Esther Ayuso

Esther Josefina Ayuso (* November 1958 in Caracas, Venezuela) is en Architektin un Politikerin (UDP) ut Belize.

Ayuso is 1958 as Dochter von Josefina, borene Medero, un Oscar Ayuso in Caracas boren. Ehre Öllern hebbt dor för de Royal Bank of Canada arbeidt. Nich lang na de Geboort is de Familie trügg na Belize-Stadt gahn. Dor güng se later op de St. Catherine’s Academy un hett 1975 de School afslaten. Se is denn na Caracas gahn, üm an de Universidad Central de Venezuela Architektur to studeren. Dat Studium hett se 1983 afslaten. Na dat Studium wull se egentlich in Belize arbeiden, hett aver keen Steed funnen un hett denn von 1983 bet 1992 in Venezuela as Architektin arbeidt. Se is na Belize trügggahn as dat to’n Putsch in Venezuela 1992 keem. Von 1992 bet 1995 hett se bi Professional Engineering Services arbeidt un denn tohoop mit ehren Mann en egen Architekturbüro (Arcade Ltd.) apenmaakt.

As Architektin hett se 1998 den Utbo von dat Krankenhuus von Belize Medical Associates övernahmen un ok de Boten von de Cleopatra White Polyclinic, Matron Robert Polyclinic, Hoy Eye Clinic un en Flögel von dat Karl Heusner Memorial Hospital.

Von Oktober 2006 bet März 2008 weer se för de Oppositschoonspartei UDP Maat von’n Senaat von Belize. 2008 is se Vörsitterin von de National Women’s Commission worrn un weer denn ok de Delegeerte för Belize bi de Inter-American Commission of Women.

Ehren

To Neejohr 2015 is Ayuso Officer of the Order of the British Empire worrn.