Last Vegas

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: Last Vegas
Düütsch Titel: Last Vegas
Produkschoonsland: USA
Johr vun’t Rutkamen: 2013
Läng: 105 Minuten
Originalspraak: Engelsche Spraak
Öllersfreegaav in Düütschland: FSK 0
Filmkru
Speelbaas: Jon Turteltaub
Dreihbook: Dan Fogelman
Produkschoon: Amy Baer
Joseph Drake
Matt Leonetti
Laurence Mark
Musik: Mark Mothersbaugh
Kamera: David Hennings
Snitt: David Rennie
Szenenbild: David J. Bomba
Kledaasch: Dayna Pink
Dorstellers

Last Vegas (op plattdüütsch so veel as „Letzt mol Vegas“) is de Titel vun en US-amerikaansche Filmkummedie ut dat Johr 2013. Speelbaas vun den Film weer Jon Turteltaub, de gröttsten Rullen weern besett mit de fief Oscar-Priesdrägers Michael Douglas, Robert De Niro, Morgan Freeman, Kevin Kline un Mary Steenburgen.

De Premiere vun de Kummedie weer an’n 1. November in de USA. In Düütschland keem he twee Weken later, an’n 14. November, in de Kinos.

Inholt[ännern | Bornkood ännern]

Billy, Paddy, Archie, Sam un Sophie sünd in Brooklyn, in’t Veerdel Flatbush opwossen un siet jemehr Kindheit Frünnen, vunwegen dat se jümmer tosammen hollen hebbt, ok wenn starkere un öllere junge Lüüd jem wat wulln. Intwüschen sünd mehr as föfftig Johren in’t Land togen un de Frünnen sünd oolt worrn, un Sophie, de inst Paddy heiraat harr, is sogor al doodbleven. De rieke Billy plaant nu, sien dörtig Johren jüngere Bruut Lisa to heiraten. Dorophen besluut Archie un Sam, de se all veer tosamen na Las Vegas reisen mööt, üm mit Billy Junggesellenafscheed to fiern.

Dat is man allns nich so eenfach, vun wegen dat Archie, siet he en Slaganfall hatt hett, vun sien Söhn Ezra meist as en lütt Kind behannelt warrt. Üm de Reis mitmaken to künnen mutt he sik ünner en Utreed ut dat Huus slieken. Dor hett Sam dat beter, vun wegen dat he vun sien Fro Miriam Verlööf kriggt, wat mit annere Fronslüüd antofangen. Se haapt neemlich, dat jümmer inslapen Sexleven denn wedder ingang kummt. Dorgegen will Paddy vun de helen Saak nix weten. He hett sik na den Dood vun Sophie meist vullstännig torüchtogen un leevt gnadderig vör sik hen. Bito hett he sik mit Billy streden un snackt al längere Tiet nich mehr mit em. Blots mit en List kriegt se em na Las Vegas.

As Billy un Paddy op’nanner drapen doot gifft dat ok glieks Arger. Liekers laat sik de annern dree den Spaaß nich nehmen un verdrievt sik de Tiet in’t Casino un an de Bars. As Archie bi’n Black Jack bannig afrümen deit, hebbt se op eenmol teemlich veel Geld uttogeven un drööft denn ok in en eddel Huus intehn mit jemehrn egenen Dener an de Hand. Glieks to Anfang, as se in de Stadt kamt, drapt se de Singersche Diana, vun de Paddy as ok Billy foorts teelich andoon sünd – jüst so as dormols vun Sophie. Ofschoonst dat jümmer wedder to Striet mit Paddy kamen deit, winnt de veer Frünnen opletzt all wat dorto:

Sam is de hele Tiet achtern de jungen Fronslüüd achteran un kriggt wohrhaftig en feine junge Deern rüm, mit em in’t Bett to gahn. As dat losgahn schall markt he aver, dat he dat sien Fro nich andoon mag, liekers dat se em Verlööf geven hett. Archie warrt vun sien Söhn opdeckt, jüst as de veer in jemehr Huus en grote Party geven doot. Dit mol, deit he aver nich, wat sien Söhn em vörschrieven will, man he verkloort em, dat he ok in sien hoog Öller noch Spaaß an’t Leven hebben müch.

Opletzt finnt ok Billy un Paddy en Weg jümmern Striet bitoleggen. Eerst warrt Paddy gewohr, dat Sophie em dormols vör allen heiraat hett, vunwegen dat Billy ehr seggt harr, dat de hele Welt ehr an Paddy sien Siet sehn de, ofschoonst he ehr sülvst leev harr. Doröver is Paddy toeerst bannig daalslahn, markt denn aver, wat sien Fründ dormols för em opgeven hett. Nu sütt he aver ok, dat Billy Lisa blots heiraten will, üm sik vun sien egen Öller aftolenken. Dat mag he nich tolaten un snackt op Billy in, dat he de Hochtiet afblasen schall, wat de opletzt denn ok deit. As he sik denn ok vun Diana torüchtehn will, üm ehr Paddy to överlaten, sett Diana em den Kopp torecht, dat he nich den glieken Fehler noch eenmol maken, man he lever op sien Geföhlen un sien egen Hart hören schall.

So kummt an’t Enn Diana un Billy noch tosamen un Paddy leevt ok wedder op, nadem sik de Frünnen utsnackt hebbt un de ollen Lasten begraaavt sünd. All tosamen warrt se sik kloor, wo wichtig go’e Frünnen sünd. De Film ennt en poor Maanden later, as Billy sien Frünnen anropen deit un jem vertellt, dat Diana un he heiraten wüllt. Blots Sam künnt se nich an’n Apparat, vunwegen dat de mit sien Fro Miriam to veel in’t Bett to doon hett.

Kritik[ännern | Bornkood ännern]

  • Filmstarts.de beteken dat Speel vun de fief Oscar-Priesdrägers as en Geneet, wiel de Speelbaas un de Dreihbookschriever kritiseert weern, dat se de Rentner-Kummedie ennerworrns twüschen charmant-romantische Ünnerhollen un billigen Klamauk anleggt harrn.[1]
  • Op Cinema weer seggt, dat de Kummedie vun Dan Fogelman jümmer denn toleggen de, wenn sik de ollen Stars sülvstironische Spröök, so as „Ik heff Hämorrhoiden, de öller sünd as dien Fründin“, üm de Ohren haut. To’n Enn hen barg de Film en bewegen Loovleed an de Fründschop, de en Leven lang hollt. Denn kemen ok mol ernstere Töön dör över’t Öllerwarrn in en Sellschop, de vun en Jöögdfimmel andreven warrt.[2]
  • Sebastian Lohse schreev op Filmfutter.com, dat sik Lüüd, de op en Spin-off to „Hangover“ ut weern, bi den Film an de verkehrte Adress weern, vunwegen dat de Film keen reine Kummedie to’n Utspannen weer. De Themen beröhren un ünnerhollen över de hele Looptiet op sympaathsche Oort un Wies. Speelbaas Turteltaub bewies, dat man dorbi ok Spaaß hebben künn, wenn man mit de richtigen Lüüd dör’t Leven geiht.[3]

Borns[ännern | Bornkood ännern]

  1. Kritik to Last Vegas op Filmstrats.de, afropen an’n 8. November 2013
  2. Filmkritik op Cinema.de, afropen an’n 9. November 2013
  3. Filmkritik op Filmfutter.com, afropen an’n 11. November 2013

Weblenken[ännern | Bornkood ännern]