Eileen Marie Collins

Vun Wikipedia
Wesseln na: Navigatschoon, Söök
NASA-Potrait vun Eileen Collins

Eileen Marie Collins (* 19. November 1956 in Elmira, New York, USA) is en ehmalge US-amerikaansch Astronautin.

Biografie[ännern | Bornkood ännern]

Collins is dat tweete vun all tosommen veer Kinner – twee Jungs un twee Deerns – vun Rose un James Collins, de in Elmira in en alternativen Wohnprojekt engageert weern, dat deelwies ut staatlich Middel betallt wurr.

Wiels de Kinner de Grundschool (St. Patrick's Catholic School) besöken deen, hett de Moder över Dag in de örtliche Jöögdhaftanstalt arbeit. Geld weer knapp, un so muss Collins de High School wesseln. Vun de private kathoolsch Notre Dame High School gung se nah twee Johren up de apenliche Elmira Free Academy. Glieks nah hör Abitur 1974 nehm Collins hör Studium an dat Corning Community College in Corning (New York) up, dat blots wenige Kilometer vun Elmira entfeernt is. Mit apenlich Ünnerstütten un Krediten hett de Moder dat Studium vun hör Dochter betallt. Nah hör Afsluss in Mathematik un Wetenschap 1976 is Collins in de US-Luftwaffe intreden (dat weer dat eerste Johr, dat Fruen as Piloten annommen wurrn). Se kreeg vun dor denn ok en Stipendium, mit dat se sück an de private Syracuse University in Syracuse (New York) inschreev. Collins studeer Mathematik un Wertschap, hett 1978 mit en Bachelor afslooten un nehm denn hör Deenst in de Air Force wedder up.

Collins hett tonächst in Oklahoma up de Vance Air Force Base den militärischen Pilotenschien maakt. Se weer dor een vun blots veer Fruen ünner 320 männlich Floogschöler. Se bleev dree Johr as Utbillerin up T-38-Schoolfloogtüüch. 1983 wurr se nah Kalifornien versett, wo se up de Travis Air Force Base Langstreckentransportfloogtüüch vun den Typ C-141 Starlifter befehligen dee un Fortbillenskurse geev. Dor hett se denn ok ehrn Mann Patrick kennen lehrt, de up de Luftwaffenbasis Travis ok as Utbiller tätig weer. 1987 hebbt beid in Colorado up den Campus vun de United States Air Force Academy (USAFA) heiraadt.

As in' Oktober 1983 bi en Militärputsch up de Karibikinsel Grenada Ministerpräsident Maurice Bishop ümbrocht wurr, sünd wenig Daag later Truppen vun de USA as ok vun söss karibisch Staaten up de Insel land, um den Infloot vun Kuba intodämmen. Collins weer bi de „Operation Urgent Fury“ nömmten Insatz dorbi un broch mit hör C-141 Studenten un deren Familien buten Land un kreeg dorför nahderhen ok en Utteknung. 1985 nehm se denn an dat Air Force Institute of Technology, dat up de Wright-Patterson Air Force Base dicht bi Dayton in Ohio ünnerbrocht is, hör Studium wedder up, gung aber ok bald weer an de Westküst torüch un hett 1986 hör Master in Arbeitsforschung an de kalifoornsch Stanford University maakt. To de Tiet harr sück Collins eerstmals bi de NASA as Astronautin bewurben. Se wurr aber nich nommen un so gung se an de USAFA nah Colorado Springs (Colorado). Dor nehm se för dree Johr en Stäe as Assistenzperfessersche för Mathematik an un weer ok Utbiller up dat Schoolfloogtüüch T-41 Mescalero. In de Tüschentiet harr se aber ok sülvst noch wieder lehrt un 1989 an de kathoolsch Webster University in St. Louis (Missouri) den Master för Ruumfohrtmanagement maakt. Se hett denn hör Lehrtätigkeit upgeven un leet sück af Juli 1989 an de United States Air Force Test Pilot School (TPS) up de Edwards Air Force Base in Kalifornien to enTestpilotin utbillen. In' Juli 1990 kreeg se hör Diplom as Klassenbest. To de Tiet harr se all hör Utbillensverdrag as Astronautin.

NASA-Tätigkeit[ännern | Bornkood ännern]

Seit Collins as Kind wiels de Sömmermaanden an den dichtbi liggen Harris Hill de Segelfleger beobachten dee, weer hör Wunsch för de Fleegerree weckt. Dat Geld för de düer Floogstünnen muss se sück aber sülvst verdeenen. So weer se all vulljohrig, as se 1977 dat nötige Geld tosommen harr um Fleegen to lehren. Nachts harr se dorför as Bedeenen in en Pizzeria arbeit.

Se wull aber wieder un so hett se sück 1986 bi de NASA bewurben, wurr aber nich nommen. In' tweeten Versöök gelung dat aber un se wurr Midden Januar 1990 mit de 13. Grupp vörstellt. Se weer de eenzig Fru ünner de söben Pilotenanwärter. Överhoopt weer se de eerste Shuttlepilotin, de de NASA utwählt harr. (Siet 1978 is dat Astronautenkorps gemischt, bitlang weern Fruen aber blots as Missionsspezialistinnen annommen wurrn).

De eenjohrige Grundlehrgang weer in' Juli 1991 afslooten un Collins tonächst in de Afdeelen för Ruumfohrttechnik an dat Johnson Space Center tätig. Dornah hett se de Shuttle-Besetten wiels de Vörbereiten för de Start ünnerstütt.

In' September 1993 wurr se för hör eerst Ruumflog upstellt. Se weer de eerste Fru up den Pilotensitt vun en Space Shuttle, as mit STS-63 en nee Afsnitt in de US-amerikaansch-rissisch Tosommenarbeit in't All anfung. De Discovery stüer in' Februar 1995 as eerste Ruumfähre de Ruumstatschoon Mir an. Collins un hör Kommandant Jim Wetherbee hemm den Orbiter an' veerten Floogdag bit up 11 Meter an de Statschoon heranflagen un hemm disse Positschoon för ruchweg teihn Minüüt bibehollen. In den wiederen Verloop vun disse Mission hemm twee Besattensliddmaaten en Weltruumutstieg (EVA) maakt: As Bernard Anthony Harris (eerst Afroamerikaner bi en EVA) un Mike Foale (eerst Brite bi en EVA) för veereenhalv Stünn in de Bruuklastbucht arbeiten deen, hett Collins de EVA vun dat Cockpit ut koordineert. Dorneben weern ok noch Janice Elaine Voss un Wladimir Georgijewitsch Titow an Bord.

Ünnerbraken vun en Moderschapsurlaub, weer Collins ansluutend bit to hör nächst Nomineeren as Verbinnenssprekerin (CapCom) in de Insatzleitung in Houston tätig.

Midden Juli 1996 wurr Eileen Collins as Pilotin för STS-84 nömmt. Kommandant weer Charles Joseph Precourt bi disse Mission. Dat weer de sösste Kopplungsmission in' Rahmen vun dat Shuttle-Mir-Programm. De Atlantis is an' 15. Mai 1997 to de Mir-Statschoon losflagen. Nah dat Andocken dor wurrn mehrere Tünn an Utrüsten un Experimenten in de russische Ruumstatschoon brocht. Buterdem wurr en Mannschapswessel vörnommen. Astronaut Jerry Michael Linenger wurr nah veer Maand up de Statschoon aflööst un kehr mit den Shuttle to de Eer torüch. Sien Platz hett dorför Mike Foale innommen. De anner Missionsspezialisten weern Carlos Ismael Noriega, Edward Tsang Lu, beid USA, Jean-François Clervoy vun de ESA ut Frankriek un Jelena Kondakowa ut Russland. Nah negen Daag gung de Mission STS-84 an' 24. Mai to Enn'

Af August 1997 hett Collins för en half Johr de Afdeelen för Ruumfohrtüüchsysteme vun dat Astronautenbüro leit.

As Eileen Collins in' März 1998 hör eerst eegen Kommando överdragen wurr, weer dat en Medienereignis. Hillary Clinton, de Fru vun den US-Präsidenten, hett dormals in dat Witt Huus vör Reporter verklort, dat Collins de Mission STS-93 leiten würr. Hööftupgaav vun dat in' Juli 1999 dörführt Ünnernehmen, weer dat Utsetten vun dat Röntgenteleskop AXAF (Advanced X-ray Astrophysics Facility), dat all vör den Start de Naam Chandra kreeg, to Ehren vun den Physiker Subrahmanyan Chandrasekhar, de 1983 för sien Theorie vun de Steernentwicklung den Physiknobelpries kreegen harr. Pilot bi disse Mission weer Jeffrey Shers Ashby. As Missionsspezialisten weern Steven Alan Hawley, Catherine Grace Coleman un de Franzoos Michel Tognini an Bord.

Collins weer denn ok weer Kommandantin vun den Space-Shuttle-Floog STS-114, de eerste Missions nah de Columbia-Katastrophe. As Collins in' August 2001 för disse Mission utwählt wurr, weer de Start för November 2002 vörsehn. Dormals wuss noch nümms, dat disse Mission de Wedderupnahm vun den Shuttlefloog-Bedriev medüüden sull. De Missionsupdrag weer wiels dat Training modifizeert wurrn, de Karnbesetten änner sück nich. Oorsprünglich weer STS-114 as reiner Logistikfloog plaant, de de ISS-Expeditschoon 7 to de Internatschonalen Ruumstatschoon (ISS) un de sösste Stammbesetten torüch to de Eer bringen sull. As STS-114 an' 26. Juli 2005 to de ISS floog, weer de Mannschapswessel ut den Floogplaan streeken wurrn. Dorför stunnen de in de torüchliggen tweeeenhalf Johren vörnommen Veränderungen an dat Shuttle-System in Vördergrund. De Pilot bi disse Mission weer James McNeal Kelly un de Missionsspezialist Charles Joseph Camarda, Wendy Barrien Lawrence, Noguchi Sōichi, Stephen Kern Robinson un Andy Thomas. De Mission düer 8 Daag und 20 Stünn. Eileen Collins hett mit disse Mission all tosommen 36 Daag, 6 Stünn un 41 Minüüt in't All verbrocht.

Nah de NASA[ännern | Bornkood ännern]

An' 1. Mai 2006 hett de NASA mitdeelt, dat Collins de Weltruumbehörde verlaaten dee. De Astronautin wull künftig „privaten Interessen nahgahn un mehr Tiet mit hör Familie verbringen“.[1]

An' 24. Februar 2009 geev de IT-Firma GB Tech bekannt, dat Eileen Collins as Programm-Managerin instellt wurrn sull. Se sull en Team leiten, de as Upgaav harr, den ITAMS-Updrag vun de NASA (ITAMS: Information Technology and Multimedia Services) för GB Tech to winnen un ümtosetten.[2]

An' 20. April 2013 wurr Collins as offiziell Liddmaat in de Astronaut Hall of Fame upnommen.[3], nachdem se 2009 all in de National Aviation Hall of Fame upnommen wurrn weer.

Privates[ännern | Bornkood ännern]

Collins un hör Mann hemm een Dochter un een Söhn.

Weblenken[ännern | Bornkood ännern]

Commons-logo.svg Eileen Collins. Mehr Biller, Videos oder Audiodateien to’t Thema gifft dat bi Wikimedia Commons.

Borns[ännern | Bornkood ännern]

Enkeld Nahwiesen[ännern | Bornkood ännern]

  1. Tariq Malik: bi space.com, http://www.space.com/news/060501_collins_retirement.html, engelsch, NASA's First Female Shuttle Commander Retires from Spaceflight van' 1. Mai 2006, afropen an' 10. August 2014
  2. Your Houston News: http://www.yourhoustonnews.com/bay_area/news/article_f38bac1d-dfda-5525-bbcd-884077249499.html, engelsch, Eileen Collins joins GB Tech, van 22. November 2009, afropen an' 10. August 2014
  3. Britt Kennerly: 3 inducted into Astronaut Hall of Fame In: USA Today, 20. April 2013.