Georg Friedrich Prinz von Preußen

Vun Wikipedia
Zur Navigation springen Zur Suche springen
Georg Friedrich Prinz von Preußen (2014)

Georg Friedrich Ferdinand Prinz von Preußen (* 10. Juni 1976 in Bremen) is en düütsch Bedriefswirt un siet 1994 de Baas vun dat Huus Hohenzollern.

Biographie[ännern | Bornkood ännern]

Georg Friedrich Prinz von Preußen un Sophie Prinzessin von Preußen in’n Juli 2017 vör de Marktkirche vun Hannober as Hochtietsgäst vun Ekaterina Malysheva un Ernst August Prinz von Hannover

Prinz von Preußen is de Sohn vun Louis Ferninand Prinz von Preußen Jr. (1944–1977) un Donata, born Gräfin zu Castell-Rüdenhausen (1950–2015) as ok Ururgrootkind vun’n letzten Düütschen Kaiser un König vun Preußen Willelm II. (1859–1941; reg. 1888–1918). He hett en jünger Süster, Cornelie-Cécile Prinzessin von Preußen (* 1978).

Kort na sienen eersten Bortsdag bleev sien Vader doot in enen militärschen Unfall. Prinz von Preußen leev as Gör un jungen Mann mit sien Süster in Hu’e bi Bremen un güng to’n Gymnasium in Bremen und later to en in Ollnborg. He maak dat Abitur an’t Glenalmond College bi Perth in Schottland. Na twee Johren bi’t Militär as Gebirgsjäger in Mittenwald studeer he Bedriefswertschapslehre an de Technische Universität Bergakademie Freiberg in Sassen.

Na sien Grootvadder Louis Ferdinand Sr. sienen Dod an’n 25. September 1994 wöör he vun wegen de Regeln vun’t Huus Hohenzollern ehr Baas. As de Böverst in de Familie föhrt he de Familiensaak un repräsenteert de Hohenzollern. Düütsche Monachistschen un Monarchisten seht em as Arv op den preußschen un düütschen Throon, Prinz von Preußen seggt aver sülvst, dat he op keen politsche Rull daal wull.[1] He seht sien Opgaav, as en Ünnernehmer, de dat Leit över enen olen Familienbedrief hett.

Prinz von Preußen leevt in Potsdam un beraat Ünnernehmen. He wöör in’n Mai 2011 to’n Major in de Reserve befördert.[2]

Familie[ännern | Bornkood ännern]

Prinz von Preußen heirat an’n 25. August 2011 Sophie Prinzessin von Isenburg ut Birstein (* 7. März 1978) vör’t Standsamt in’t Potsdamer Raathuus. An’n 27. August 2011 weer de Fier mit enen ökumeenschen Gottesdeenst in der Friedenskirche to Potsdam utricht warrn. De Rundfunk Berlin-Brandenborg överdreeg den Gottesdeenst direkt in en dreestündig Feernsehsendung, vun Rolf Seelmann-Eggebert und Tatjana Jury moderiert. 160.000 Tokiekerschen un Tokiekers verfolgen dat Spektakel.[3]

An’n 20. Januar 2013 kamen in Bremen de Tweeschens Carl Friedrich un Louis Ferdinand op de Welt. De Dochter Emma Marie weer an’n 2. April 2015 in Bremen boren, Söhn Heinrich Albert Johann Georg an’n 17. November 2016.

Deenst an de Sellschap[ännern | Bornkood ännern]

Prinz von Preußen is Vörstandsmaat vun de Prinzessin-Kira-von-Preussen-Stiftung, de ehr Baas sien Fro is.[4] Butendem is he Vörstandsmaat för de Ehr vun’n Verband vun de Düütsch-Amerikaanschen Clubs[5] un siet 2014 Liddmaat in’n Stiftungsrat vun de Düütsche Stiftung Denkmaalschutz.[6] He will dat Berliner Hohenzollernmuseum nee maken, dat in’t Slott Monbijou weer. Dat Slott wöör 1959 afritten, wiel dat in’n Tweten Weltkrieg leeg wat afkregen harr. Dor weern ’n Barg Museumsfachlüüd gegen. Vundaag schall dat Hohenzollernmuseum in’n ööstlichen Knobelsdorff-Flünk vun’t Slott Charlottenborg en ne’e Steed finnen.

Lenken[ännern | Bornkood ännern]

Nawiesen[ännern | Bornkood ännern]

  1. Ich bruuk keen Schlott. (dt.)
  2. Georg Friedrich is nu Reservemajor. (dt.)
  3. presseportal.de (dt.)
  4. Prinzessin-Kira-Stiftung. In: preussen.de. Opropen: 08.02.2018 (dt.)
  5. vdac.de (dt.)
  6. Gremien vun de Düütschen Stiftung Denkmaalschutz. (dt.)