SARS-CoV-2

Vun Wikipedia
Dat SARS-CoV-2-Virion

Bi SARS-CoV-2 (Sars-CoV-2, Severe Acute Respiratory Syndrome Coronavirus 2, „Swaar akuut Atenwegsyndrom Coronavirus 2“; vörmals 2019-nCoV, 2019-novel Corona virus, neeaardig Coronavirus 2019 un Wuhan-Coronavirus) hannelt sik dat um en Coronavirus, dat in'n Januar 2020 in de Stadt Wuhan (Provinz Hubei) in China to'n eersten Mol upkamen weer. Dat Virus lööst de Süke mit Naam COVID-19 (Corona virus disease 2019) ut un is de Grund för de COVID-19-Pandemie, de vun de WHO toeerst as Gesundheitliche Noot vun internatschonalen Betog un an'n 11. März 2020 as Pandemie taxeert wurrn is. Wenn dor över snackt warrt, warrt dat Virus meist (na de Virus-Familie) neeaardig Coronavirus, nee Coronavirus, Coronavirus oder bloß man Corona nömmt. Hen un wenn lutt sien Naam ok na de Süke, de dat utlösen deit, Covid-19-Virus

Wie dat Corionavirus to’n eersten Mol faststellt wurrn is[ännern | Bornkood ännern]

In’n Dezember 2019 is in de Stadt Wuhan in China miteens en grote Tahl vun Lungensweren uptreden, wo nich kloor weer, wie de tostanne kamen weern. An’n 30. Dezember 2019 hett de chinees’sche Dokter Li Wenliang siene Dokter-Kollegen in en WeChat-Gruppen vun seven Patienten vertellt, bi de Verdacht up Infektschoon mit dat SARS-Virus bestunn. Se wurrn all in dat Zentralkrankenhuus Wuhan behannelt. [1] De Behörde för Kuntroll un Präventschoon vun Süken (Chinese Center for Disease Control and Prevention) hett denn an’n 31. Dezember 2019 en Grupp na de Stadt henstüert. An’n sülvigen Dag hefft de chinees’schen Behörden bi dat China-Kontor vun de WHO offiziell Bescheed seggt, datt in’n Dezember 2019 in Wuhan en Reeg vun Lüde en dannige Lungensweer kregen harr un datt annahmen wurrn is, dorachter stunn en bit dorto man unbekannten Erreger. Bit to’n 3. Januar sünd 44 Kranke bi de WHO mellt wurrn, dormank en Reeg vun Swaarkranke. Vundeswegen, datt en Reeg vun düsse Kranken up den Groothannelsmarkt för Fisch un Seefrüchte in Wuhan as Höker oder Verköper arbeit‘ harrn, is annahmen wurrn, up düssen Markt harrn se sik all toeerst ansteken. An’n 7. Januar 2020 hett de chinees’sche Viroloog Xu Jianguo (徐建国) bekanntgeven, datt sik dat bi den Erreger vun de Süke um en bitherto unbekannt Coronavirus hanneln dö. Xu weer as Baas mit dat Utfinnen vun den Virus befaat. Rutfunnen harrn se dat Virus dör Bloot, dat se bi 15 Kranke afnahmen harrn, un ok dör Afstreeke ut’n Strott bi desülvigen Lüde. De WHO hett dat an’n 9. Januar utdrücklich richtig nömmt. An’n 13. Januar 2020 is de ganze DNA-Sequenz vun düt nee Virus bi de Genbank vun dat National Center for Biotechnology Information (GenBank-Nummer MN908947) achter leggt wurrn. Gegendes is ok en eerst Verfahren to’n Nahwies vun dat nee Virus publizeert wurrn.

Belege[ännern | Bornkood ännern]

  1. Stephanie Hegarty: [1] The Chinese doctor who tried to warn others about coronavirus, BBC News, 2020-02-06

Weblenken[ännern | Bornkood ännern]

SARS-CoV-2. Mehr Biller, Videos oder Audiodateien to’t Thema gifft dat bi Wikimedia Commons.