflach, woneem se en romantische Wildnis – ut de Sicht vun de 1970er Johren – vörfinnt.

Se maakt sik op’n Weg, üm na Minschen to söken oder doch wenigtens Sporen to finnen, de jem seggt, wat ut de Minschen buten de Kuppel worrn is. Se kamt to de Insicht, dat dat Sanktuarium, wovun de Legenn vertellt, nicht geven deit. Na en längere Söök finnt se de Ruinen vun Washington und dorbinnen den eenzigen Minschen, een eenzigen Minschen, en ollen Mann, de wiet öller is as de 30 Johr. Jem warrt klor, dat de dörtig Johr en kumplett willkürliche Öllersgrenz is, de fröher mol vun de Sellschop fastleggt worrn is. Man, de künstliche Levensruum ünner de Kuppel maakt keen Sinn mehr, vun wegen dat dat Leven buten de Städer ahn Problemen mööglich is.

Op eenmol duukt Francis 7 wedder op, de jem nalopen is. Dat kummt to een Kamp, bi denn he vu Logan 5 dood maakt warrt. Logan un Jessica seht sik in de Plicht, de Lüüd in de Stadt de Wohrheit to vertellen. Tohopen mit den ollen Mann gaht se torüch na de Stadt, üm de Lüüd to verkloren, in wovun Irrsinn se leven doot. Wieldat se den ollen Mann buten de Stadt töven laat, duukt Jessica un Logan dör de Waterversorgen in de Stadt in, woneem se aver foorts vun de Sandmänner fastnahmen warrt. Logan 5 warrt ünner Verhöör nahmen un bericht vun de Saken, de he buten de Stadt sehn hett un dat dat de Toflucht nicht gifft. De Reekner kann de Informatschoon aver nich verarbeiten, vun wegen dat dat en Insaak is, to dat, wat he as geven ansütt. De Konflikt föhrt to sien egen Tonichtenmaken, un de Stadt is wedder free. An’n Enn vun’n Film versammelt sik all de Inwahners üm den ollen Mann. Se künnt kuum begripen, woans een Minsch so oolt warrn kann.

Ünnerscheed to de Vörlaag[ännern | Bornkood ännern]

Afsehn vun de grundsätzlichen Vörutsetten, wiekt de Film nich blots in Details bannig vun den Roman af. Sünners de Motivatschonen vun de Figuren un de zentrale Bedüden sünd ännert worrn. in’t Book is jeedeen klor, dat jemher Leven mit 30 Johr to Enn is. Logan 5 hannelt dorin nich eerst in’n Opdrag vun’n Reekner, man ut egen Övertügen, anfangs sogor mit de Afsicht, allens twei to maken. Francis geiht em na, üm de Toflucht, de dat tatsächlich as en Ruumstatschoon in’n Orbit üm den Mars gifft, för’t Tonichten maken to redden. Wieldat sik Logan un Jessica mit en Rakete op den Weg maakt, blifft Francis op de Eer torüch, üm wietere Lüüd to redden.

Achtergrund[ännern | Bornkood ännern]

Logan’s Run is mit mehr as negen Millionen US-Dollar meist so düer worrn as Star Wars. Kommerziell weer de Film en groten Spood un hett an de eersten fief Daag al 2,5 Millionen Dollar inspeelt. De Effekten un Opbooten weeren bannig övertügen. Sünners de Utgestalten vun de överwassen Ruinen vun Washington D.C. weern gloovhaftig maakt.

Man liekers geev dat ok Kritik, vun wegen dat sik de Film blots groff an de Vörlaag vun’n Roman hollen hett. In’n Ünnerscheed to’n Film harrn in den Roman de jungen Lüüd, de wiet in de Mehrtall weern, de Macht an sik reten, as de Inwahnertall en nich uttohollen Maat annahmen harrn un de Nehrmiddel jümmer knapper worrn sünd. In’n roman dröffen de Minschen sogor blots 21 johr oolt warrn. Disse Dystopie weer aver na Anischt vun de Produzenten doch to hard för de Lüüd, un so hett man beslaten, dat Öller op 30 hoochtosetten.

Anners wat[ännern | Bornkood ännern]

Fort Worth Water Gardens, Fort Worth (Texas)

För de hoochdüütsche Faten vun den Film is de Titel Flucht ins 23. Jahrhundert wählt worrn, ofschoonst dat nix mit den Originaltitel un ok nix mit de Handlung vun’n Film to doon hett. Een Reis dör de Tiet, as de Titel dat wiesmaken will, kummt in den Film nich vör. In den Film gifft dat ok en Textstück, dat nich in’n egentlich Sinn översett worrn is. Dat is gliek to Anfang, as Logan un Francis in’t Karusell gaht. En Stimm seggt „Steinböcke, 15. Jahr in der Stadt. Heute ist euer letzter Tag 2274...“, man in’t Original heet dat „Last day, Capricorn 15th, Year in the City 2274...“ Dat de Lüüd, de in’t Karusell oplöst warrn schüllt, 15 Johren in de Stadt weern, gifft ut de Geschicht keen Sinn.

De Rull vun Logan 5 is toeerst Jon Voight anstellt worrn, un för de Jessica 6 weer Lindsay Wagner de eerste Wahl. Ok för Francis 7 schüll an sik en annern spelen, neemlich William Devane, un ok de olle Mann weer toeerst för en annern Schauspeler vörsehn, man Peter Ustinov is för James Cagney insprungen.

Dreiht worrn is de Film in twee Inkoopszentren in de texaanschen Grootstäder Fort Worth un Dallas. Dat Enn vun’n Film wiest en groten Trechterborn, de de Waterversorgen vun de Kuppelstadt dorstellt. Den Brunnen gifft dat wohrhaftig in de Fort Worth Water Gardens. Baseeren op den Film is ok en 14-deelige Feensehreeg Logan’s Run dreiht worrn, de in Düütschland aver nie wiest worrn is. Ok in de USA sülvst sünd blots 11 vun de 14 Episoden sennt worrn.

Utteken[ännern | Bornkood ännern]

De Film is in twee Kategorien för den Oscar nomineert wesen, neemlich för’t Beste Szenenbild un de Beste Kamera. Uttekent worrn is de Film mit söven Priesen:

Literatur[ännern | Bornkood ännern]

  • William F. Nolan, George Clayton Johnson: Flucht ins 23. Jahrhundert. Heyne, München 1984, ISBN 3453304381

Na den groten Sppod vun den Film hett Nolan beslaten de Geschicht wieter to schrieven. Dat geev achteran dorüm noch de wieteren beiden Romanen Logan’s World un logan’s Search, de sik aver beid an den Roman orienteert un nich an’n Film.

Butendem sünd in de USA un in Grootbritannien ok Comics rutbröcht worrn.

Websteden[ännern | Bornkood ännern]