Clitellum

Vun Wikipedia
Zur Navigation springen Zur Suche springen
Mettje Düütlich to sehn is dat Clitellum.

Bi dat Clitellum (up lat.: Sadel) hannelt sik dat um en Buckel an dat Lief bi Gördelwörmer. Dat is en Region vun de Huut, de vunwegen ehre tahlrieken Drüsen en beten over dat Umto rutstahn deit. Dat Clitellum liggt as en Gördel um dat Lief un is in de vörste Hälft vun dat Lief, an en paar Segmente achter'nanner to sehn. Bi inheemsche Mettjen is dat anleggt twuschen dat 22. un dat 38. Segment un reckt over 6 - 12 Segmente hen. De Gördelwörmer ehre Eier entwickelt sik in en Büdel, de vun dat Clitellum afscheden warrt. Dat Clitellum is bi utwussen Gördelwörmer to sehn, man bi jüngere Wörmer is dat man kuum ut to maken. Bi Ielen is dat man bloß vun Tied to Tied to sehn (wenn se sik vermehren doot). De Farv vun dat Clitellum is normolerwiese en beten heller, as de annern Deele vun dat Lief bi en Gördelworm.

Clitellum un Vermehren[ännern | Bornkood ännern]

Twee Mettjen sluut sik tosamen (Kopulatschoon).

De Gördelwörmer sünd Halfsläge (Hermaphroditen). De Geslechtsdeele liggt in dat Clitellum. Dor gifft dat an'n Buuk oder en beten mehr na de Sieten hen sunnerliche Gnubbels, de sünd oval oder man liek un weert bi de Vermehren insett. Wenn se sik paart, leggt sik de beiden Partners een gegen den annern (Vörsiet gegen Achtersiet) mit'n Buuk so gegen'anner, datt de Saatbüdelregion in dat 9. un 10. Segment vun den enen Worm gegen de vun den annern over liggt. Ut de Drüsen vun dat Clitellum warrt nu en backigen Sliem afsonnert. Dor verbinnt de beiden Wörmer sik mit for den Uttuusch vun Saat.