Blasonerung

Blasonerung is in de Heraldik (Wapenkunne) dat Beschrieven vun en Wapen. As de eersten Wapenrullen un Wapenregisters upkamen sünd, hett sik en Kunstspraak utspunnen: De Blasoneerung. De hett dat mööglich maakt, en Wapen in Schrift un Woort slank un akraat so to beschrieven, dat dat ahn Fehler kloor weer, um wen sien Wapen sik dat nu hannelt. De Utdruck kummt vun dat franzöösche Woort „Blason“, wat Wapenschild bedüden deit.

Geschichte

Mit de Blasonerung gung dat in't Middeloller los. Dormols is dat een vun den Herold siene Upgaven ween, to bestimmen, wo de Wapen vun de Ridders herkamen döen, de na eene Stadt henreisen oder dör eene Stadt dörreisen döen.

Al vun dat 13. Johrhunnert af an hett sik in Frankriek, un, vun dor ut denn ok in England, en sunnerlik akraate Spraak for dat Beschrieven vun de Wapen dörsetten konnt. Düsse Spraken warrt noch hüdigendags in de Heraldik bruukt. In Düütschland hett de pietistische Theoloog Philipp Jacob Spener in dat 17. Johrhunnert de Grundlage leggt for en eenheitlich Beschrieven vun Wapen in düütsche Spraken.

De Reeg bi de Blasonerung

In düsse Reeg warrt bi de Blasonerung vörgahn

1. Dat Feld
2. Dat zentral Stück (Heroldsbild, gemeene Figur)
3. Wenn up dat zentrale Stück noch annere Saken to sehn sünd oder dor mit verbunnen sünd, folgt se hier
4. De Biteken
5. Allerhand Feller in’t Schild: De Feller weert beschreven na de Reeg vun de Schildstäen
6. Anners wat, as Middelschild oder Hartstück un de Figuren dor in
7. dat Böverwapen: Helmsmuck, Helmdeken
8. tolest de Prunkstücke, as Schildholler, Wahlspröök un Wapenmantel

Twee Wapen

As Bispeel weert hier twee Wapen beschreven:

Landkreis Gifhoorn Gold, overseiht mit rode Harten, en blauen Löwen mit rode Klauen, hollt en sülvern Hifthoorn

Landkreis Horborg Gold, bestreiht mit rode Harten, en blauen Löwen mit rode Klauen, hollt en sülvern Slötel