Jerry Lynn Ross

Vun Wikipedia
Zur Navigation springen Zur Suche springen

Jerry Lynn Ross (* 20. Januar 1948 in Crown Point, Indiana, USA) is en ehmalger US-amerikaansch Astronaut, de as eerste Minsch söben Ruumflüüg ünnernommen hett.

Utbillen[ännern | Bornkood ännern]

Ross hett Maschinenbau an de Purdue University studeert un 1970 mit en Bachelor afslooten. 1972 hett he noch sien Master-Afluss maakt.

Dornah gung he to de United States Air Force un weer up de Wright-Patterson Air Force Base in Ohio in den Forschenslaboren för Staustrahldrievwarken beschäftigt. Dor hett he Studien över Överschallraketen, de up Gleitschledden start wurrn, anfertigt. Disse Studien sünd nahderhen för de ASALM-Rakete bruukt wurrn. Van 1974 bit 1975 weer he Baas vun de dortigen Forschensinrichtungen.

1976 hett Ross en Testflegerkurs vun de Luftwappen maakt un gung denn to de Edwards Air Force Base in Kalifornien. In sien nee Upgaav wurr he to'n Testpiloten vun de Boeing RC-135S un de Rockwell B-1. As leeden Testpilot vun dat B-1-Projekt hett he sück um de Floogkontrollsysteme vun den Bomber kümmert, all Liddmaaten vun de Testbesatten inwiest, un weer för de Erstellung vun de Missionsplanung verantwortlich.

Jerry Ross hett över 21 verscheeden Floogtüüchtypen flagen un hett över 3.900 Floogstünn in sien Logbook, de meesten dorvan in Militärfloogtüüch. Offiziell is he an' 31. März 2000 ut de Luftwappen utscheeden.

Astronautentätigkeit[ännern | Bornkood ännern]

1979 wurr Ross Bruuklastoffizier för dat Space Shuttle in dat Lyndon B. Johnson Space Center. En Johr later wurr he as Astronaut utwählt un kreeg as Spezialrebeeden den Grieparm vun den Space Shuttle as ok Butenbordtätigkeiten (EVAs) towiest.

He weer in de Ünnerstüttensmannschapen för de Missionen STS-41-B, STS-41-C un STS-51-A, as ok Verbinnensspreker (CapCom) för de Ruumflüüg STS-41-B, STS-41-C, STS-41-D, STS-51-A un STS-51-D.

STS-61-B[ännern | Bornkood ännern]

Bi sien eerste Mission weer he Missionsspezialist un floog mit den Shuttle Atlantis. Bi disse Mission, de an' 27. November 1985 starten dee, wurrn dree Kommunikatschonssatelliten utsett. Kommandant weer Brewster Hopkinson Shaw un Pilot weer Bryan Daniel O'Connor. Mary Louise Cleave un Sherwood Clark Spring weern de beid anner Missionsspezialisten. As Bruuklastspezialisten sünd denn ok noch Rodolfo Neri Vela ut Mexiko un Charles David Walker vun de Firma McDonnell Douglas mitflagen. De Floog weer de tweete Nachtstart vun en Space Shuttle un muss aber um 90 Minüüt kört wurrn, wiel wegen slecht Weer en Lannen sonst nich mögelk ween weer.

STS-62-A[ännern | Bornkood ännern]

STS-62-A sull in' Juli 1986 as eerst Shuttle-Mission vun den Space Launch Complex 6 up de Vandenberg Air Force Base starten. Robert Laurel Crippen weer Kommandant vun de Discovery up de eerst Shuttle-Mission up en polaren Orbit för dat US-Verteidigungsministerium ween. De Crew harr neben Crippen ut Guy Spence Gardner, Dale Alan Gardner, Richard Michael Mullane, Jerry Ross as ok den Militärastronauten John Brett Watterson (MSE) un den Politiker Edward Cleveland Aldridge bestahn. De Floog wurr afseggt, nahdem dat US-Verteidigungsministerium sück nah dat Challenger-Unglück ut dat Shuttle-Programm torüchtruck. Ok later is kien Shuttle mehr vun de Vandenberg Air Force Base start.

STS-27[ännern | Bornkood ännern]

Disse veer Daag düern Mission mit den Shuttle Atlantis weer en geheimen Updrag vun dat US-Verteidigungsministerium, bi de in' Dezember 1988 de Upklärenssatellit Lacrosse 1 utsett wurr. Kommandant weer Robert Lee Gibson un as Pilot weer Guy Spence Gardner insett. Neben Ross weern noch de Missionsspezialisten Richard Michael Mullane un William McMichael Shepherd an Bord.

STS-37[ännern | Bornkood ännern]

Bi disse Mission, ebenfalls mit de Ruumfähre Atlantis ünner dat Kommando vun Steven Ray Nagel, wurr in' April 1991 dat Gammastrahlenobservatorium CGRO in't Weltall brocht. Wiel dat Probleme mit dat Ingangsetten vun den Antenn geev, mussen Ross un sien Kollege Jay Apt en nich plaanten Utstieg in't All ünnernehmen, in de se nah 15 Minüüt de Antenn vun Hand aktiveeren kunnen. An' nächsten Dag sünd de beid nochmals rutgahn, ditmal nah Plaan, worbi Fortbewegensmethoden för de Crew un de Utrüsten test wurr, in' Henblick up de tokünftig Ruumstatschoon. De beid weern dormit all tosommen bi disse Mission 10 Stünn un 49 Minüüt buterhalv vun de Ruumfähre. De beid anner Besattensliddmaaten weern Kenneth Donald Cameron (Pilot) un Linda Maxine Godwin. De Mission düer meest söss Daag.

STS-55[ännern | Bornkood ännern]

De veerte Floog vun Ross führ hüm weer mit de Ruumfähre Columbia in't All. De Floog is in Düütschland as tweet düütsch Spacelab-Mission „D-2“ bekannt. De teihn Daag lang düern Floog muss wegen verscheeden technisch Probleme mehrmals verschaven wurrn un kunn eerst an' 26. April 1993 anfangen. Kommandant bi disse Mission weer Steven Ray Nagel, de as Ross sien veerten Insatz harr. Pilot Terence Thomas Henricks harr sien tweeten Floog un de Missionsspezialisten Charles Joseph Precourt un Bernard Anthony Harris weern to'n eersten Mal dorbi. Bi disse Mission wurr dat eerste Mal en IMAX-Kamera mitführt. Ok bi dissen Floog speel dat Weer nich mit un de Ruumfähre muss up de Edwards Air Force Base landen. Mit an Bord weer ok de bei Bruuklastspezialisten Ulrich Walter un Hans Schlegel ut Düütschland, de ebenfalls ehr eersten Ruumfloog ünnernehmen deen. .

STS-74[ännern | Bornkood ännern]

Sien fievten Insatz in' November 1995 hett he weer mit de Ruumfähre Atlantis ünner dat Kommando vun Kenneth Donald Cameron maakt. Mit de Ruumfähre wurr dat in Russland entwickelt un baut Kopplungsmodul SDM to de Ruumstatschoon Mir brocht. Teel vun de Mission, bi dat James Donald Halsell Pilot weer, weer dat, de Ruumstatschoon mit Versörgensgöder to beleefern. De bei annern Missionsspezialisten weern William Surles McArthur un de Kanadier Chris Austin Hadfield. Eben över acht Daag düer de Mission.

STS-88[ännern | Bornkood ännern]

En bannig erfohren Mannschap floog bi disse Mission mit de Ruumfähre Endeavour in' Dezember 1998. Blots Pilot Frederick Wilford Sturckow weer vördem noch nich flagen. Ross maak dorgegen sien sössten Floog, Kommandant [[Robert Donald Cabana] sien veerten un de Missionsspezialisten Nancy Currie (3), Sergei Konstantinowistch Krikaljow ut Russland (4) un James Hansen Newman weern ok all mehrmals in't All ween.

Teel vun disse Mission weer, dat tweete Deelstück vun de Internatschonale Ruumstatschoon, den US-amerikaanschen Verbinnensknütt Unity, mit dat eerste Deelstück, dat russisch Modul Sarja, dat sück all in't All befunn, to verbinnen un dormit de Ruumstatschoon in Bedriev to nehmen. Jerry Ross övernehm dorbi dree EVAs un hett dorbi de Montagearbeiten erledigt. Dorneben wurrn twee lütt Satelliten utsett, dorvan een ut Argentinien. Mit dissen Ruumfloog truck he mit sien Astronautenkollegen John Young, de för hüm sien Vörbild is, Story Musgrave un Franklin Chang-Diaz mit söss Ruumflüüg gliek.

STS-110[ännern | Bornkood ännern]

Up sien letzte Mission ünner Kommandant Michael John Bloomfield keem he weer mit den Ruumfähre Atlantis in't All. Upgaav weer, dat eerste vun bit to negen mögelk Strukturelementen (S0) vun de Internatschonale Ruumstatschoon in't All to bringen un to monteeren. Dorbi wurr up de EVA-Erfohrung vun Ross torüchgreepen un he hett dorbi twee Butenbordinsatzen mit all tosommen 14 Stünn un 9 Minüüt Gesamtdüer maakt. Nah dissen Floog weer Jerry Ross de eerste Minsch, de söben Mal in't Weltall flagen is. Pilot bi disse Mission weer Stephen Nathaniel Frick un de anner Missionsspezialisten Steven Lee Smith, Ellen Lauri Ochoa, Lee Morin un Rex Joseph Walheim.

Nah de Ruumflüüg[ännern | Bornkood ännern]

Ross övernehm dornah de Leiden vun dat Vehicle Integration Test Office in dat Johnson Space Center un weer Chefastronaut för Sekerheit un Ingenieurwesen (NESC). An' 20. Januar 2012 is he ut de NASA utscheeden.

Tosommenfaaten[ännern | Bornkood ännern]

Nr Mission Funktschoon Floogdatum Floogdüer
1 STS-61-B Missionsspezialist 27. November – 3. Dezember 1985 06d 21h 04m
2 STS-27 Missionsspezialist 2. Dezember – 6. Dezember 1988 04d 09h 59m
3 STS-37 Missionsspezialist 5. April – 11. April 1991 05d 23h 32m
4 STS-55 Missionsspezialist 26. April – 6. Mai 1993 09d 23h 39m
5 STS-74 Missionsspezialist 12. November – 20. November 1995 08d 04h 30m
6 STS-88 Missionsspezialist 4. Dezember – 16. Dezember 1998 11d 19h 17m
7 STS-110 Missionsspezialist 8. April – 19. April 2002 10d 19h 42m

Besünnerheiten un Rekorde[ännern | Bornkood ännern]

  • eerst Minsch mit söben Ruumflüüg (STS-110)
  • eerst Grootvader bi en EVA (STS-110)
  • eerst un eenzig Astronaut, de fief Mal mit de Ruumfähre Atlantis flagen is

Ehrungen[ännern | Bornkood ännern]

Privates[ännern | Bornkood ännern]

Jerry Ross is verheiraadt mit Karen Ross un hett twee Kinner. Karen hett sülvst de Ruumfohrernehren för hör Mann vörbereit, de de up sien Missionen in't All mitnehm un dor eeten dee. Sien Dochter Amy hett de Handschoh entwurfen, de he 1988 bi sien Butenbordaktivitäten bruukt hett.

Weblenken[ännern | Bornkood ännern]

Commons-logo.svg Jerry L. Ross. Mehr Biller, Videos oder Audiodateien to’t Thema gifft dat bi Wikimedia Commons.