Johann Sebastian Bach

Vun Wikipedia
Wesseln na: Navigatschoon, Söök
Johann Sebastian Bach in dat Jahr 1746, mit Radelkanon. Ölbild vun Elias Gottlob Haussmann

Johann Sebastian Bach (* 21. März 1685 in Iesenack in Döringen; † 28. Juli 1750 in Leipzig) weer een vun de gröttsten Musiker vun all Tieden in Düütschland. Sien Geburtsdag is nah de Juliaansche Klenner angeben. To de Tiet hebbt aber all veel Lüüd nah den Gregoriaanschen Klenner leevt - dornah weer sien Geburtsdag denn 31. März 1685.

Leben[ännern | Bornkood ännern]

Kinnertiet[ännern | Bornkood ännern]

Johann Sebastian Bach sien Vadder Ambosius Bach weer Stadtmusikus in Eisleben. Beide Öllern sünd fröh dootbleven, dor müss Johann Sebastian denn nah sienen Broder Johann Christoph nah Ohrdruf as he noch en ganz jungen Keerl weer. In dat Jahr 1700 is he nah Lüünborg gahn un hett dor de Michaelisschool besöcht.

Orgelspeeler[ännern | Bornkood ännern]

1703 is he Orgelspeler in Arnstadt wurrn. 1705 hett he een Reis to Foot nah Lübeck maakt. Dor woll he den berühmten Orgelspeeler Dietrich Buxtehude kennen lehren un em wat afkieken. För düssen Besöök harr he nich den Verlööf vun sien Obrigkeit un so geef dat achterher allerhand Striet. 1707 is he Orgelspeeler in Mühlhausen in Döringen wurrn. 1708 güng he as Orgelspeeler an den Hoff vun den Fürsten vun Weimar. In dat Jahr 1713 is he dor to'n Hoff-Kunzertmeister upsteegen.

Karriere[ännern | Bornkood ännern]

Amenn hett Bach in Weimar Theater hatt: As he wegwull, wiel he een' betern Posten funnen harr, dor hett sien Fürst em in't Lock smeten. He is aver doch rutkamen un 1717 nah Köthen gahn, dat is in Anholt. Dor hett he as Hoff-Kapellmeister bi den Fürsten deent. Düsse Fürst weer reformeert un so keem dat, datt Bach in düsse Tiet man wenig Karkenmusik maakt hett un mehr so wat to'n danzen un to'n tolustern in'n Huse.

Leipzig[ännern | Bornkood ännern]

An'n leefsten weer Bach jümmers in Köthen bleven, man de Fürst hett miteens heiraat un dor hett he keene Lust mehr hatt op Musik. Bach meen natürlich, dat keem vunwegen de Fro. An 'e grote Orgel in St. Katharinen in Hamborg woll he ok mal spelen, man dor hebbt se em nich nahmen, weil he keen Geld betahlt hett för düssen Job. Ohn betahlen künn he aver op düssen Posten nix warrn. 1723 is he denn in Leipzig bi de Thomaskarken Kantoor wurrn. Dor hett he allerhand Theater hatt, weil he sik mit de Latienschölers nich groot afgeven wull. He harr op Schoolmeesteree nich so'n Lust. Mehrst jeden Sünndag in't Johr hett he mit siene Schölers un annere Muskanten in 'e Karken opspeelt, un faken ganz wat Nees, wat he süms komponeert hett: Dat weren siene Kantaten.

Froons un Kinner[ännern | Bornkood ännern]

1707 hett Bach sien eerste Fro heiraat. Dat weer siene Cusine Maria Barbara Bach. 1720 is Maria Barbara sturven. Denn hett he 1721 Anna Magdalena Wilcken heiraat. Mit beide Froonslüe hett he tosamen 20 Kinners harrt.

Musik[ännern | Bornkood ännern]

He schreev un speel to'n Bispeel Musik to de Passion vun Jesus as de Johannespassion un de Matthäuspassion, Orgelwarken as siene groten Toccata un Fuga. För de protestantsche Karkenmusik hett he afsunnerlich veel tostannenbröcht un bit up düssen Dag sienen Stempel up de Kultur vun de evangeelschen Karken updrückt.Man he hett ok Stücken schreben, wo he de Fürsten un Königen to siene Tiet wiesen wull, wat vun deegten Keerl he is. För den König vun Preußen hett he dat Musikalische Opper schreven: Siene Söhns Carl Philipp Emanuel Bach, Johann Christian Bach, Johann Christoph Friedrich Bach un Wilhelm Friedemann Bach sünd ok Musiker worrn.

Weblenken[ännern | Bornkood ännern]