Labyrinth (Film)
| Filmdaten | |
|---|---|
| Plattdüütsch Titel: | — |
| Originaltitel: | Labyrinth |
| Düütsch Titel: | Die Reise ins Labyrinth |
| Produkschoonsland: | USA, Grootbritannien |
| Johr vun’t Rutkamen: | 1986 |
| Läng: | 97 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Jim Henson |
| Dreihbook: | Terry Jones |
| Produkschoon: | Eric Rattray |
| Musik: | Trevor Jones David Bowie |
| Kamera: | Alex Thomson |
| Snitt: | John Grover |
| Dorstellers | |
| |
Labyrinth (dt. Titel: Die Reise ins Labyrinth) is de Titel vun en Kinner-Fantasyfilm mit Musical-Elementen ut dat Johr 1986. Vele vun de vörkamen Rullen sünd mit Animatronics (wieterentwickelte Muppet-Poppen) besett. De Hööftrullen weern speelt vun de dormols 15 johrige Jennifer Connelly un David Bowie.
Inholt
[ännern | Bornkood ännern]Sarah is en Teenagerin vun 15 Johren, de mit ehr Steefmudder nich kloor kummt un sik vun ehr un ehrn Vadder ungerecht behannelt föhlt. Se flücht sik dorüm in en Fantasiewelt, de se ut Böker kennt. Een Avend schall se op ehrn lütten Halfbroder Toby oppassen, man de schreet ahn Enn un is nich ruhig to kriegen. Sarah kummt mit de Situatschoon nich torecht un teemlich gau wünscht se sik, dat de Koboldkönig dat Baby weghollen deit. Se ziteert ’n Spröök ut ehr Book, un wohrhaftig is dat Baby weg. As ehr kloor warrt, wat se ehrn Halfbroder andoon hett, beddelt se den Koboldkönig Jareth an, em wedder torüchtogeven, man he lett sik dorop nich in. Liekers gifft he Sarah en Chance: Se kriggt vun em 13 Stünnen Tiet, dör sien resenhaftig Labyrinth bit na sien Slott to finnen un den Lütten to befre’en. Wenn se dat nich rechttietig henkriggt, warrt he Toby in en Kobold vewanneln.
Sarah maakt sik op den Weg dör dat snaaksche Labyrinth. Gau stellt se fast, dat dat Labyrinth vull vun Gefohren, Wunner un sünnerbore Leevwesen is. Se dröpt op lebennige Felsen, Monsters, Hannen, de snacken künnt, Füerköpp, de jemehr Köpp uttuuschen künnt un Moor, dat ewig stinkt. Ünner all de sünnerboren Leevwesen gifft dat en poor, de se as Frünnen winnen kann: den Dwarg Hoggle, dat Monster Ludo un de tappere Wachhund Didymus, de den Utgang vun’t ewig stinken Moor bewachen deit.
Tosamen dringt se bit in de Koboldstadt in de Mitt vun’t Labyrinth vör un stellt sik all de Gefohren, Drug un Gegners to stellen. Gemeenson künnt se sogor de Koboldsoldaten bikamen, de jem ophollen schüllt, un opletzt finnt Sarah in’t Slott vun Jareth ehrn lütten Halfbroder wedder un kann em jüst noch rechttietig befre’en, dordör dat se den richtigen Spröök opseggen deit, as se dat ut ehr Böker kennt.
Kritiken
[ännern | Bornkood ännern]- Lexikon vun’n internatschonalen Film: Teils fantasie- und humorvolle, teils schleppende Mischung aus Puppentrick- und Realfilm; das Interesse wird hauptsächlich durch die skurrilen Puppen und deren mitunter rüden Streiche wachgehalten.
Utteken
[ännern | Bornkood ännern]De Film hett keen Priesen wunnen, weer aver för veer Filmpriesen vörslahn, as för den BAFTA Award för de besten Trickeffekten oder för den Saturn-Pries in de Kategorien Best Fantasyfilm un Beste Kledaasch.
Achtergrund
[ännern | Bornkood ännern]- De Film is vun de Böker vun Maurice Sendak un Lewis Carroll inspireert, de to Anfang vun’n Film in Sarahs Slaapkamer to sehn sünd.
- De Musik to’n Film stammt to’n Deel vun David Bowie, de sülvst een vun de Hööftrullen speelt. In verschedene Szenen warrt siene Leder inspeelt un as Deel vun’n Film vun em in de Rull as Koboldkönig sungen. In mehrere Szenen speelt de Koboldkönig mit een oder mehrere Kristallkugels. De Techniken, de wiest warrt, sünd eenfacke Elementen vun de Kuntaktjonglaasch. De Hand, de in disse Szenen mit de Kugels rümspeelt is aver nich vun Bowie, man höört den Performance-Künstler Michael Moschen.
- De Szeen op’n Dansball (mit de Musik vun Bowie) as ok de Slacht mit de Kobolden is vun Gates McFadden utarbeit worrn, de an den Film as Choreograafsche mitarbeit hett.
- De Produkschoon is vun George Lucas utföhrt worrn. Ut sien Effektsmeed Industrial Light & Magic sünd ok de optischen Effekten bistüert worrn.
- As de Film in de Kinos to sehn weer, weer dat en Flop. Liekers hett de tietlose Film vundaag en grote Anhangerschop. Dat Book „Goblins of the Labyrinth“ (vun den Designer Brian Froud) is to’t 20. Jubiläum ünner den Titel „The Goblins of Labyrinth“ nee opleggt worrn. Anlehnt an den Film hett Lucasfilm (vundaag LucasArts) mit Labyrinth sien eerst Adventure-Speel rutbröcht, dat een vun de eersten kumplexeren grafischen Adventurespelen överhaupt weer.
Weblenken
[ännern | Bornkood ännern]- Labyrinth (Film) in de Internet Movie Database (engelsch)