Hexameter

Vun Wikipedia

De Hexameter is en Versform, de toeerst in dat ole Grekenland för Epen so as de Ilias un Odyssee bruukt worrn is. De Hexameter besteiht ut söss Daktylen (– υ υ). De letzte dorvun is nich kumplett. För en Daktylus kann ok en Spondeus (– –) stahn.

   _       _       _       _              _
- υ υ | - υ υ | - υ υ | - υ υ | - υ υ | - υ

Blangen Homer in sien Ilias un Odyssee hett för dat Ooltgreeksche ok Hesiod in sien Theogonia un Érga kaì hêmérai em bruukt.[1] Mit Quintus Ennius is he ok op Latien begäng worrn. Vergil hett sien Aeneis in Hexameter schreven un Ovid sien Metamorphosen. Na de Antike is de Hexameter aver eerst wedder vun Friedrich Gottlieb Klopstock bruukt worrn, as sik dat Avendland wedder op de klassischen Spraken Greeksch un Latiensch besinnen dee. Dat Epos Messias weer Klopstock sien eerst Wark in Hexameter. Besünners in de düütsche Spraak is de Hexameter denn wedder in Mood kamen. Dat güng nu nich mehr op lange un korte Sülven, de Düütschen hebbt betoonte un unbetoonte Sülven bruukt. Bi annere Spraken geiht de Hexameter nich so fein. Bi Franzöösch un Spaansch sünd dDe Wöör faken op’t Enn betoont, wat mit’n Hexameter nich tohoopgeiht. Dorvun gifft dat meist keen Hexameter-Riemwark in disse Spraken. Op Engelsch geiht de Hexameter ok nich so good, aver beter as op Franzöösch un dat gifft tominnst welk Warken, de em bruukt, to’n Bispeel Henry Wordsworth Longfellow sien Evangeline.

Op Plattdüütsch hett sik to’n Bispeel Eduard Smelzkop in sien De freuhjahrsdag an’n Hexameter versöcht. Friedrich Hebbel sien Mutter und Kind hett Friedrich Pauly as Moder un Kind na’t Plattdüütsche översett un den Hexameter bibehollen.

References[ännern | Bornkood ännern]

  1. Hexameter, Encyclopaedia Britannica.