Huus Habsborg-Lothringen

Vun Wikipedia
Wapen vun dat Huus Habsborg-Lothringen, hier in'e Midden vun den Orden vun dat Gullen Vlies: Blasoneerung: In'e Midden en sülvern Balken in Rood (Huus Öösterriek), rechts en rode Löwe mit Tung, Wapen un blaue Kroon (Huus Habsborg), links en roden schrägen Balken in Gold, dor liggt dree schräge sülverne Adlers mit Stummelflunken up (Huus Lothringen) Im Mittelfeld

Dat Huus Habsborg-Lothringen is de offizielle Naam vun dat Huus, dat regeert hett over de Habsborgschen Arvlannen vun 1740 af an, over dat Hillge Röömsche Riek twuschen 1745 un 1806, un as Kaiser vun Öösterriek twuschen 1804 un 1918.

De Kaiser Karl VI. harr in dat Johr 1713 de Pragmaatsche Sanktschoon rutgahn laten. Dor hett he in fastleggt, dat de öösterriekschen Arvlannen (Öösterriek, Tirol, de Süüdlichen Nedderlannen, Ungarn un Böhmen) as Arvschup an siene Dochter, de Erzhartogsche Maria Theresia gahn schollen. Ok den Throon vun dat Hillge Riek scholl se kriegen. Se hett 1736 den Hartog vun Lothringen freet, dat weer Franz III. vun Lothringen. Nadem Karl VI. sturven weer, is avers de Krieg um dat Öösterrieksche Arv utbraken un toeerst is Bayern sien Kurförst Karl to'n Röömsch-düütschen Kaiser wählt wurrn. Erst na den sien Dood 1745 is Maria Theresia ehr Mann Kaiser wurrn. Vunwegen, dat he ut dat Huus Lothringen keem un siene Fro ut dat Huus Habsborg, is he as Vader vun dat Huus Habsborg-Lothringen ankeken wurrn un all Kinner vun em un Maria Theresia sund as Kinner ut dat Huus Habsborg-Lothringen rekent wurrn. Dat Huus Habsborg an sik höör dor mit up un dat Huus Habsborg-Lothringen träe an siene Stäe.

Belgischen Twieg[ännern | Bornkood ännern]

Twee Liddmaten vun de Familie Habsborg-Lothringen sünd 1978 un 1983 Deel vun den Belgischen Adel wurrn. Se hefft den Titel vun en Prinz oder Prinzess kregen, de vun all Nafolgers dragen weern draff. De Anreed is Dörluchtige Hoheit.

Dat hannelt sik um twee Enkelsöhns vun den lesten öösterriekschen Kaiser Karl I.: Rudolf (1950) un Carl Christian vun Öösterriek (1954). Beide sünd Söhns vun Erzhartog Karl Ludwig vun Öösterriek un de belgische Prinzess Yolande de Ligne.

Kiek ok bi[ännern | Bornkood ännern]