Coronaviridae

Vun Wikipedia
Zur Navigation springen Zur Suche springen
Coronaviridae

Bi de Coronaviridae (Coronaviren) hannelt sik dat um en Familie vun Viren. Se höört all to de Ornen Nidovirales to. Se sett allerhand Aarden vun Warveldeerter to, as Söögdeerter, Vagels un Fisch, un lööst dor allerhand verscheden Süken ut. De eersten Coronaviren sünd al in de Midden vun de 1960er Johre beschreven wurrn.[1]

Coronaviren könnt sik vun de Genetik her bannig slank ännern un enkelte Aarden mank de Coronaviren könnt över de Aardengrenz wegjumpen un up en ganze Reeg vun Weerten övergahn. Dör düt Övergahn vun een Aart up en anner sünd bi Minschen unner annern Infektschonen mit dat SARS-assozieerte Coronavirus (SARS-CoV) un dat Middle East respiratory syndrome coronavirus (MERS-CoV) tostanne kamen. Ok de COVID-19-Pandemie, de 2019 in de chinees’sche Stadt Wuhan upkamen weer, warrt torüchföhrt up en Coronavirus, wat bit dorhen unbekannt weer un den neen Naam SARS-CoV-2 kregen hett.[2] Bi Minschen sünd en Reeg vun Coronaviren de Grund vun allerhand Süken, dat geiht los, wenn he sik bloß verkullt, man ok wenn he en Swaar akut Atenwegsyndrom kriggt. Alltohopen sünd in’n Momang (Februar 2020) seven Coronaviren bekannt, de Minschen krank maken könnt: Neven SARS-CoV(-1), SARS-CoV-2 un MERS-CoV noch HCoV-HKU1, HCoV-NL63, HCoV-OC43 un HCoV-229E. De lesten veer Viren maakt avers nich so duchtig krank, as de annern.[3]

De Naam „Coronaviren“ – vun latiensch corona ‚Kranz, Kroon‘ – is 1968 inföhrt wurrn un hangt dor mit tosamen, wie dat Virus unner dat Elektronenmikroskop utsütt.[4] De Utrecksels up de kogelhaftigen Hüllen laat an en Kroon denken[5]oder an den Strahlenkranz, as de Korona vun de Sunne.[6]

Belege[ännern | Bornkood ännern]

  1. Faktencheck zu Coronavirusmythen - Von Chlordioxid, Vertuschung und Zwiebeln, up: n-tv.de vun'n 18. März 2020. Born: RKI
  2. New-type coronavirus causes pneumonia in Wuhan: expert. Up: xinhuanet.com vun‘n 9. Januar 2020.
    WHO: Pneumonia of unknown cause – China. Disease Outbreak News vun‘n 5. Januar 2020.
  3. Kristian G. Andersen, Andrew Rambaut, W. Ian Lipkin, Edward C. Holmes, Robert F. Garry: The Proximal Origin of SARS-CoV-2, up: virologica.org, Born: ARTIC Network, 17. Februar 2020
  4. D. Tyrrell, J. Almeida, D. Berry, C. Cunningham, D. Hamre, M. Hofstad, L. Mallucci, K. McIntosh: Virology: Coronaviruses. In: Nature. 220, 650, 16. November 1968, doi:10.1038/220650b0.
  5. A. Bradburne: Antigenic relationships amongst Coronaviruses. In: Archiv für Virusforschung. Band 31, Februar 1970, S. 352 (PDF).
  6. Jeffrey Kahn und Kenneth McIntosh: History and Recent Advances in Coronavirus Discovery. In: The Pediatric Infectious Disease Journal. Band 24, Nr. 11, 2005, S. S223–S227,
    National Foundation for Infectious Diseases: Coronaviruses..