Curtis Lee Brown

Curtis Lee Brown

Curtis Lee „Curt“ Brown, Jr. (* 11. März 1956 in Elizabethtown, Bladen County, North Carolina) is en ehmalger US-amerikaansch Astronaut.

Leven

Brown hett 1974 de High School in sien Heimatstadt Elizabethtown afslooten un hett 1978 sien Bachelor in Elektrotechnik an de United States Air Force Academy maakt.

Van 1978 bit 1986 weer he up verscheeden US-amerikaansch Luftwapenbasen in den USA insett. Dor weer he meestens as Testpilot un Flooglehrer för de A-10 un later för de F-16 tätig.

Astronautentätigkeit

1987 wurr Brown vun de NASA för de 12. Astronautengrupp utwählt un hett de eenjohrig Astronautenutbillen maakt. Dornah wurr he as Shuttlepilot wieder utbillt. Dornah wurr he in völ Funktschonen binnerhalv vun de NASA insett, vör allen as Verbindungsspreker.

STS-47

Sien eerste Mission, bi de he 1992 Pilot vun dat Shuttle Endeavour weer, weer de fievtigste Ruumfloog vun en Space Shuttle un de tweete Insatz vun de Endeavour. Bi disse US-amerikaansch-japaansch Weltruummission weern Hoot Gibson Kommandat, Mark Charles Lee, Jay Apt, Nancy Jan Davis un Mae Carol Jemison de Missionsspezialisten un Mamoru Mohri de Bruuklastspezialist. In dat mitnommen Modul Spacelab wurrn völ Experimente up Naturwetenschapen und Materialwetenschapen maakt. De Mission düer van 12. bis 20. September 1992.

STS-66

Bi disse Mission 1994 mit den Shuttle Atlantis weer he wedder as Pilot insett. Kommandant weer ditmal Donald Ray McMonagle un de Missionsspezialisten Ellen Lauri Ochoa, Scott Edward Parazynski, Joseph Richard Tanner un de Franzoos Jean-François Clervoy. De Floog hett sück hööftsächlich mit de Klimaerwärmung befaat un düer 11 Daag.

STS-77

Disse Mission in’ Mai 1996 weer sien letzte Mission, in de he as Pilot insett wurr. Ünner Kommandant John Howard Casper flog he weer mit de Endeavour in’t Weltall. De anner Crewliddmaaten weern de Missionsspezialisten Dan Bursch, Marc Garneau, Mario Runco und Andy Thomas. Bi disse Mission wurrn veer Objekte in’t Weltall utsett, worbi de SPARTAN-Satellit nah erfolgter Mission wedder in de Bruuklastbucht vun de Ruumfähr torüchhaalt wurr. De Satellit harr wiels de Mission en Antenn utfohren, de so groot as en Tennisplatz weer aber blots 66 Kilogramm woog.

STS-85

1987 weer Curtis Brown denn eerstmals Kommandant bi en Ruumfloog. To glieker Tiet flog he dat eerste Mal mit de Ruumfähr Discovery in’t All. De Crew, to de Pilot Kent Vernon Rominger, de Missionsspezialisten Nancy Jan Davis, Robert Lee Curbeam, Stephen Kern Robinson un de kanaadsch Bruuklastspezialist Bjarni Tryggvason hörrn deen, hett bi disse Mission den düütschen Forschenssatelliten CRISTA-SPAS (Cryogenic Infrared Spectrometers and Telescopes for the Atmosphere) to de sien tweet Mission utsett. Disse Satellit muss wegen de Datenöverdragen immer dicht bi dat Ruumschipp blieven. En wiedere Programmpunkt weer de Test vun den japaanschen Roboterarm (Manipulator Flight Demonstration MFD) för de e Ruumstatschoon ISS. Mit sien Hülp wurrn komplizeert Arbeiten utführt, so as dat Lösen vun Schruuven un dat Apenmaken vun Dören.

STS-95

Bi disse Mission, wedder mit de Discovery, van' 29. Oktober bit 7. November 1998 weer Brown weer Kommandant, Pilot weer Steven Lindsey. As Missionsspezialisten weern Scott Scott Parazynski, Stephen Robinson un Pedro Duque ut Spanien an Bord. Chiaki Mukai ut Japan un John Herschel Glenn weern de Bruuklastspezialisten. Glenn, intüschen 77 Johr olt, floog mit, dormit ünnersöcht wurrn kunn, wu sück de Swoorlosigkeit up olt Minschen utwarken deiht. Dorto stunnen noch eenig annere Experimente an un dat wurrn ok Ersatzdeelen för dat Hubble Space Telescope in’t All test.

STS-103

Up sien letzte Mission, wedder as Kommandant vun de Discovery, wurr dat Hubble Space Telescope, repareert un up den neesten Stand broch. Dorbi kreeg dat Teleskop vör allen en nee Rekner. Pilot weer ditmal Scott Kelly, de sien eerste Mission harr. De anner Missionsspezialisten, weern, wiel dat so en wichtig Upgaav weer, olt Hasen: Steven Lee Smith (3. Insatz), Colin Michael Foale (5.), John Mace Grunsfeld (3.), Claude Nicollier ut de Swiez (4.) un Jean-François Clervoy ut Frankriek (3.).

Mit dissen Floog truck Curtis Brown mit de Astronauten John Young, Story Musgrave, Jerry Ross un Franklin Chang-Diaz gliek, de vör hüm söss Ruumflüüg maakt harrn.

Tosommenfaaten vun de Ruumflüüg

Nr	Mission	Funktschoon	Floogdatum	Floogdüer
1	STS-47	Pilot	12. September - 20. September 1992	7d 22h 30m
2	STS-66	Pilot	3. November - 14. November 1994	10d 22h 34m
3	STS-77	Pilot	19. Mai - 29. Mai 1996	10d 0h 39m
4	STS-85	Kommandant	7. August - 19. August 1997	11d 20h 26m
5	STS-95	Kommandant	29. Oktober - 7. November 1998	8d 21h 43m
6	STS-103	Kommandant	20. Dezember - 28. Dezember 1999	7d 23h 10m

Nah de NASA

1999 is he ut de NASA utscheeden. 2013 wurr Curtis Brown tosommen mit Eileen Collins un Bonnie Jeanne Dunbar in de Astronaut Hall of Fame upnommen.

Weblenken

Curtis L. Brown. Mehr Biller, Videos oder Audiodateien to’t Thema gifft dat bi Wikimedia Commons.

• NASA-Biographie (engelsch)
• Encyclopedia-Astronautica-Biographie (engelsch)
• Spacefacts-Biographie