Furna

Vun Wikipedia
Zur Navigation springen Zur Suche springen

Disambig.svg Dit Woort hett noch annere Bedüden: kiek dorför ünner Furna GR.

Vun de ne’e Straat op’n Weg na Nova Sintra is de överspöölte Vulkankrater to sehn, in den de Havenoort liggt. An’n Horizont düüdt sik swack dat Navereiland Fogo an.

Furna is en Dörp un de eenzige Haven vun dat Eiland Brava in de Republiek Kap Verde.

Geografie[ännern | Bornkood ännern]

De Oort liggt in en ollen Vulkankrater, de vun de See överspöölt worrn is. Dordör is dat Havenbecken von dree Sieten vun hooge Felswannen ümgeven un schuult un dat Water eenigermaten ruhig. Vun dat Dörp gaht twee Straten in de Bargen, de den Havenoort mit de Hööftstadt Vila Nova Sintra verbinnen doot, de op 500 m Hööch liggt. De ne’ere vun de beiden Straten löpt in Kehren de pielen Felswannen hooch un is ok för den Stratenverkehr egent, de ruchweg 15 Minuuten bit in de Stadt bruukt. De annere Straat is lütter un löpt op en veel direkter to. Man, dordör is se för Autos nich to befohren.[1]

Historie[ännern | Bornkood ännern]

Dat Eiland Brava is in’n Vergliek to de annern Eilannen vun Kap Verde eerst teemlich laat bewahnt worrn. Dat mag ok dormit tohopenhangen, dat an dat Eiland so swor antolannen is. Entsprekend jung is ok de Oort Furna, woneem eerst 1843 de Haven tostannen keem. Schuult gegen de hoogen Bülgen billt de ehmolige Krater en natürlichen Schuul för de anleggenden Scheep. Man den hüütigen Kai gifft dat ok eerst siet 2000. Dorför weer dat bannig swor för de Fährscheep an’t Över antoleggen vun wegen den Bülgenslag. Man, eenfach is dat jüst för de groten Scheep ok vundaag noch nich. Aver sietdem gifft dat tomindst een eenigermaten regelmatigen Fährverkehr na Brava.

Furna, Dörp un Haven in’n Noorden vun’t Eiland Brava

De Rull vun Furna för de Versorgen vun’t hele Eiland is för en poor Johr noch mol wassen, as de Flaaghaven vun Fajã de Água op de annern Siet vun’t Eiland stillleggt woorn is vun wegen de gresig starken Winnen. Siether is Furna wedder de eenzige Togang na Brava.

Oortsbild[ännern | Bornkood ännern]

Dat Dörp maakt an sik nich veel her un hett ok nich veel Inwahners. Wenn nich jüst en Schipp op’n Weg na’n Haven vun Furna is, denn liggt de Haven teemlich verlaten dor. Dat Havenrebeet is intüünt, is aver normalerwies togänglich.

De Oort is to’n Verwielen nich sünners intressant. Blangen de poor Hüüs gifft dat hier blots en poor Kneipen för de Seelüüd un Fischers. An’n Süüdrand steiht de noch teemlich ne’e Kark. Opfallig is al vun Wieten, dat en Deel vun de Bargflank in’t Dörp schraag tobetoneert worrn is. Disse Betonflach weer to’n Sammeln vun Regenwater dacht.[1] Lieke Betonflachen sünd ok noch an annere Steden vun Brava to finnen.

Borns[ännern | Bornkood ännern]

  1. a b Kapverdische Inseln, Dumont Reisetaschenbuch, 3. Oplaag, 2007, ISBN 3-7701-5968-3


Koordinaten:14° 53′ N, 24° 41′ W