Zum Inhalt springen

Hornbörger Pannkoken

Vun Wikipedia
Hornbörger Pannkoken ganz un opsneden

De Hornbörger Pannkoken is en Huusappel-Soort, de ut Hornborg ut de Neegd von Oolland stammt.

2016 hett de Pomologen-Vereen in Hamborg den Hornbörger Pannkoken to de Aavtsoort von dat Johr för Noorddüütschland wählt.[1]

Historie[ännern | Bornkood ännern]

De Hornbörger Pannkoken is in Hornborg an’n Maschdamm as Tofallssamling opkamen. Üm 1840 hett de Aavtbuur Jacob Köpke ut Neekark den Appel opdeckt un denn in Neekark vermehrt.[1] De Appelsoort hett sik denn in Oolland un an de Nedderelv verbreedt un weer na en Erntestatistik von 1939 de wichtigste Appelsoort in Oolland.[1] Na düsse Tied is de Hornbörger Pannkoken dör annere Soorten verdrängt worrn un hett vondaag in’n groten Aavtbo keen Bedüden mehr.

Egenschoppen[ännern | Bornkood ännern]

De Frucht is 7 bet 10 cm in’n Dörmeter un hett faken en unregelmäßige Form. De Schell is glatt bet licht ruug un vör allen gröön. Later warrt se licht geel mit rode Deckfarv. Dat Fruchtfleesch is eerst fast un suur. Wenn de Appel en Tied lagert, denn smeckt he miller. De Appel gellt as goden Backappel, to’n Bispeel för Appelkoken oder Pannkoken. dorvon kummt ok de Naam.

Riep is de Appel in’n Oktober. Opbest to eten is he von November bet März.[1] De Hornbörger Pannkoken is robust un wasst düchtig. He wasst good op Moor-Standöörd. De Appel is triploid, dat bedüüdt, he gifft keen Pollen. De Appel verlangt, dat Bodden un Luft önnig fucht ween mööt. Op dröge Standöörd wasst de Appel nich good un liddt ünner Mehldau.

Footnoten[ännern | Bornkood ännern]

  1. a b c d Beschreibung „Horneburger Pfannkuchen“, Norddeutsche Apfeltage (PDF; 93,9 kB)

Weblenken[ännern | Bornkood ännern]

Hornbörger Pannkoken. Mehr Biller, Videos oder Audiodateien to’t Thema gifft dat bi Wikimedia Commons.