Ellen Lauri Ochoa

Ellen Lauri Ochoa

Ellen Lauri Ochoa (* 10. Mai 1958 in Los Angeles, Bundesstaat Kalifornien, USA) is en ehmalge US-amerikaansch Astronautin. 2013 hett se de Leitung vun dat Lyndon B. Johnson Space Center in Houston övernommen. 2020 wurr se in de National Academy of Engineering wählt. 2024 wurr se dör Präsident Joe Biden mit de Presidential Medal of Freedom uttekent.

Leven un Utbillen

Hör Öllern weern Joseph un Rosanne (boren Deardorff) Ochoa. Hör Grootöllern vun hör Vader sien Siet weern ut Sonora, Mexico nah Arizona an later nah California inwannert, wo hör Vader boren wurr. Se is in La Mesa, California. Upwussen. Se weer dat middelste Kind vun fiev. As se in de Highschool weer, hemm sück hör Öllern scheeden laten se is mit hör Bröers bi hör Moder bleven. Ochoa kreeg 1980 en Bachelor in Physik vun de San Diego State University un 1981 en Master as ok 1985 en Dokter in Elektrotechnik vun de Stanford University.

Karriere bi de NASA

Ochoa hett mehrere Johren in de Forschung bi den Sandia National Laboratories un an dat Ames Research Center vun de NASA arbeit.

Werdegang as Astronautin

Ochoa wurr in’n Januar 1990 as Astronautenkandidatin utwählt. An dat Johnson Space Center hett se nah hör Utbillen to en Missionsspezialistin in verscheeden Berieken arbeit.

STS-56

An‘n 8. April 1993 is Ochoa mit de Ruumfähre Discovery to hör eersten Floog in’t All start. Kommandant vun disse Mission weer Kenneth Donald Cameron un de Pilot Stephen Scot Oswald. Dorto keemen noch de beid Missionsspezialisten olin Michael Foale un Kenneth Dale Cockrell. De negen Daag düern Mission mit de Beteken ATLAS-2 (Atmospheric Laboratory for Applications and Science) hett de Tosommenhänge in dat Wsselspeel tüschen Sünn un Eerdathosphäre erforscht. Ochoa hett den Roboterarm vun dat Shuttle bedeent, um den SPARTAN-Satelliten, de de Sünnenkorona ünnersöken dee, uttosetten un weer intofangen.

STS-66

Ochoa weer de Bruuklastkommandantin bi hör nächst Mission up de Ruumfähre Atlantis. De ATLAS-3-Mission ünner dat Kommando vun Donald Ray McMonagle un Pilot Curtis Lee Brown hett in’n November 1994 de Reeg vun de Spacelab-Flüüg to dat Utforschen vun de Sünnenstrahlung un dat Eerdklimas fortführt. An Bord weern tosätzlich des Missionsspezialisten Scott Edward Parazynski, Joseph Richard Tanner un de Franzoos Jean-François Clervoy, de för de European Space Agency (ESA) mit dorbi weer. Ochoa hett mit den Shuttle-Roboterarm den CRISTA-SPAS-Satelliten utsett un den nah acht Daag Freefloog weer infungen.

STS-96

An‘n 27. Mai 1999 is Ochoa mit de Discovery to de Internationale Ruumstatschoon (ISS) flagen. Kommandant weer ditmal Kent Vernon Rominger un de Pilot Rick Douglas Husband. Dorto keemen de Missionsspezialisten Daniel Thomas Barry, Tamara Elizabeth Jernigan, Julie Payette ut Kanada un Waleri Iwanowitsch Tokarew ut Russland. De meest teihn Daag lang düern Mission hett veer Tünnen Versörgensgöder un Baudeelen to de ISS brocht in Vörberedten för de eerste Langtietmission up de ISS. Dorto wurrn noch eenige Wartungsarbeiten dörführt. Ochoa hett dat Verladen vun de Göder koordineert un ok weer den Robteramr wiels den acht Stünnen düern Butenbordinsatz von Jernigan un Barry bedeent.

STS-110

Hör veert Floog un letzten Besöök vun de ISS hett Ochoa an‘n 8. April 2002 mit de Ruumfähre Atlantis start. Missionsupgaav ünner dat Kommando vun Michael John Bloomfield un Pilot Stephen Nathienal Frick weer, dat Gitterelement S0 zto de ISS to bringen un to monteeren. Ok an Bord weer de Mobile Transporter, de en Deel vun dat Mobile Servicing System is. Insgesamt wurrn veer Butenbordinsätze dör de Missionsspezialisten Jerry Lynn Ross, Steven Lee Smith, Lee Miller Emile Morin un Rex Joseph Walheim dörführt, bi de Ochoa den ISS-Roboterarm mit Ünnerstütten vun Daniel Wheeler Bursch bedeenen dee, um dat Gitterelement un hör Kollegen i‘'n Weltruum to bewegen. De anner ISS-Liddmaaten (Expeditschoon 4) weern Juri Iwanowitsch Onufrijenko un Carl Erwin Walz.

Managementfunktschonen

Af Dezember 2002 weer Ellen Ochoa stellvertredend Baas vun de Afdeelen Flight Crew Operations. In’n Oktober 2006 steeg se to’n Baas vun disse Afdeelen up un weer somit tostännig för de Mannschapsindeelen vun de Shuttleflüüg. In‘n Oktober 2007, nah de Mission STS-120 wurr Ellen Ochoa as Nahfolgerin vun Bob Cabana stellvertredend Baas vun dat Lyndon B. Johnson Space Center in Houston. Nahdem de vörherige Baas, Michael Lloyd Coats, Enn’n 2012 in’n Ruhestand gahn weer, hett Ochoa bit to’n 25. Mai 2018 as eerst Fru de Leitung vun dat Ruumfohrtzentrum övernommen un gung dornah in Rente.

Privates

Ellen Ochoa is verheiraadt un hett twee Kinner. Hör Hobbys sünd Musik (klassisch Flöte), Volleyball un Radfohren.

Weblinks

Ellen Ochoa. Mehr Biller, Videos oder Audiodateien to’t Thema gifft dat bi Wikimedia Commons.

• Körtbiografie bi spacefacts.de
• NASA-Biografie (engelsch, PDF)
• Biografie in de Encyclopedia Astronautica (engelsch)]