Fatal Attraction
| Filmdaten | |
|---|---|
| Plattdüütsch Titel: | — |
| Originaltitel: | Fatal Attraction |
| Düütsch Titel: | Eine verhängnisvolle Affäre |
| Produkschoonsland: | USA |
| Johr vun’t Rutkamen: | 1987 |
| Läng: | 119 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | Adrian Lyne |
| Dreihbook: | James Dearden |
| Produkschoon: | Stanley R. Jaffe Sherry Lansing |
| Musik: | Maurice Jarre |
| Kamera: | Howard Atherton |
| Snitt: | Peter E. Berger Michael Kahn |
| Szenenbild: | Mel Bourne |
| Kledaasch: | Ellen Mirojnick |
| Dorstellers | |
| |
Fatal Attraction (op Platt so veel as „Unheelvull Antrekken“; dt. Titel: Eine verhängnisvolle Affäre) is en USA-amerikaanschen Thriller vun Adrian Lyne ut dat Johr 1987. Michael Douglas un Glen Close hebbt dorin de Hööftrullen speelt.
Inholt
[ännern | Bornkood ännern]Dan Gallagher is’n Afkaat, de mit sien Fro un sien sössjohrige Dochter in New York leevt. Se sünd en glückliche Familie, bit Dan een Dag de smucke Alex Forrest drapen deit un sik mit ehr op en Sietensprung inlaten deit, as sien Fro mit dat Kind op’t Land föhrt, üm ehr Mudder to besöken. Natüürlich hett Dan nix in’n Sinn, as mit Alex ’n beten Sex to hebben, man se hett sik dat anners vörstellt un is op’n duersome Binnen ut.
As Dan ehr düütlich to verstahn gifft, dat he wegen dat beten Spaaß nich sien regelt Leven opgeven müch, fangt Alex an, em jümmer mehr ünner Druck to setten un em ogenschienlich jümmer mehr hebben to wullen. De Anfang is en Sülvstmoordversöök, bi den se sik de Pulsadern apensnieden deit, denn versöcht se em antoropen, later vertellt se em, dat se vun em en Kind kriggt un roovt toletzt sogors sien lütte Dochter. So kummt dat opletzt in de Wahnung vun de Gallaghers to en dramaatsch un actionriek Enn, woneem Alex to’n Sluss vun Dan sien Fro doodschaten warrt.
Kritik
[ännern | Bornkood ännern]De Film vun Adrien Lyne weer sünners in de USA en kommerziellen Spood. Vun de Filmkritiken is he dorgegen teemlich ünnerscheedlich opnahmen worrn. To’n een weer de Film loovt vun wegen dat de Inholt spanend vertellt warrt. Kritische Stimmen geev dat vör allen för dat reakschonäre Bild vun Familien, dat in den Film dorin dorstellt warrt un Anstrengen vun Fronslüüd, de sik to emanzipeeren versöökt, as slecht henstellt. Eenig weer sik de Filmkritik in een Punkt: De Showdown, de stedenwies an Les Diaboliques vun Henri-Georges Clouzot (1954) denken lett, harr geern ok körter utfallen drööft.
Filmpriesen
[ännern | Bornkood ännern]De Film weer för en Reeg vun Filmpriesen nomineert, hett dorvun aver blots veer wunnen:
- 1988: den People’s Choice Award in de Kategorie Leefste dramaatsche Film.
- 1988: de Golden Lienwand.
- 1988: den ASCAP Award in de Kategorie Top Box Office Films för Maurice Jarre.
- 1989: den BAFTA Film Award in de Kategorie Best Filmsnitt för Michael Kahn un Peter E. Berger.
Anners wat
[ännern | Bornkood ännern]Dat Enn vun’n Film schüll toeerst so aflopen, dat Alex Sülvstmoord maakt un dat so utsehn lett, as harr Dan ehr ümbröcht. Testvörföhren hebbt aver wiest, dat de Tokiekers mit den Sluss nich tofreden weern. Dat bekannte Enn vun’n Film is dorüm nadräglich dreiht worrn. In de japaanschen Kinofaten is aver dat eerste Enn wiest worrn.
Op Fatal Attraction warrt in den Film Sleepless in Seattle anspeelt, as de Hööftfigur to sien Söhn bi’t Anbahnen vun Blind Dates to denken gifft: „Ik heff 'Fatal Attraction' sehn. De hett mi düchtig bang maakt. De hett all Mannslüüd in de USA düchtig bang maakt.“
Weblenken
[ännern | Bornkood ännern]- Fatal Attraction in de Internet Movie Database (engelsch)
- Kritiken to Fatal Attraction op Rotten Tomatoes