Franz Müntefering

Vun Wikipedia
Franz Müntefering

Franz Müntefering (* 16. Januar 1940 in Naime) is een düütschen Politiker van de SPD. Nadem Kurt Beck as Vörsitter vun de SPD an'n 7. September 2008 Bott geven hett, hett dat Präsidium vun de Partei Müntefering as sien Nafolger beropen.[1]

School un Beroop[ännern | Bornkood ännern]

Van 1946 bit 1954 hett he de Volksschool in Sonnern besöcht und dornah een koopmännisch Lehr as Industriekoopmann afslotten. He hett denn ok in een middelständisch Ünnernehmen as Industriekoopmann arbeit.

Politik[ännern | Bornkood ännern]

1966 is he in de SPD un een Johr later in de IG Metall intreden. Van 1969 bit 1979 weer he Raatslidmaat in de Stadt Sundern, seet aber ok all siet 1975 in de Düütsche Bundstag.

Dor is he denn 1992 aber ok weer utscheden un Landsminister van Noordrhien-Westfalen för Arbeit, Gesundheit un Soziales wurrn. Van 1995 bit 1998 weer he denn Bundsgeschäftsföhrer van de SPD. 1998/99 weer he Bundsminister Verkehr, Bo- un Wohnungswesen. Denn folg dat Amt van de Generalsekretär van de SPD bit Dezember 2002. Dor he sien Lüüd aber nich mehr ganz so achter sük harr - se harrn hüm een Kandidat up een wichtig Positschoon nicht wählt, hett he de Kraam eerst in de Eck schmeten.

Dornah gung dat in de SPD aber ok noch wat drünner und dröver un so hett he de Vörseet van März 2003 bit November 2005 noch Mal övernommen, hett aber weer Bott makt för Matthias Platzeck.

He is denn aber 2005 in de Regeren van Kanzlerin Angela Merkel intreden as Bundsminister för Arbeit un Soziales un ok as Viezkanzler. An'n 21. November 2007 hett he dor Bott geven, vun wegen dat siene Fro swaar krank ween weer un he ehr plegen wull.

In'n laten Summer 2008, dat weer man en paar Weken na den Dood vun siene Fro, is he wedder na de Spitzenpolitik torüchkehrt un hett in'n Wahlkampf vun de SPD in Bayern groten Indruck maakt. Nadem Kurt Beck an'n 7. September 2008 as Vörsitter vun de SPD Bott geven hett, is klaar, dat Müntefering de nee Vörsitter ween schall. De 45-Mann grote Parteivörstand hett em mit bloß ene Gegenstimm an'n 8. September för de Wahl to'n Vörsitter beropen. Düsse Wahl is denn an'n 18. Oktober 2008 op'n Sunnerparteidag vun de SPD afholen wurrn[2] Nadem siene Partei bi de Bundsdagswahl an'n 27. September 2009 meist unnergahn is, hett Müntefering künnig maakt, dat he sik up'n Bundsparteidag vun de SPD vun'n 13. - 15. November 2009 in Dresden nich mehr upstellen laten will as Vörsitter vun de Partei.

Privat[ännern | Bornkood ännern]

Müntefering weer in tweete Eh' verheiraat ween mit Ankepetra Rettich. He hett twee Kinner ut de eerste Eh', de scheedt wurrn is. An'n 31. Juli 2008 is siene Fro in Bonn an Kreeft storven.

Weblenken[ännern | Bornkood ännern]

Op Wikiquote gifft dat Zitaten to, över oder vun „Franz Müntefering“ (hoochdüütsch).

Borns[ännern | Bornkood ännern]

  1. SPD-Pressemeldung v. 7. September 2008
  2. Bremer Nachrichten: Müntefering zurück in Berlin- Nominierter Parteichef überzeugte Parteivorstand, an'n 9. September 2008