Hinnerk Willem Kopp
Hinnerk Willem Kopp (* 6. Mai 1893 in Neenkarken; † 21. Dezember 1961 in Chöttingen) weer de eerste Ministerpräsident vun Neddersassen.
He güng in Neenkarken na de Volksschool, de hüüt na em nöömt is, besöch dat Realprogymnasium in Otterndörp un denn de Högere Staatsschool in Cuxhoben. Mit sössteihn güng he na Amerika. Na negen Maanden in New Jersey in de he as Bott un Kellner arbeiden dee, keem he aver wedder trüch. He güng nu na’t Andreanum in Hilmssen, wo he sien Abitur möök. Denn güng he 1913 op’n Buurnhoff in’e Lehr. He studeer later aver tosätzlich noch Juristeree un Staatswetenschoppen in Marborg un Göttingen. Na sien Studium weer Kopp 1919/1920 de persönliche Referent vun den Rieksbinnenminister Eduard David. Vun 1919 an weer he Maat vun de SPD. 1928 hett he dat Amt vun en Landraad in den Kreis Hadeln kregen, dat he bet 1932 harr. Een Johr lang hett he denn en Posten bi’n Regerungsbezirk Oppeln hatt. In de Tiet 1933 bet 1945 weer he en sülvstännigen Koopmann un Buer, denn bi de Natschonalsozialisten kunn he in de Politik nix mehr warrn. As de Krieg üm weer, wörr he den 1. Mai 1945 Regerungspräsident vun de Provinz Hannober. Den 18. September 1945 hebbt se em to’n Oberpräsident vun Hannober maakt un den 23. August 1946 to’n Ministerpräsident vun Hannober. As dat rut weer, dat se en nee Land Neddersassen billen wullen, wörr he de eerste Ministerpräsident dorvun, wat he bet to’n 26. Mai 1955 blieven dee. In de Tiet vun Juni 1947 bet Juni 1948 weer he ok Binnenminster vun Neddersassen. 1955 keem Hinnerk Hellweeg vun de Düütsche Partei an de Macht in Neddersassen. Kopp möök nu mit de Politik Sluss un weer Opsichtsraat bi de Hüttenwarken Paane. Doch al 1957 güng he wedder trüch in de Politik un weer vun November 1957 bet Mai 1959 wedder Binnenminister. Denn kunn Kopp dat Ministerpräsidentenamt nochmal trüchwinnen un weer vun Mai 1959 bet Dezember 1961 wedder Ministerpräsident.
1961 is Kopp doodbleven un is op den Stadtkarkhoff Stöcken in Hannober begraven worrn.
In sien Heimatdörp Neenkarken is siet den 24. Juni 1959 de Hinnerk-Willem-Kopp-School na em nöömt. Ok Münner siet 1964, Hannober un Paane harrn Scholen na em nöömt (Hinnerk-Willem-Kopp-School). Nadem 2014 dör en Studie rutkamen is, dat sik Kopp in de Tied von’n Natschonalsozialismus Geld toschoostert hett, dat von enteignete Juden keem, hebbt en poor von de Scholen jemehr Naams ännert.
Literatur
[ännern | Bornkood ännern]- Werner Tiet: Hinnerk Willem Kopp. Hottendorff, Oterndörp 1966
Weblinks
[ännern | Bornkood ännern]
Hinnerk Willem Kopp. Mehr Biller, Videos oder Audiodateien to’t Thema gifft dat bi Wikimedia Commons.