Giro d’Italia

Giro2007: Teelankunft in Mailand

De Giro d’Italia gellt as dat tweetwichtigst Radsport-Deelstreckenrennen vun de Welt – nah der Tour de France un vör de Vuelta a España. Dat wurrd för Mannlüüd man ok siet 1988 för Fruen (as Giro d’Italia Femminile) utdragen.

Historie

De Herutgever vun de Gazzetta dello Sport Eugenio Camillo Costamagna un de Redakteure Armando Cougnet un Tullo Morgagni weern, anreegt dör de Tour de France, de Initiatoren vun den eersten Giro. Betallt wurr dat mit Hülp vun den italieenschen Radsportverband, den Corriere della Sera un verscheeden Firmensponsoren.

Siet 1909 wurrd de Giro alljährlich – mit Utnahm vun de Tiet vun den Eersten un Tweeten Weltkrieg – in dree Week in‘ Mai utdragen un führt dorbi in wesselnd Streckenführung quer dör Italien un dat nahe Utland. De eerste Giro d’Italia wurr an‘ 13. Mai 1909 start. De führ in acht Deelstrecken vun Mailand bit Neapel un up anner Route weer torüch nah Mailand, wo an‘ 30. Mai Teelinloop weer. Gesamtsieger wurr Luigi Ganna.

2005 wurr dat Rennen vun de Mannlüüd in de nee schaffen UCI Pro Tour upnommen. De Rundfohrt wurr aber vunwegen den Druck vun de Veranstalter to de Saison 2008 weer ut de Rennserie rutnommen. Siet 2011 hörrt dat Rennen to de Nahfolgeserie UCI World Tour.

Charakteristik

De Kurs sett sück regelmatig na de landschaplich Gegebenheiten vun Italien ut Flaaketappen, de de Sprinter favoriseeren, middelswoor Deelstrecken, de sück för Utrietergruppen eignen, un Hoochgebirgsetappen, op de de Rundfohrt faken entscheedt wurrd, tosommen. Buterdem finnen meest twee Eenkelltietfohrten statt.

Palmarès

Den Rekord vun jewiels fiev Gesamtsiegen bi den Giro hollen dree Fohrers: De Italiener Alfredo Binda un Fausto Coppi wunnen tüschen 1925 un 1933 bzw. tüschen 1940 un 1953, de belgisch „Kannibale“ Eddy Merckx wunn tüschen 1968 un 1974.

Siegerlist

2021 Egan Bernal 2020 Tao Geoghegan Hart 2019 Richard Carapaz 2018 Christopher Froome 2017 Tom Dumoulin 2016 Vincenzo Nibali 2015 Alberto Contador 2014 Nairo Quintana 2013 Vincenzo Nibali 2012 Ryder Hesjedal 2011 Michele Scarponi 2010 Ivan Basso 2009 Denis Menschow 2008 Alberto Contador 2007 Danilo Di Luca 2006 Ivan Basso 2005 Paolo Savoldelli 2004 Damiano Cunego 2003 Gilberto Simoni 2002 Paolo Savoldelli 2001 Gilberto Simoni 2000 Stefano Garzelli 1999 Ivan Gotti 1998 Marco Pantani 1997 Ivan Gotti 1996 Pawel Tonkow 1995 Tony Rominger 1994 Jewgeni Berzin 1993 Miguel Indurain 1992 Miguel Indurain 1991 Franco Chioccioli 1990 Gianni Bugno 1989 Laurent Fignon 1988 Andrew Hampsten 1987 Stephen Roche 1986 Roberto Visentini

1985 Bernard Hinault 1984 Francesco Moser 1983 Giuseppe Saronni 1982 Bernard Hinault 1981 Giovanni Battaglin 1980 Bernard Hinault 1979 Giuseppe Saronni 1978 Johan De Muynck 1977 Michel Pollentier 1976 Felice Gimondi 1975 Fausto Bertoglio 1974 Eddy Merckx 1973 Eddy Merckx 1972 Eddy Merckx 1971 Gösta Petterson 1970 Eddy Merckx 1969 Felice Gimondi 1968 Eddy Merckx 1967 Felice Gimondi 1966 Gianni Motta 1965 Vittorio Adorni 1964 Jacques Anquetil 1963 Franco Balmamion 1962 Franco Balmamion 1961 Arnaldo Pambianco 1960 Jacques Anquetil 1959 Charly Gaul 1958 Ercole Bandini 1957 Gastone Nencini 1956 Charly Gaul 1955 Fiorenzo Magni 1954 Carlo Clerici 1953 Fausto Coppi 1952 Fausto Coppi 1951 Fiorenzo Magni

1950 Hugo Koblet 1949 Fausto Coppi 1948 Fiorenzo Magni 1947 Fausto Coppi 1946 Gino Bartali 1941-1945 nich utdragen 1940 Fausto Coppi 1939 Giovanni Valetti 1938 Giovanni Valetti 1937 Gino Bartali 1936 Gino Bartali 1935 Vasco Bergamaschi 1934 Learco Guerra 1933 Alfredo Binda 1932 Antonio Pesenti 1931 Francesco Camusso 1930 Luigi Marchisio 1929 Alfredo Binda 1928 Alfredo Binda 1927 Alfredo Binda 1926 Giovanni Brunero 1925 Alfredo Binda 1924 Giuseppe Enrici 1923 Costante Girardengo 1922 Giovanni Brunero 1921 Giovanni Brunero 1920 Gaetano Belloni 1919 Costante Girardengo 1915-1918 nich utdragen 1914 Alfonso Calzolari 1913 Carlo Oriani 1912 Atala (blots Teamwertung) 1911 Carlo Galetti 1910 Carlo Galetti 1909 Luigi Ganna

De meest Etappensiege hett Mario Cipollini uptowiesen, de 2003 to’n 42. mal en Deelstreck vun den Giro winnen kunn un dormit den Rekord vun Alfredo Binda (41 Etappensiege) överdrapen hett. Negen Mal wunnen bi een Giro hett 2004 Alessandro Petacchi schafft un dormit en Nahkriegsrekord upstellt.

Wertungen

Rosa Trikot vun den Führenden in de Gesamtwertung

Root Trikot vun den Führenden in de Punktewertung

Gröön Trikot vun den Führenden in de Bargwertung

Witt Trikot vun den Führenden in de Nachwuchswertung

Blau Trikot vun den Führenden in de Kombinaschoonswertung (histoorsch)

Swaart Trikot för den Letzten (historsch)

De Wertungen folgen dat Reglement vun de Union Cycliste Internationale för Etappenrennen un dat Sonnerreglement vun den Veranstalter RCS MediaGroup.

Gesamtwertung

De Föhrende vun den Gesamteenzelwertung drocht dat Maglia Rosa – dat italieensch Pendant to dat Geel Trikot vun de Tour de France. De Farvgeven lehnt sück an dat blassrosafarbene Papier vun de Gazzetta dello Sport, den Veranstalter vun den Giro, an.

Bi dat Mannschapstietfohren wurrd de Tiet vun den fievten Fohrer för dat Team wert un för de eerst fiev Fohrers vun dat Team in de Gesamtwertung övernommen. De anner Fohrers vun dat Team wurrd mit hör real Tiet wert.

Up all Deelstrecken, buten de Tietfohretappen Kriegen de Etappensieger 20, 12 un 8 Sekunn Tietgoodschriften in de Gesamtwertung; de eersten dree vun de Tüschensprints 6, 4 un 2 Sekunn.

Punktewertung

De Führende vun de Punktewertung kriggt siet 2010 dat Maglia Rossa (root Trikot), bit 2009 dat Maglia Ciclamino (veilchenfarven Trikot). Punkte för dit Klassement kann man bi de Teelankunft un bi en Tüschensprint bi en Deelstreck winnen.

För de eerst 15 Fohrer in‘t Teel vun en Deelstreck wurrd de Punkte as folgt vergeeven: 25, 20, 16, 14, 12, 10, 9, 8, 7, 6, 5, 4, 3, 2, 1

Bi de Tüschensprints sünd för de eersten söss Fohrer 8, 6, 4, 3, 2 un 1 Punkte to halen.

Bi Punktgliekheit is entscheedent:
1. De Antall vun de Deelstreckensiege
2. De Antall vun de wunnen Tüschensprints

Bargwertung

De Führende vun de Bargwertung kriggt dat gröön Trikot (Maglia Verde). Punkte gifft dat up de Tippen vun Bargen bzw. an de hööchst Punkte vun Hügeln. Je länger un swoorer so en Anstieg is, desto mehr Punkte gifft dat. An‘ hööchsten Punkt vun den Giro gifft dat meest Punkte. De Wertung nömmt sück „Cima Coppi“ to Ehren vun den ehmalgen Tour de France-Winner Fausto Coppi.

• Cima Coppi: 21, 15, 9, 5, 3 un 2 un 1 Punkte för de eersten söben Fohrers
• 1. Kategorie: 15, 9, 5, 3, 2 un 1 Punkte för de eersten söss Fohrers
• 2. Kategorie: 9, 5, 3, 2 un 1 Punkte för de eersten fiev Fohrers
• 3. Kategorie: 5, 3, 2 un 1 Punkte för de eersten veer Fohrers
• 4. Kategorie: 3, 2 und 1 Punkte för de eersten dree Fohrers

Eenzig düütsch Winner Fabian Wegmann, de 2004 dat gröön Trikot winnen kunn.

Witt Trikot

Dat witt Trikot wurrd mit Ünnerbreken siet 1976 an den besten Nahwuchsfohrer ünner 25 Johren vergeven. De Dräger vun dat witt Trikots wurrd anhand vun dat Gesamtklassements ermiddelt, indem all för de Wertung nich relevanten Fohrers rutstreeken wurrd.

De Wertung "Classifica giovani" wurr tüschen 1995 un 2006 nich utdragen. In de Tüschentiet wurr statt dat Witt Trikot dat Blau Trikot vergeven. 2007 wurr de Wertung un dat Witt Trikot weer inführt.

Eerst Winner vun dat Witt Trikot in de Historie vun de Rundfohrt weer 1976 de Italiener Alfio Vandi. Eerst Dräger siet de Wedderinführen 2007 weer sien Landsmann Enrico Gasparotto. Da Witt Trikot wunn de Luxemburger Andy Schleck.

Anner Wertungen

Anner Eenkelwertungen sünd en Wertung för de Tüschensprints Traguardi Volanti, de Premio "Azzurri d´Italia" en wiedere Punktwertung, de blots de eerst dree vun en Deelstreck bekiekt un de Premio Fuga, för de de Fluchtkilometer tosommentellt wurrn. Denn gifft dat noch den Premio della Combativita (Kamppries), de entgegen sien Naam un anners as de Root Rüggnummer bi de Tour de France en Kombinatschoonswertung is, bi de de eerst söss Fohrers vun en Deelstreck, de eersten fiev vun en Tüschensprint, de eerst veer up de Cima Coppi un en Bargwertung vun de 1. Kategorie, de eersten dree vun en Bargwertung vun de 2. Kategorie un de beide ersten vun en Bargwertung vun de 3. Kategorie Punkte kriegen.

Buterdem gifft dat neben de Gesamtmannschapswertung Fast Team, för de de Tieden vun de eerst dree Fohrers vun en Team je Deelstreck tosommentellt wurrn, ok en Teampunktwertung Super Team, in de je Deelstreck för de Eenzelplatzeeren vun de best 20 Fohrers tüschen 20 un een Punkt vergeven wurrn un noch en Premio Fair Play för dat Teams mit de minnsten utspraken Strafen.

Nich mehr dörführt Wertungen

Blau Trikot

Dat blau Trikot wurr bit insluutend 2005 för den Führenden vun de Intergiro-Wertung vergeven un 2006 as dat Wertungstrikot vun de Kombinatschoonswertung.

• Intergiro-Wertung: So wat up de Hälft vun jeder Deelstreck wurr de Wertung für den Intergiro nommen. toeerst wurr de Tiet faststellt, de jeder Fohrer bitt o den Intergiro bruukt hett. In de letzt Johren ergeev sück de Wertung in‘ Wesentlichen ut de Platzeeren bi den Intergiro un blots to en lütten Deel ut de erzielt Tieden. In dat letzt Johr vun dat Utdragen weer de Intergirowertung en schiere Punktwertung.

• Kombinatschoonswertung: Di Kombinatschoonswertung sett sück tosommen ut de Ergebnissen vun dat Gesamt-, dat Punkte- un dat Bargklassement, as ok Sprintwertung "110 Gazzetta". De 15 eersten Fohrers vun jeder vun de veer Wertungen kriegen nah jeder Deelstreck Punkte. De eerste vun en Wertung kriggt 15 Punkte, de 15. kriggt noch een Punkt. Also kann man pro Deelstreek maximal 60 Punkte kriegen. De nah de Additschoon vun all Deelstrecken de meesten Punkte sammelt hett, is de Winner vun de Kombinatschoonswertung. De bither eenzig Sieger vun disse Wertung is Paolo Savoldelli.

Swaart Trikot

Tüschen 1946 un 1951 wurr bi den Giro dat „Swaart Trikot“ an den Letztplatzeerten vergeven. Wiel sück aber de „Kamp“ um dat Trikot to en skurrilen Wettbewarv entwickeln dee, wurr dat weer afschafft.

Weblenken

Giro d’Italia. Mehr Biller, Videos oder Audiodateien to’t Thema gifft dat bi Wikimedia Commons.

• Offiziell Websteed (italieensch/engelsch)
• cycling4fans.de to de Historie vun den Giro
• De Giro d´Italia bi raisport mit Videos to de eenzeln Deelstrecken (italieensch)
• Giro d’Italia bi steephill.tv (engelsch)