Fruchtflegen

Vun Wikipedia
Zur Navigation springen Zur Suche springen
Fruchtflegen
Swattbuuk-Fruchtflege (Drosophila melanogaster)
Systematik
Domään: Eukaryota

ahn Rang: Veelzellers (Metazoa)
Afdeel: Geweevdeerter (Eumetazoa)
Ünnerafdeel: Tweesiedendeerter (Bilateria)

ahn Rang: Ehrdermünner (Protostomia)
Böverstamm: Huututtreckers (Ecdysozoa)
Stamm: Liddfööt (Arthopoda)
Ünnerstamm: Tracheendeerter (Tracheata)
Böverklass: Sessfööt (Hexapoda)
Klass: Insekten (Insecta)
Böverornen: Neeflunken (Neoptera)
Ornen: Tweeflunken (Diptera)
Ünnerornen: Flegen (Brachycera)
Familie: Fruchtflegen (Drosophilidae)
Wetenschoplich Naam
Drosophilidae
Rondani, 1856

De Fruchtflegen (Drosophilidae) sünd en Familie mank de Flegen (Brachycera). Se weert dor to de Tweeflunken mit torekent. Bi de Fruchtflegen hannelt sik dat um lüttje Flegen vun een bit hen to sess Millimeters Längde. Meist sünd se bi 2 mms groot. Vorkamen doot se meist allerwegens: In fuchtige Loofwolden, an’n Wooldrand un ok bi de Minschen ehre Hüser. Antrocken weert se vun fulige Frücht un Reste vun Drunks in opene Buddels. Dor nehrt se sik sunnerlich vun Substanzen bi, de riesen doot. Weltwiet sünd mehr as 3.000 Aarden bekannt. Dor leevt bi 50 vun in Düütschland. Dat gifft Wildaarden in Hölter un Strüker un Kulturfolgers, de hefft sik anpasst an dat minschliche Leven un leevt sunnerlich up’n Kumpost un allerwegens dor, wo Früchte lagert oder Fruchtssapp riest. Kulturfolgers sünd de Aarden Drosophila melanogaster, Sophophora simulans, Drosophila funebris, Drosophila busckii, Drosophila immigrans, Drosophila hydei un Drosophila repleta. Dat gifft ok de wecken Wildaarden, de leevt ok in Goorns, hen un wenn ok mol in Hüser, as Sophophora subobscura un Drosophila limbata. Annersrum sünd de wecken Kulturfolgers ok buten vun Siedlungen antodrepen, man up Duer könnt se dor keen Populatschoon upboen. Allerwegens bekannt is de Aart Drosophila melanogaster (Swattbuuk-Fruchtflege). Se warrt twee bit dree Millimeters lang, is geelbruun vun’e Farv, hett swatte Ringe up’t Achterlief un rode Ogen. In dat 20. Johrhunnert is se en Standardobjekt wurrn bi Unnersöken to de Genetik

Entwicklung und Larvenstadien[ännern | Bornkood ännern]

Drosophila-Ei
Chymomyza bi de Paarung (Video, 2m 56s)

De Seken vun de Fruchtflegen leggt bit hen to 400 Eier in riesige Planten oder annere Stoffe af, de later vun de Budden freten weern könnt.

Twee Phasen in’t Leven vun de Budden, dat Koppenne is unnen
Immenpoppen mit Befall vun Fruchtflegenbudden
Fruchtlegenbudden un Kokons bi Muerimmen, vun dichtbi bekeken.

De Budden, de dor utkrupen doot, loopt as annere Flegenbudden dree Phasen in ehr Buddenleven dör. De meisten Budden leevt vun Plantenaffall un fulige Früchte, sunnerlich freet se de Mikroorganissen, de de Früchte rotten laat, u.a. Gest un Bakterien. Annere freet Planten un leevt as Mineerers in Stengels un Blöder. Dor höört Scaptomyza flava mit to. Wenn de in Masse an Kulturplanten vorkamen doot, könnt se lästig weern, sunnerlich an Krüüzblöten. Noch annere wasst in Swämme (u.a. Drosophila transversa) un de wecken, as Acletoxenus formosus freet as Rövers Insekten, de an Planten suugt. Cacoxenus indagator-Budden leevt in de Nester vun solitäre Immen un freet de ehren Bestand an Nektar un Pollen. Faken gifft dat mehr Generatschonen vun Fruchtflegen in een Johr. De Tied vun dat Ei bit hen to en adulte Flege duert vun 7 bit hen to mehr as 60 Dage. Dat hangt vun de Aart af, um de dat geiht, un ok vun de Umwelt un dat ganze Umto.

Systematik[ännern | Bornkood ännern]

Fruchtflege up en Blöte

De Familie Drosophilidae warrt updeelt in twee Unnerfamilien, Steganinae und Drosophilinae.

To de Steganinae höört düsse Geslechter to:

Stegana furta socht Freten. (Video, 2m 55s)

To de Drosophilinae höört düsse Geslechter to (mit utwählte Aarden dormank):

Fossile Belege[ännern | Bornkood ännern]

Fossile Fundstücke ut düsse Familie sünd bannig roor un meist bloß ut Barnsteen ut dat Tertiär bekannt. Dat gifft avers ok Fruchtflegen in Barnsteen ut dat Baltikum ut dat Eozän un ut Barnsteen ut de Dominikaansche Republik ut en beten latere Tied. Dor sünd ok twee Fruchtflegen bi in dat Kattengold inslaten wurrn, dor seten Mieten un Fadenwörmer as Parasiten an.[1][2]

Literatur[ännern | Bornkood ännern]

  • G. Bächli, H. Burla: Insecta Helvetica 7: Diptera – Drosophilidae. Schweizerische Entomologische Gesellschaft 1985.
  • Christiane Nüsslein-Volhard, Eric F. Wieschaus: Mutations affecting segment number and polarity in Drosophila. In: Nature 287, 1980, S. 795–801.
  • Martin Brookes: Drosophila. Die Erfolgsgeschichte der Fruchtfliege. Reinbek 2002.

Belege[ännern | Bornkood ännern]

  1. George O. Poinar, Jr.: Life in Amber. 350 S., 147 Fig., 10 Tafeln, Stanford University Press, Stanford (Cal.) 1992. ISBN 0-8047-2001-0
  2. Family DROSOPHILIDAE fossile Diptera

Weblenken[ännern | Bornkood ännern]

Commons-logo.svg Fruchtflegen. Mehr Biller, Videos oder Audiodateien to’t Thema gifft dat bi Wikimedia Commons.