John Locke
John Locke [[dʒɒn lɒk]] (* 29. August 1632 in Wrington bi Bristol; † 28. Oktober 1704 in Oates, Essex) weer en engelschen Philosophen in dat Tiedöller vun de Upklärung. He hett groden Indruck up annere Philosophen maakt un weer en vun de wichtigsten Vertreders vun den brittschen Empirismus. Tohopen mit George Berkeley (1684–1753) un David Hume (1711–1776) is he een vun de „Groten Dree“ vun de Opklärung un vun den Empirismus in Grootbritannien ween. Fudderhen is he, an de Siet vun Thomas Hobbes (1588–1679) un Jean-Jacques Rousseau (1712–1778) een vun de wichtigsten Verdragstheoretikers.
Siene politische Philosophie hett duchtig inwarkt up de Verklaren vun de Unafhängigkeit vun de Vereenigten Staaten vun Amerika, up de US-Verfaten, up de Verfaten vun dat revolutschonäre Frankriek un laterhen, över düssen Weg, up de meisten Verfaten vun liberale Staaten. In sien Two Treatises of Government seggt Locke, en Regeern weer bloß denn to Recht an'e Macht, wenn de Lüde, de regeert weert, tostimmen doot un wenn se de Naturrechten Leven, Freeheit un Egendom schulen un bewahren deit. Anners harrn de Lüde dat gode Recht, up to stahn gegen de Regeern.