Don Juan DeMarco

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Don Juan DeMarco
Düütsch Titel: Don Juan DeMarco
Produkschoonsland: USA
Johr vun’t Rutkamen: 1995
Läng: 97 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Jeremy Leven
Dreihbook: Jeremy Leven
Produkschoon: Francis Ford Coppola,
Patrick Palmer,
Fred Fuchs
Musik: Michael Kamen
Kamera: Ralf D. Bode
Snitt: Tony Gibbs
Dorstellers

Don Juan DeMarco is de Titel vun en US-amerikaanschen Leevfilm un Filmkummedie ut dat Johr 1995. Mit den Film hett de Dreihbookschriever un Psychotherapeuth Jeremy Leven sien Instand as Speelbaas geven. De Hööftrull speelt Johnny Depp.

Inholt[ännern | Bornkood ännern]

En jungen Mann, de sik sülvst Don Juan DeMarco nöömt, leevt in New York, driggt aver en swarte Zorro-Maske, en wieten Ümhang un en Degen. He kann utermatig goot snacken un weet sik düchtig fein to benehmen. Mehr as 1.500 Fronslüd will he al hatt hebben, as he seggt, un siet sien Jöögd hett he lehrt, op den Lief vun en Fro to spelen as op en Vigelien vun Stradivari. Un wohrhaftig fallt em dat licht, Fronslüüd rümtokriegen. Man, dat gifft een Fro, Doña Anna, ge op sien Warven nich ingahn is un em en Korf geven hett. Dat is nu aver jüst de Fro, in de sik Don Juan verkeken hett. Also beslutt he, sien Leven en Enn to setten, Man, vördem dat sowiet kummt, dröpt he op Jack Mickler, en Psychiater mit langjohrige Insichten. He lett sik op sien Speel in un stellt sik em as Don Octavio del Flores vör.

Don Juan DeMarco warrt dorophen in en psychiatrische Klinik inwiest un Dr. Mickler sett allns doran, den Fall övernehmen to künnen. Sien Kollegen weet nich recht, vun wegen dat Mickler nipp un nau teihn Daag för sien Rohstand steiht un in teihn Daag de Richter ok över de Tokumst vun Don Juan befinnen mutt, vun den se utgaht, dat he al so op Duer inwiest warrt.

Mickler wiest sien Patienten dorophen, wat em drauht. De beiden maakt en Hannel: de Dokter gifft Don Juan Verlööf, sien Geschicht to vertellen. Wenn he dat in teihn Daag henkriegen schüll, em dorvun to övertügen, dat he wohrhaftig Don Juan weer, denn wull he sik dorvör insetten, dat he freelaten warrt. Don Juan seggt dorgegen to, dat he freewillig de Psycho-Heelmiddels innehmen will, wenn dat nich de Fall is.

Mit de Tiet kriggt aver de Psychater jümmer mehr Twievel an sien egen Gesundheit un versöcht gor nich recht mehr, Don Juan to helen. As he de Begeevnissen höört, de Don Juan em vertellt, sütt he all de Mööglichkeiten in sien Leven, de he verpasst hett. He is en go’en Beobachter un seggt Mickler een Dag de Wohrheit in’t Gesicht, dat he em för en Transfusion bruken deit, vun wegen dat em dat Blood in de Adern dröög worrn un sien Hart versannt is. Marilyn Mickler, de Ehfro vun Dr. Mickler, wunnert sik doröver, woans sik de Psychiater in em wannelt, freit sik doröver aver: Ehr Ehmann beleevt en tweet Fröhjohr, acht op sien Fro un sütt ehr nu mit Don Juan sien Ogen.

As de teihn Daag vergahn sünd, weet Don Juan, worop dat bi’n Richter ankamen deit. He gifft dorüm de „richtigen“ Antwoorten un kummt foorts wedder free. In de letzten Szeen warrt twee Poren wiest, de op dat Eiland Eros, glücklich mitenanner sünd. Dat een is dat Ehpoor Mickler, dat Geneet finnt in de Leev, de johrenlang weg weer un nu wedder togang kamen is. Un denn is dor noch Don Juan, de sien Doña Anna in siene Arms sluten kann.

Kritiken[ännern | Bornkood ännern]

  • Dat Jump Cut Magazin schreev den Film „kloke Ironie un den Gloven an de Macht vun de Fantasie“ to un seh feine Momenten, wat Johnny Depp to danken weer.
  • Dat Filmmagazin Prisma beteken den Film as „exzellent Vergnögen“, ofschoonst he stedenwies schlampig inszineert weer. Övertüügt hett de Kritikers vör allen de dorstellerische Kunst vun Johnny Depp.
  • Dat Magazin Cinema schreev, dat de Speelbaas Jeremy Leven en sekere Regie föhrt un Kitsch buten vör laten hett. Sünners rustellt weer de harmonische Dorstellen vun de Hööftdorstellers.

Anners wat[ännern | Bornkood ännern]

  • Johnny Depp hett sik wiel de Dreiharbeiten to den Film mehrmols den Fantasyfilm Fantasy Island ankeken, üm sien spaanschen Akzent to verbetern.
  • De Latino-Singersche Selena Quintanilla-Perez hett in den Film en Mariachi-Singersche speelt. Marlon Brando segg över ehr, dat se en sünnere un bannig schöne Deern weer. De Film harr an’n 7. April 1995 Premiere. Een Week dorför is de Singersche vun de Präsidentin vun ehrn Fan-club doodschaten worrn. För den Soundtrack hett se veer Leder opnahmen, dorünner een Duett mit den britischen Musiker David Byrne. Na ehrn Dood sünd eenige Szenen vun ehr rutsneden worrn.

Utteken[ännern | Bornkood ännern]

Don Juan DeMarco weer för söven Filmpriesen vörslahn, dorünner ok eenmol för den Oscar in de Kategorie Best Leed för Michael Kamen, Bryan Adams un Robert John Lange. Uttekent worrn is he mit dree Priesen:

  • 1996: mit den ASCAP Award in de Kategorie Most Performed Songs from Motion Pictures för Michael Kamen, Bryan Adams un Robert John Lange
  • 1996: mit den BMI Film Music Award in de Kategorie Most Performed Song from a Film för Michael Kamen
  • 1996: mit den ALFS Award in de Kategorie Dorsteller vun’t Johr för Johnny Depp

Weblenken[ännern | Bornkood ännern]