Kaisa Mäkäräinen

Kaisa Leena Mäkäräinen (* 11. Januar 1983 in Ristijärvi) is en ehmalge finnische Biathletin.

Loopbahn

Anfänge in' Biathlon

De Studentin Kaisa Mäkäräinen fung 2003 mit den Biathlonsport an, nahdem se vörher all in' Langloop aktiv weer. Hör Vereen is Kontiolahden Urheilijat (Kontiolahti Sport Club) un se wurrd vun Tomi Kuutti traineert. Enn' Januar 2004 hett se mit den Juniorenweltmeesterschapen in Haute Maurienne, wor en 23. Platz in' Eenzelwettkamp hör best Resultat weer, hör eerst internatschonale Rennen bestreeden un hörrt siet 2004 to dat finnisch Natschonalteam. In' März 2005 nehm Mäkäräinen in Hochfilzen eerstmals an Biathlon-Weltmeesterschapen deel un reck dor as best Ergevnis Rang 49 - wedderum in' Eenzelwettkamp. Siet de Saison 2005/06 is se in' Weltcup aktiv. Nahdem se in Östersund mit de Staffel Rang 14 beleggt un in' Sprint as 94. de Qualifikatschoon för de Verfolgung düütlich verpasst harr, reck se een Week later in Hochfilzen as 29. vun den Sprint hör eerst Weltcuppunkte. An' Enn' vun de Saison belegg se in' Gesamtweltcup Rang 62. In' folgen Winter klasseer sück Mäkäräinen in' Weltcup regelmatig ünner de best 30 un keem Enn' Januar 2007 as Söbente vun den Massenstart vun Pokljuka eerstmals ünner de best Teihn. Dit Ergevnis kunn se bi de Weltmeesterschapen in Antholz bestätigen, as se in' Eenzel up Platz 8 un in' Massenstart up Platz 7 keem. In den Gesamtweltcup kunn se sück up den 27. Platz verbeetern.

Eerst Erfolge in' Weltcup

De Weltmeesterschapen in' Sömmerbiathlon 2007 in Otepää hett de Finnin as Düppelweltmeesterin in' Sprint un in de Verfolgung up Skirullern. In' Winter 2007/08 gelung hör kört vör Wiehnachten as Tweet in' Sprint vun Pokljuka eerstmals de Sprung ünner de best dree in en Weltcuprennen. Bi de Weltmeesterschapen in Östersund weer en 15. Platz in' Massenstart hör best Ergevnis. In' Gesamtweltcup gelung hör nah en wiederen Podestplatz (3. bi dat Verfolgungsrennen in Ruhpolding) un eenig Platzeeren ünner de best Teihn en wiedere Stiegern up Platz 13. 2008/09 kunn se dit Niveau hollen, reck se twee wiedere Podestplätze in' Weltcup un wurr 14. in' Gesamtweltcup. Bi de Weltmeesterschapen 2009 in Pyeongchang weer se in de Verfolgung de Russin Olga Saizewa in’ Teelsprint ünnerleegen un wurr Veert. To’n Afsluss vun de Saison wunn se den Sprint-Titel bi de Finnisch Meesterschapen. 2010, also in de folgen Winter, keem se nah en gooden Anfang (3. Platz in’ Sprint vun Östersund) nich so richtig togang, so dat se de Gesamtweltcupwertung in disen Winter blots up Platz 22 afsluuten dee. Ok hör eerst Olympisch Winterspelen in Vancouver in’ Februar 2010 verleepen för de Finnin wenig spoodriek: as best Resultat reck se Rang 45 in de Verfolgung.

Weltmeestertitel un Gesamtweltcupsieg

För de Weltcupsaison 2010/11 wurr Mäkäräinen dör den Öösterrieker Josef Obererlacher traineert. Se wies all bi hör eerst Eenzel vun dat Johr in Östersund mit de best Looptiet vun all Deelnehmerinnen hör good Loopform. Bi den folgen Sprint bleev se todem ahn Scheetfehler un wunn hör eerst Weltcup-Rennen vör de ok fehlerfree bleven Miriam Gössner, de woll noch flinker loopen dee, aber an' Scheetstand dorvör wat langsamer weer. In de denn ansluuten Verfolgung bleev de Finnin ok fehlerfree un wunn weer vör Gössner. Hör bit dorhen gröttste Spood gelung Kaisa Mäkäräinen bi de Weltmeesterschapen 2011 in dat russisch Chanty-Mansijsk. Nah en tweeten Platz in' Sprint achter Magdalena Neuner wunn se in de ansluuten Verfolgung dör en fehlerfree Scheeten de Goldmedaille. Mäkäräinen is dormit de eerste finnische Biathlonweltmeesterin in de Historie. Bi de Wettbewarfen to'n Saisonafsluss an' Holmenkollen leep se to'n twintigsten Mal wiels de Saison in de Top-Ten un seker sück dank hör Konstanz as eerste Finnin den Biathlon-Gesamtweltcup. 2011 wurr se denn ok noch to de Sportlerin vun dat Johr in Finnland wählt.^[1]

Fastsetten in de Weltspitze

Nah en Trainerwessel kunn Mäkäräinen in de Weltcupsaison 2011/12 nich ganz an de Erfolge vun dat Vörjohr anknütten. Ofschons se sück to'n Anfang vun de Saison weer in bannig good Loopform wies, kunn se över den Winter vör allen wegen hör faken schlechter Scheetleistungen mit de domineeren Fruen as Magdalena Neuner un Darja Domratschawa nich mithollen. Liekers reck se in' Weltcup mehrere Podiumsplatzeeren, dorbi ünner annern den Gewinn vun dat Eenzel in Nové Město na Moravě. Vör dat heimisch Publikum in Kontiolahti, blots wenig Kilometer vun hör Wahnoort in Joensuu weg, seker sück de Finnin bi meest -20° C nah en tweeten Platz in' Sprint den eersten Platz in de Verfolgung. Nah enttäuschen dree Wettbewarfen bi de Biathlon-Weltmeesterschapen 2012 in Ruhpolding, bi de se blots eenmal de Top-20 recken dee, seker se sück in dat letzt Rennen, den Massenstart över 12,5 km, de Bronzemedaille achter Tora Berger un Marie-Laure Brunet. In' Gesamtweltcup belegg se an dat Saisonenn' achter Neuner, Domratschawa un Berger Rang 4, in' Eenzel- un Sprintweltcup reck se jewiels de Top-3. Se wunn buterdem mit den Carl Johan Bergman ut Sweden de World Team Challenge in de Arena auf Schalke in Gelsenkiärken.

To de Vörbereiten up de Weltcupsaison 2012/13 wurr se vun Juha Hirvi as Scheettrainer ünnerstütt. De Finne hett sössmal an Olympisch Spelen deelnommen un wunn bi de Olympisch Sömmerspelen 2000 in Sydney de Sülvermedaille in' Lüttkaliber Dreestellungskamp. In' Weltcup bleev se in dissen Winter ahn Sieg, stunn aber sössmal up dat Podest un belegg Rang fiev in' Gesamtweltcup. Bi de Weltmeesterschaften 2013 in Nové Město na Moravě kunn se aber kien Medaille winnen.

Tweet Erfolg in' Gesamtweltcup

Nah en dörwussen Anfang vun den Weltcupwinter 2013/14 keem Mäkäräinen Anfang 2014 söben Mal in Reeg ünner de best teihn un reck dorbi dree Podestplätze, so dat se as Dartplatzeerte in' Gesamtweltcup to de Olympisch Winterspelen in dat russische Sotschi reisen dee. Dor nehm se an all veer Eenzelwettbewarfen, bleev aber ahn Medaille. Blots in' Eenzel (9.) un in' Massenstart (6.) keem se ünner de best teihn. Bi den ansluuten Weltcup in Pokljuka wunn se de Verfolgung un reck mit twee Scheetfehler den tweeten Platz in' Massenstart. Dormit övernehm se de Führung in' Gesamtweltcup. In dat heimischen Kontiolahti reck se ehr eersten Hattrick, indem se de beid Sprintrennen as ok dat Verfolgungsrennen up hör Naam schrieven kunn. Bi den afsluuten Weltcup in Oslo seker se sück dör hör Ergevnisse den Sieg vun den Sprint- un den Verfolgungsweltcup un kunn mit veer Punkten Vörsprung up Tora Berger to'n tweeten Mal in hör Loopbahn den Gesamtweltcup winnen.

Folgesaison un WM to Huus

De Folgesaison fung för Mäkäräinen ähnlich spoodriek an, as de letzt to Enn' gung. Nahdem se sück in' eersten Wettkamp noch achter Darja Domratschawa mit Platz 2 begnögen muss, hett se sück dat geel Trikot weer torüch haalt un bestimm af den Sprint in Östersund vöreerst dat Geschehen in' Weltcup. Bit to de Wiehnachtspaus stunn de Finnin in 8 Eenzelrennen söben Mal up at Podest – dorünner 4 Siege, 2 tweete Plätze un en dart Rang. Nah de Pause weer se in't Loopen wiederhen in Bestform un hull tosommen mit Domratschawa de best Looptieden. Allerdings harr se to völ Scheetfehler, so dat de Fru ut Wittrussland den Afstand in'n Weltcup minneseeren kunn. Bit to Heim-Weltmeesterschap in dat finnisch Kontiolahti gelungen Mäkäräinen woll neben de Sieg in't Eenzelrennen in Oslo, bi dat se in all veer 4 Schieetinlagen fehlerfree bleev, 3 wiedere Podestplatzierungen, allerdings verlor se dat geel Trikot an hör wittrussisch Konkurrentin.

Neben Domratschawa un Vítková gull Kaisa Mäkäräinen as de groote Favoritin up hör Heimstrecken. Allerdings keemen de dree nömmt Athletinnen blots schlecht mit de Bedingungen an' Scheetstand torecht. Eenzig de Finnin seker sück dör en överragend Loopleistung de Bronzemedaille in' Eenzel un seker sück to glieker Tiet ok de Eenzelcupwertung.

Bi den afsluuten Weltcup in Chanty-Mansijsk hett Mäkäräinen den Kamp um den Gesamtweltcup noch eenmal spannend maakt, indem se nah hör Sprintsieg den Afstand up de Weltcupführung up 9 Punkte lüttger maaken dee. In de ansluutend Verfolgung reck se den 4. Platz un wunn nah de lütt Kristallkugel in’ Eenzel ok den Verfolgungsweltcup. Bi dat Massenstartrennen to’n Afsluss bleev se aber mit fiev Scheetfehlers achter Domratschawa un reck in de Gesamtweltcupwertung den 2. Platz.

Fortsetten vun hör Loopbahn (af 2016)

In dat Fröhjahr 2016 wurr weer doröver spekuleert, of Mäkäräinen hör Karriere afsluuten würr. En Entscheeden, de för den 7. April 2016 verwacht wurr, geev dat aber nich. Eerst Enn‘ 28. April geev se bekannt, dat se wiedermaaken wull. Nahdem de finnisch Trainer torüchtreeden weer, hett se hör Entscheeden vun de Person vun den neen Trainer afhängig maakt. Mit Antti Leppävuori as Cheftrainer will se bit to twee Johr wieder in‘ Weltcup starten will.

Nah blots en 24. Platz in dat eerst Rennen vun de Saison 2016/17, dat Eenzelrennen in Östersund, dat dör swoor un wesselhaft Windbedingungen präägt weer, folgten bit to’n Johreswessel twee tweet Plätze un – mit Utnahm vun en 11. Platz bi dat Verfolgungsrennen in dat tschechisch Nové Město na Moravě – blots Top-10-Platzeeren. Nah en tweeten un en darten Platz in‘ Januar 2017 in Oberhof wunn se een Week later bi den Sprint in Ruhpolding hör eerst Weltcuprennen in Düütschland. Den Sieg kunn se in de ansluuten Verfolgung ok noch recken. Bi den Weltcup in Antholz gung de finnisch Damenstaffel mit en wenig begäng Upstellung an den Start, denn meest wurr Kaisa Mäkäräinen as Startlöperin insett. Ditmal gung se aber nah Laura Toivanen, Sanna Markkanen un Mari Laukkanen as letzt Athletin up de Streck un sloot up Rang 8 af, wat hör persönliche Bestleistung in de Staffel is un dat beste Ergevnis för en finnisch Damenstaffel siet den 6. Platz bi de Biathlon-Weltmeesterschapen 2003.

As all so faken bleeven hör Leistungen bi de Weltmeesterschapen achter dat wat se verwacht harr un ok achter hör Mögelkeiten torüch. Dennoch seker se sück de letztmögelk Medaille bi de Titelkämpe un wunn – as ok all bi de WM 2012 un 2016 – de Bronzemedaille in‘ Massenstart achter Laura Dahlmeier un de överraschen Tweet Susan Dunklee. Kört nah de Weltmeesterschapen geev Mäkäräinen bekannt, dat se nich to de Nordisch Skiweltmeesterschapen fohren de. De finnisch Verband kunn hör kien Startgarantie geven, wiel se in dissen Winter kien Langlooprennen bestreeden harr. Todem harr se to dissen Tietpunkt good Chancen, den Sprint- oder Verfolgungsweltcup to winnen, weshalb se kien Rennen verpassen wull. In Pyeongchang behull se mit en veerten Platz in‘ Sprint un en tweeten Platz in dat Verfolgungsrennen en good Utgangspositschoon, mit de Plätze 49 un 31 in hör Heimrennen in Kontiolahti verpass se aber Chance, diese Wertungen noch mal to winnen. In dat letzt Rennen vun de Saison, den Massenstart in Oslo, wurr se Dart. Dat weer de 70. Podestplatzeeren in hör Loopbahn. Den Gesamtweltcup hett se up Platz 3 achter Laura Dahlmeier un Gabriela Koukalová afslooten.

Persönliches

Kaisa Mäkäräinen is verlobt un wahnt in Joensuu, blots wenige Kilometer vun Kontiolahti weg. Se geiht för den Kontiolahden Urheilijat an den Start un traineert up de Biathlon-Anlagen in Kontiolahti för de Vörbereiten up de Wettkämpe. Wenn se neben Training un den Wettkämpen noch Tiet hett, studeert se an de Universität in Joensuu Mathematik un Physik up Lehramt. In de Vergangenheit hett se as Sportreporter för dat Lokalblatt Karjalainen arbeit.

Weblenken

Kaisa Mäkäräinen. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen

↑ Kaisa Mäkäräinen on Vuoden urheilija

[1] Kaisa Mäkäräinen on Vuoden urheilija

[1]