Charles Bartlett Hyde
Charles Bartlett Hyde (oder kort C. B. Hyde; * 23. Juni 1923 in Belize-Stadt) is en Beamten ut Belize.
Leven
[ännern | Bornkood ännern]Hyde is 1923 as Söhn von Eunice, borene Lake, un den Inschenör James Bartlett Hyde in Belize-Stadt (to de Tied de Hööftstadt von Brietsch-Honduras) boren.[1][2] He weer von 1937 bet 1941 op dat St. John’s College un is denn in’n Verwaltungsdeenst von Brietsch-Honduras intreden.[2]
In junge Johren weer Hyde Sportler un hett von 1948 bett 1968 den Wiedsprung-Rekord von Belize hollen.[3]
He hett an’n 13. Oktober 1946 Elinor Belisle Hyde freet.[2] De beiden hebbt söven Söhns un twee Döchter, von de de Rutgever Evan X Hyde de öllste is.[4]
In’n Verwaltungsdeenst von Brietsch-Honduras hett Hyde verscheden Behörden kennenlehrt un is 1944 na de Post von Belize gahn.[2] 1959 weer he för twölv Maand bi dat General Post Office in Grootbritannien.[2] Bi de Post von Belize weer he von 1960 bet 1962 Assistant Postmaster un is 1962 Postmaster worrn.[2] He weer toletzt bet 1978 Postmaster General un is denn in Rohstand gahn.[3]
He weer von’n 30. November 1979 bet 9. November 1984 ünner Premierminister George Cadle Price Spreker von dat Repräsentantenhuus.
An’n 23. Dezember 1999 is he Commissioner of the Supreme Court an’n Böversten Gerichtshoff von Belize worrn.[5]
Ehren
[ännern | Bornkood ännern]To’n Geboortsdag von Königin Elisabeth II. un ehr sülvern Kroonjubiläum 1977 is Hyde Member of the Order of the British Empire worrn. To Neejohr 1998 is he tosätzlich Commander of the Order of the British Empire worrn.[6]
Dat Charles Bartlett Hyde Building, en Verwaltungsgebüüd in de Mahogany Street in Belize-Stadt, is 2008 na em nöömt worrn.[1] Dat Gebüüd is 1995 boot worrn un is vörher Complex Building nöömt worrn.[1]
Footnoten
[ännern | Bornkood ännern]- ↑ a b c Complex Building renamed after Charles Bartlett Hyde, Channel 5 Belize an’n 3. Dezember 2008
- ↑ a b c d e f Personalities Caribbean. Personalities Limited, 1971, Sied 256
- ↑ a b Rowland A. Parks: Administration Building renamed Charles Bartlett Hyde Building, Amandala an’n 5. Dezember 2008
- ↑ Biografie von Evan X Hyde bi Amandala
- ↑ Commissioners of the Supreme Court, Belize Judiciary
- ↑ Seventh Supplement to the London Gazette, The London Gazette an’n 30. Dezember 1998