John Mace Grunsfeld
John Mace Grunsfeld (* 10. Oktober 1958 in Chicago, Illinois, USA) is ehmalger US-amerikaansch Astronaut.
Utbillen
[ännern | Bornkood ännern]Grunsfeld hett sien Schoolafsluss up de Highland Park High School in Illinois maakt. Dornah hett he Physik an dat Massachusetts Institute of Technology studeert un dat Studium 1980 mit en Bachelor afslooten. An de University of Chicago hett he 1984 en Master maakt un 1988 en Dokter in Physik.
NASA
[ännern | Bornkood ännern]An' 31. März 1992 wurr he in de 14. Astronautengrupp vun de NASA wählt un een Johr lang as Missionsspezialist utbillt. Sien Spezialrebeet sünd draagbor Computer för de Arbeit in' Weltruum.
STS-67
[ännern | Bornkood ännern]Up sien eerst Weltruummission is Grunsfeld an' 2. März 1995 mit dat neeste Space Shuttle Endeavour ünner dat Kommando vun Steve Oswald in't All flagen. Dat weer de tweete Floog vun dat Astro-Observatorium mit dree Ultra-Vigelett-Teleskopen an Bord. Pilot bi disse Miion weer William Gregory. Dorto keemen den Missionsspezialisten Tamara Jernigan un Wendy Lawrence as ok de Bruuklastspezialisten Ronald Anthony Parise un Samuel Thornton Durrance. De Floog düer över 16 Daag un gung an' 18. März 1995 mit dat Lannen up de Edwards Air Force Base in Kalifornien to Enn'.
Nah disse Mission wurr Grunsfeld Baas vun en Grupp vun Wetenschaplern, de dat Kontrollsystem un de Computer vun de ISS entwickeln deen.
STS-81
[ännern | Bornkood ännern]Bi sien tweeten Insatz is Grunsfeld van' 12. - 22. August 1997 mit de Atlantis to de russisch Ruumstatschoon Mir flagen. Dat weer de fievte Floog vun de Atlantis to de Mir un de tweete, bi dat Astronauten vun de Langtietbesatten uttuscht wurrn. Kommandant bi disse Mission weer Michael Allen Baker un als Pilot weer Brent Ward Jett an Bord. Dorto keemen de Missionsspezialisten Marsha Sue Ivins un Peter Jeffrey Kelsay Wisoff un Jerry Michael Linenger. Wichtigst Test weer en Fitnessloopband, dat ok up de ISS jetzt insett wurr, de sien Schwingungen dämpt sünd, dormit sück de Bewegungen vun den Astronauten nich up de Ruumstatschoon överdraagen. Lannd wurr direkt in dat Kennedy Space Center in Florida. De Mission düer ruchweg 10 Daag un 5 Stünnen. Wiels Linenger up de ISS bleev, wurr John Elmer Blaha up den Rückfloog vun de ISS weer mit torüch brocht.
Nah dissen Floog wurr Grundfeld Baas vun de Afdeelen vun de Computerentwicklung för de ISS un de Space Shuttles.
STS-103
[ännern | Bornkood ännern]
De darte Floog broch hüm mit de Discovery van‘ 20. - 28. Dezember 1999 to dat Hubble-Weltruumteleskop ünner dat Kommando vun Curtis Lee Brown un Pilot Scott Joseph Kelly. An dat Teleskop wurrn spezielle Wartungen dörführt un besünners de Computerhardware up den neesten Stand brocht. Dorto weern neben Grunsfeld de Missionsspezialisten Steven Lee Smith, Michael Foale un Claude Nicollier ut de Swiez un Jean-François Clervoy ut Frankriek mit an Bord. Lannd wurr weer direkt in dat Kennedy Space Center in Florida. Wiels den Floog hett he en Marsflagg mit sück führt, de dormit to’n eersten Mal in‘ Weltruum weer.[1]
Nah dissen Floog wurr Grunsfeld to’n Utbillensbaas för Butenbordaktivitäten (EVA)s.
STS-109
[ännern | Bornkood ännern]Sien veerten Insatz harr he van‘ 1. - 12. März 2002 mit de Columbia weer to dat Hubble-Weltruumteleskop. Ok dit Mal wurrn weer Wartungsarbeiten dörführt, ünner annern wurr dat Stüersystem un de Solarpanelen uttuuscht. Kommandant bit dit Ünnernehmen weer Scott Altman, de Pilot Digger Carey. De Missionsspezialisten weern neben Grunsfeld Nancy Jane Currie, James Hansen Newman, Richard Michael Linnehan un Michael James Massimino. Ok disse Mission gung mit en Lannen in Florida to Enn‘.
Nah dissen Floog wurr he to’n Chefwetenschapler vun de NASA nömmt.
STS-125
[ännern | Bornkood ännern]To sien fievten un letzten Insatz is he an‘ 11. Mai 2009 start un dat weer de 30. Floog vun de Atlantis, de tüschenin sogor as letzt Floog vun disse Ruumfähren plaant ween weer. Teel vun disse Mission ünner dat Kommando vun Scott Altman mit Pilot Gregory Carl Johnson weer wedder dat Hubble-Weltruumteleskop, dat to’n darten Mal weer up den technisch neesten Stand brocht un repareert wurr. Grunsfeld wurr för disse Mission utwählt, wiel he de meest Erfohrung mit Butenbordaktivitäten in‘ Tosommenhang mit dat Teleskop harr. Michael Massimino, de ok all bi de letzte Mission dorbi weer, un Andrew Jay Feustel, Michael Timothy Good un Megan McArthur, de all ehrn eersten Floog maken deen, weern de anner Missionsspezialisten.
Tosommenfaaten
[ännern | Bornkood ännern]| Nr. | Mission | Funktschoon | Floogdatum | Floogdüer |
|---|---|---|---|---|
| 1 | STS-67 | Missionsspezialist | 2. März - 18. März 1995 | 16d 15h 08min |
| 2 | STS-81 | Missionsspezialist | 12. Januar - 22. Januar 1997 | 10d 04h 55min |
| 3 | STS-103 | Missionsspezialist | 20. Dezember - 28. Dezember 1999 | 7d 23h 10min |
| 4 | STS-109 | Missionsspezialist | 1. März - 12. März 2002 | 10d 22h 09min |
| 5 | STS-125 | Missionsspezialist | 11. Mai - 24. Mai 2009 | 12d 21h 38min |
Insgesamt weer he also 58 Daag, 15 Stünnen un 3 Minüüten in' Weltruum un hett dorbi 8 EVA's maakt, de all tosommen 58 Stünnen un 39 Minüüten düert hemm.
Nah de NASA
[ännern | Bornkood ännern]Anfang Januar 2010 geev de NASA bekannt, dat Grunsfeld de NASA verlaaten un as stellvertreeden Direkter an dat Space Telescope Science Institute wesseln dee.[2]
Ehrungen
[ännern | Bornkood ännern]Grunsfeld wurr 2015 in de Astronaut Hall of Fame upnommen.[3]
Privat
[ännern | Bornkood ännern]Grunsfeld is verheiraadt un hett twee Kinner. Sien Hobbys sünd Bargstiegen, Fleegen, Segeln, Radfohren un de Musik.
Weblenken
[ännern | Bornkood ännern]
John Mace Grunsfeld. Mehr Biller, Videos oder Audiodateien to’t Thema gifft dat bi Wikimedia Commons.
- Offizielle NASA-Biografie (englelsch)
- Spacefacts-Biografie
Enkeld Nahwiesen
[ännern | Bornkood ännern]- ↑ "The First Salute: Martian Flag Flies in Space", www.spaceref.com
- ↑ NASA Astronaut John Grunsfeld, Instrumental to Hubble Telescope Repair, Will Help Oversee its Science Operations (engelsch)
- ↑ Space Coast Daily: http://spacecoastdaily.com/2015/06/nasa-inducts-four-heroes-into-u-s-astronaut-hall-of-fame/ ] NASA Inducts Four Heroes Into U.S. Astronaut Hall Of Fame (engelsch)van‘ 1. Juni 2015, afropen an‘ 3. Juni 2015