Landschopsverband Stood

De Landschopsverband von de fröheren Hartogdömer Bremen un Veern oder kort Landschopsverband Stood is en indragen Vereen in Stood (Seet in de Johannisstraat 3). Dat is een von de Landschopsverbänn in Neddersassen un is 1963 grünnt worrn.

Rebeed

Dat Rebeed, in dat de Landschopsverband aktiv is, is dat Rebeed von de Landschop von de Hartogdömer Bremen un Veern anpasst an de modernen Verwaltungsgrenzen. Dor höört also groff dat Elv-Werser-Dreeeck to. De olen Hartogdömer Bremen un Veern – ahn dat Rebeed üm de Stadt Snevern – un dat Land Hadeln hebbt in dat Königriek Hannover de Landdrostie Stood billt un düsse Region hett mit’n fröheren Regerungsbezirk Stood bet 1978 en territoriale Kontinuität opwiest. Tosätzlich to de Hartogdömer Bremen un Veern höört to dat Rebeed ok dat fröher bruunswieksche Thänhusen, dat nu to’n Landkreis Veern höört, un dat fröher hambörgsche Cuxhoben (Amt Ritzbüttel), dat nu in’n Landkreis Cuxhoben liggt, un annere lüttjere Randrebeden, de över de Tieden dör Kommunaalreformen de Tohörigkeit wesselt hebbt.

Historie

De Verband is an’n 24. Oktober 1963 op Initiative von de Landschop von de Hartogdömer Bremen un Veern ünner’n Präsident Thassilo von der Decken grünnt worrn. Dat weer de eerste Landschopsverband in Neddersassen. Later sünd Landschopsverbänn för dat hele Rebeed von dat Bundsland grünnt worrn.

Maten

Maten von’n Landschopsverband sünd de Landkreise Cuxhoben, Stood, Rodenborg, Oosterholt un Veern, 17 Städer un Gemenen, 39 Geschichts-, Heimaat- un Kulturverenen un de Landschop von de Hartogdömer Bremen un Veern. To’n Vörstand höört jümmer twee Vertreders von de Landschop, de Landkreise, de Städer un Gemenen, de Verenen un een Vertreder von de regionale Geschichtsforschung.

Opgaven

De Landschopsverband Stood sett sik för Kulturförderung, Identitätspleeg un Regionaalmarketing in un deit regionale Kulturarbeid. Blangen egen Projekten fördert he Kulturprojekten von siene Maten un von Kulturdregers in dat Förderrebeed. Dat Vörankamen von de Museumslandschop warrt dör en hööftamtlichen Museumsberader ünnerstütt. Mit dat „Programm för dat Bewohren von de Museumsbestänn“ warrt tohoop mit de Landsregerung von Neddersassen Maatnahmen för dat Bewohren von Museumsgood fördert. Över dat rut höllt de Verband elk Johr en „Museumspädagoogsche Week“ af, bi de mit en School an’n Standoort von dat Museum tohooparbeidt warrt. Ok för de Pleeg un dat Verbreden von de plattdüütsche Spraak sett de Verband sik in. Dat gifft to’n Bispeel Theaterseminaren för vullwussen jüstso as för junge Lüüd un de Seminardeelnehmers kriegt de Mööglichkeit, op verscheden Theaterbühnen in dat Elv-Werser-Dreeeck dat Lehrte ok to wiesen. Dorto reist dat „Theater op’t Flett“ mit siene Stücken dör de Heimaathüüs in de Region un de „Wellenbrekers“, dat Theaterseminar för junge Lüüd, wiest sik op Schoolbühnen. In’n Rahmen von en Projekt to dat Kriegsenn hett sik de Landschopsverband ok mit de Geschicht von de Lüüd uteneensett, de na’n Tweten Weltkrieg as Flüchtling un Heimaatverdrevene in de Region kemen.

Publikatschonen

De Landschopsverband gifft veer Maal in’t Johr de Tiedschrift Heimat und Kultur zwischen Elbe Weser rut un tosätzlich en wetenschopliche Schriftenreeg^[1] un siet 2001 en jüstso wetenschopliche „lüttje“ Schriftenreeg, de en ringeren Ümfang hett. En Swoorpunkt von de Schriftenreeg is de op veer Bänn anleggt Geschicht von de Region ünner’n Titel Geschichte des Landes zwischen Elbe und Weser, von de betherto (Stand April 2020) dree Bänn rutkamen sünd. De Verband hett ok CDs un en Videofilm rutbröcht. Tosätzlich warrt de „Zeitschriftenschau“ rutgeven, en Verteeknis von all Opsätz över de Region twüschen Elv un Werser, de in Tiedschriften rutkamen sünd. De letzte druckte Utgaav von düsse Tiedschriftenschau keem 2002/2003 rut, sietdem warrt se blots noch online anbaden.

Vörsitters

1963–1987: Thassilo von der Decken
1987–2009: Rainer Mawick
2009–: Michael Roesberg

Weblenken

Websteed von’n Verband (hoochdüütsch)

Footnoten

↑ Schriftenreihe

[1] Schriftenreihe

[1]