Alfredo Binda

Alfredo Binda (* 11. August 1902 in Cittiglio, Italien; † 1. Januar 1986 ok dor) weer en italieensch Radrennfohrer. He weer de spoodoriekste Radprofi vun de 1920er Johren un hett ünner annern fievmal den Giro d’Italia un dree Straaten-WM-Titel wunnen.

Alfredo Binda is in dat franzöösch Nizza upwussen un fung 1922 sien Profikarriere an. Nah eenig fröh Erfolgen harr Binda 1925 sien Dörbröök, as he tonächst den Giro d’Italia, neben de Tour de France dat swoorste Deelstreckenrennen vun de Welt, un dornah de klassische Lombardei-Rundfohrt för sück entscheeden kunn. In de folgen Johren hett he disse beid Rennen domineert. Fiev Mal wunn he den Giro (1925, 1927 bit 1929 un 1993) un hollt dormit tosommen mit Fausto Coppi un Eddy Merckx den Rekord. Doröver herut kunn Binda 41 Deelstreckensiege bi den Giro fiern – ebenfalls en Rekord, de eerst 2003 vun den Sprinter Mario Cipollini överboden wurr. 1927 wunn he twalf vun 15 Deelstrecken, 1929 wunn he 8 Dagserfolge nahnanner. Bi de Tour de France harr he nicht so den Spood, bi sien eenzig Deelnahm 1930 wunn he aber doch twee Deelstrecken. Up Drängen vun de Veranstalter is Binda 1930 nich to'n Giro antreden, wiel de bang weern, dat he dör weer en Sieg, dat Tokiekerinteresse minnern würr. För sien Affsehn wurr hüm de vull Siegprämie vun dat Rennen utbetallt.

Binda kunn dreemal de Straatenrad-Weltmeesterschap winnen (1927, 1930 un 1932), dorünner ok de eerste Straatenrad-Weltmeesterschap överhoopt, 1927 up den Nürburgring. He hollt dormit ok hier den Rekord, tosommen mit Rik Van Steenbergen, Eddy Merckx un Óscar Freire. Neben veer Erfolge bi de Lombardei-Rundfohrt (1925–27, 1931) wunn he ok noch tweemal de Fröhjohrs-Klassiker Mailand–Sanremo (1929, 1931).

In de 1970er un 1980er Johren wurrn ünner de Naam „Alfredo Binda“ Footreems ut Leer för Rennpedale verdreeven.

In Binda sien Heimatstadt Cittiglio wurrd siet 1974 en Straatenrennen för Fruen, „Trofeo Binda“ nömmt, utricht, dat siet 2008 Deel vun den Fruen-Weltcup is.

Weblenken

• Palmarès – List vun de Siege un Platzeeren
• Alfredo Binda in de Datenbank vun Radsportseiten.net
• DNB-Katalog