Stephen Roche

Vun Wikipedia
Zur Navigation springen Zur Suche springen
Stephen Roche, 2017

Stephen Roche (* 28. November 1959 in Dublin) is en ehmalger irischer Radrennfohrer. He hett 1987 as tweet Fohrer överhoopt (neben Eddy Merckx, 1974) in een Johr de Tour de France, den Giro d’Italia un de Straaten-Weltmeisterschap wunnen un weer de eerste un bit jetzt de eenzige Radfohrer ut Irland, de de Tour de France wunnen hett. Bi de Olympisch Sömmerspelen 1980 bleev he ahn Medaille.

Loopbahn[ännern | Bornkood ännern]

Roche sien Profikarriere fung 1980 an un in dat Folgejohr wunn he all dat Deelstreckenrennen Paris–Nizza. 1985 reck he sien eersten Deelstreckensieg bi de Tour de France un keem in de Gesamtwertung up den veerten Platz.

1987 kunn Roche – nahdem Bernard Hinault torüchtreeden weer un Greg LeMond en Jagdunfall harr – sien Mögelkeiten umsetten.

Bi den Giro d’Italia 1987 is dat Team Carrera mit en Düppelspitze antreeden. De Winner van dat Johr 1986, Roberto Visentini wull sien Triumph wedderhaalen un harr to sien Ünnerstütten söben Italiener mit in dat Team. De tweete Topfohrer, Stephen Roche, weer somit meest up sück alleen stellt, blots de Belgier Eddy Schepers hull to hüm. Den beteren Start harr aber Visentini un wunn den 4 Kilometer langen Prolog in San Remo, Roche weer fiev Sekunn torüch. Visentini droog dat Rosa Trikot van den Gesamtführenden aber blots kört, denn hett hüm dat Erik Breukink weer afnommen, aber ok de harr dat nich lang. Nahdem Stephen Roche all dat körte Tietfohren van Poggio nah San Remo wunnen harr – Visentini leeg nu twee Sekunn achter den Iren – drüff he nu nah de veerte Deelstreck dat Rosa Trikot draagen. Carrera wunn mit meest een Minüüt Vörsprung dat Team-Tietfohren un laatstens jetzt weer dat klor, dat Roche un Visentini sück blots noch sülvst slahn kunnen.

In dat Team hull sück aber so goot as nümms an de vör de Rundfohrt utgeeven Stallregie, den Besten van dat eegen Team to ünnerstütten – egal well dat weer. De Italiener bi Carrera sünd blots för Visentini fohren. Ofschons Roche dat Rosa Trikot droog, weer he för Claudio Chiappucci un Co. nu blots en Övergangsführender. Se hemm up de Stünn van Visentini henarbeit. De weer up de 13. Deelstreck, en Tietfohren över 46 Kilometer van Rimini nah San Marino. Visentini hett för dat swoor Profil woll över 90 Sekunn mehr bruukt as de Winner, aber Roche de Tietfohrspezialist hett noch völ mehr Tiet bruukt. He weer dree Daag vördem to Fall kommen un ok düchtig nervös, as he in sien Book „My Ride to Victory“ later schrieven dee. Nu leeg Visentini twee Minüüt un 42 Sekunn in Front un de Italiener hemm docht, dat dat Rennen nu loopen weer. Roche würr nu för Visentini arbeiten un de denn för Roche bi de Tour de France fohren – so de offizielle Verluutboren. Roche wuss aber, dat Visentini för Juli all Urlaub bucht harr, also to de Tour de France-Tiet. Dat weer wenig wohrschienlich, dat Visentini för hüm arbeiten würr. Also hett he sück mit Schepers afsnackt un de beid hemm wieder up den Sieg bi den Giro henarbeit.

Twee Daag later dreih sück dat Blatt weer. Dat weer en lang Deelstreck (224 Kilometer), de ok noch mit en Anstieg to Enn‘ gung, en Angreep up Rosa weer dorum ehrder nich to verwachten. Visentini weer nich dorup vörbereit, wat passeeren dee. All nah den eersten Anstieg greep Roche tosommen mit twee anner Fohrern an. Teamchef Boifava weer düchtig düll un is to Roche fohren un hett hüm Befehl geeven to stoppen, aber de fohr so wieder. Boifava hett dat gesamte Restteam upfordert, Roche to verfolgen un sülvst de Mechaniker van Roche un sien Vertroote Patrick Valcke sull hüm to dat Inlenken bringen – wat Valcke nich dee.

Dat Team Carrera hett sück bi de Verfolgung förmlich upreeven, aber gemeensam mit dat italieensch Team Atala klapp dat doch. Roche wurr inhaalt, weer aber so stark, dat he bi de folgen Angreep van Phil Anderson (Panasonic) un Jean-Francois Bernard (Toshiba) mitgahn kunn. Eddy Schepers, de eenzige Fohrer van Carrera, de sück tovör nich an de Verfolgung bedeeligt harr, hulp nu Roche, wiels Visentini up sück alleen stellt weer un ok noch en Hungerast kreeg, nichts totosetten harr un Tiet verlor. Roche kreeg an’t Enn dat Rosa Trikot un geev dat bit an dat Enn van den Giro in Mailand ok nicht weer af.

De letzt söben Deelstrecken weern för Roche aber nich kommodig. Roche harr den italieenschen Sieger van dat Vörjohr un sien Mannschapskollegen un Publikumsleevsten attackeert. De Tifosi hemm hüm beschimpt un bedroht un wullen hüm ok woll van’t Rad haalen, aber Schepers, Phil Anderson un Robert Millar hemm hüm seker dör de Deelstreck brocht. An dat Enn‘ van den Giro geev Visentini up, Roche leet Millar bi de vörletzt Deelstreck noch winnen. Dat Team hett hüm denn doch noch ünnerstütt un Roche hett denn dat letzte Tiefohren över 32 Kilometer wunnen.

An’n Enn wunn Roche den Giro mit meest veer Minüüt Vörsprung vör Millar un nehm sien överragend Form mit in de Tour de France. Ok bi de Tour hemm hüm sien Carrera-Kollegen in de Bargen nich ünbnerstütt, mit Utnahm van Schepers. De Führung wessel ständig, de Tour bleev bit toletzt spannend. An’n Enn‘ van de Rundfohrt harr de up den darten Platz inkommen Jean-François Bernard blots goot twee Minüüt Rückstand. Tüschen den Sieger Roche un den Tweetplatzeerten Pedro Delgado leegen sogor blots 40 Sekunn - de dartknappste Utgang van de Rundfohrt överhoopt. Roche hett den Spanier ok eerst in dat letzte Tietfohren överhaalt.

To de beid Rundfohrt-Siege keem in dat Johr denn ok noch de Weltmeesterschap in Villach in Öösterriek dorto. Eegentlich wull Roche dor sien Mannschapskollegen Sean Kelly ünnerstütten, aber de keem blots up den fievten Platz rin. Roche wurr nee Weltmeester vör Moreno Argentin, Juan Fernández Martín, den Düütschen Rolf Gölz und Kelly.

1993 hett Roche sien Loopbahn afslooten. Sien Söhn Nicolas Roche (* 1984) as ok sien Neffe Daniel Martin (* 1986) sünd ebenfalls spoodriek Radrennfohrer.

Wat he schafft hett[ännern | Bornkood ännern]

Weblinks[ännern | Bornkood ännern]

Commons-logo.svg Stephen Roche. Mehr Biller, Videos oder Audiodateien to’t Thema gifft dat bi Wikimedia Commons.