Rick Douglas Husband

NASA-Foto

Rick Douglas Husband (* 12. Juli 1957 in Amarillo, Texas, USA; † 1. Februar 2003 över den Süden vun de USA) weer en US-amerikaansch Astronaut un de Kommandant vun de verunglückt Columbia-Mission STS-107.

Leven

Husband wurr in Texas boren. He hett de Crockett Junior High School besöcht un 1975 sien Schoolafsluss an de Amarillo High School maakt. An de Texas Tech University kreeg he 1980 sien Bachelor as Maschinenbauingenieur un an de California State University in Fresno 1990 sien Master.

In de 1980er Johren weer Husband Pilot in de United States Air Force, wo he de F4 Phantom un de F15 Eagle fleegen dee. Sien aktiv Deenst in de Air Force hett he as Colonel, nahdem he 1994 vun de NASA för dat US-Weltruumprogramm utwählt wurr. Dor hett he an verscheeden theoretischen Programmen mitarbeit, ünner annern eenige Entwürfen för latere Marsmissionen.

An‘n 27. Mai 1999 floog he as Pilot der Discovery-Mission STS-96 to’n eersten Mal in’t All. Dorbi wurrn in Vörbereitung up de eerste Besatten vun de Internatschonalen Raumstatschoon (ISS) veer Tünnen Versorgungsgöder un Baudeelen to de Ruumstatschoon brocht. Kommandant bi disse Mission weer Kent Vernon Rominger, de to’n veerten Mal to’n Insatz keem. Missionsspezialisten weern Daniel Thomas Barry, Tamara Elizabeth Jernigan, Ellen Lauri Ochoa, Julie Payette ut Kanada un Waleri Iwanowitsch Tokarew ut Russland. De Mission hett meest tehn Daag düert.

Kommando över de Columbia

In‘n Dezember 2000 wurr Husband as Kommandant för den Columbia-Floog STS-107 utwählt. An'n 16. Januar 2003 weer de Start vun de Mission. Up disse 16 Daag düern Forschungsmission wurrn etwa 80 wetenschplich Experimente dörführt. Pilot bi disse Mission weer David Cameron McCool und de anner Missionsspezialisten weern Kalpana Chawla, David McDowell Brown, Michael Philip Anderson, Laurel Clark. Dorto keem de israeelsch Bruuklastspezialist Ilan Ramon.

Bi den Start vun dat Space Shuttle harr sück allerdings en Schuumstoffdeel vun den Butentank lööst un den Backbordflögel vun den Orbiter drapen. De Schaden wull woll bemarkt, aber vun de NASA as nich kritisch instuuft. As dat Shuttle an' 1. Februar to de Eer torüchkehren dee, drungen dör en beschädigt Hittkachel heet Gase in den Flögel in un hemm de vun binnen schmülten laaten. Dat Shuttle keem dordör buten Kontrolle un is in de Atmosphäre utnanner braken. Rick Husband un de anner Crewliddmaaten keemen dorbi to Dood. He hett sien Fru un twee Kinner achterlaaten.

Utteknungen

Neben tallriek posthumen Ehrungen wurr Husband besünners vun sien Heimatstadt Amarillo (Texas) ehrt: de Flooghaven dor wurr noch in dat Johr 2003 in „Rick Husband Amarillo International Airport“ nee nöömt. Vör dat gröttste Sportportzentrum vun de Stadt wurr en Bronzestatue upricht, de Husband in Astronautenmontur wiest, den Helm in de rechte Hand, wiels de linke Arm to’n Himmel richt is.

Nah de Crew an sück wurrn de Columbia Hills nöömt, en Landschap up den Mars. Dat is en flach, ca 5 km lang un bit to 3 km breedt Hööchttoog binnerhalv vun den grooten Krater Gusev. Opdeckt wurrn se vun de Landesonde Spirit de 2004 in den Krater spoodriek daal gung. De hööchste Hügel wurr nah Husband nöömt. Wiederhen wurr de Asteroid (51823) Rickhusband in den Hööftgördel nah hüm nömmt.

• NASA Space Flight Medal (posthum)
• NASA Distinguished Service Medal
• Defense Distinguished Service Medal
• Congressional Space Medal of Honor

Weblinks

Rick Douglas Husband. Mehr Biller, Videos oder Audiodateien to’t Thema gifft dat bi Wikimedia Commons.

• Indrag bi spacefacts.de
• NASA-Biografie (engelsch)
• Biografie in de Encyclopedia Astronautica (engelsch)