Ilhéus do Rombo

De Ilhéus do Rombo oder Ilhéus Secos (vun’t port. ilhéus „lütt Eiland“ un seco „dröög“) sünd en lütte Koppel vun Eilannen in Kap Verde, de all nich bewahnt sünd^[1].

De Ilhéus Secos sünd Deel vun de süüdlichen Kapverden, also vun de Ilhas do Sotavento. Se leegt bi ruchweg 14°50’’ N un 24°15’’ W ungefähr söss bit acht Kilometer in’n Noordoosten vun dat Eiland Brava un sett sik ut de beiden grötteren Eilannen Ilhéu Grande (ok Ilhéu de Baixo) mit ruchweg 3 km² Flach un Ilhéu de Cima mit üm un bi 1,5 km² tohopen un en ganze Reeg lüttere Eilannen, de deels as alleenstahnd Felssülen ut dat Water kiekt un all tosamen noch mol üm un bi 0,25 km² Flach opwiest. De dree grötteren dorvun sünd Ilhéu Luiz Carneiro, Ilhéu Sapado un Ilhéu do Rei. De ganze Koppel is dör Vulkanismus entstahn, so as de Rest vun de Kap Verden ok. Vun wegen de Verwalten höört se offiziell to dat Eiland Brava.

De Binaam Ilhéus Secos warrt bruukt, wieldat de Eilannen düchtig dröög sünd. Veel dröger as de beiden Eilannen Fogo un Brava, de bito liggen doot. Wassen deit dor so goot as gornix. De Eilannen sünd mehr oder weniger flach. De hööchste Steed is de Monte Grande op de Ilhéu Grande, de ruchweg 92 m hooch is. Dat Bild wiest de Koppel vun Eilannen as de vun Brava ut to sehn sünd. Vun links na rechts (Westen na Oosten) sünd dor de Ilhéu Grande, dicht tohopen de Ilhéu Luiz Carneiro un Ilhéu Sapado, de Ilhéu do Rei un de Ilhéu de Cima to sehn. Bi’t Vergröttern sünd links vun Luiz Carneiro noch de beiden lütten Baixinha un Barrete to sehn un rechts blangen Ilhéu do Rei Baixa de Boca de Porto.

De Inheemschen loopt de Eilannen nich faken an, wieldat dor nix to finnen is, wat’n bruken kann. Dorto kummt, dat de velen lütten Felssülen, de as lütte Eilannen rutkiekt, dat Anleggen mit’n Boot teemlich swor maakt. Man jümmer fakener gifft dat Touristen, de sik vun Furna op Brava ut röver schippern laat, wieldat de Eilannen ganz feine Sandstrännen opwiest.

Borns

↑ Kapverdische Inseln Dumont Reisetaschenbuch, 3. Oplaag, 2007, ISBN 3-7701-5968-3

Eilannen vun Kap Verde

[1] Kapverdische Inseln Dumont Reisetaschenbuch, 3. Oplaag, 2007, ISBN 3-7701-5968-3

[1]