Carl Ludwig Neubourg

Carl Ludwig Neubourg (* 22. Dezember 1808 in Bremen; † 31. Januar 1894 in Stood) weer en düütschen Politiker.

Neubourg is 1808 as Söhn von Antoinette Charlotte, borene Pape, un den Oberpostmeester Carl Gottfried Neubourg in Bremen boren. Sien Broder weer August Neubourg. He güng in Bremen un Hannover op dat Gymnasium. He hett 1826 bet 1829 Juristeree an de Universität Göttingen studeert. 1830 is he in’n hannöverschen Staatsdeenst gahn un Amtsauditer bi dat Amt Achem worrn. 1831 keem he in dat Amt Willemsborg un is 1832 Amtsassesser bi dat Amt Horborg worrn. Von dor is he na dat Grevengericht Oolland in Jörk wesselt. 1835 is he Hülpsarbeider bi dat Amt Stood-Gothenborg worrn. An’n 1. Juni 1847 hett he in Hannover Dorothee Pauline Louise Frank freet.

Nadem de Börgermeester in Stood, Johann Kobbe, 1838 doodbleven is, hett sik Neubourg üm de Steed beworven. He weer von 1839 bet 1891 Börgermeester von Stood. Toeerst tweten Börgermeester (eersten Börgermeester weer Christian Leopold Lübbren), na Lübbren sien Dood von 1851 af an denn eersten Börgermeester.

Von 1870 bet 1873 weer he för den Wahlkreis Hannover 31 (Stoder Geestkreis) Afornten in dat Prüüßsche Aforntenhuus. He weer dor in de Natschonalliberale Partei.

He weer ok Maat von’n Hannöverschen Staatsraad (1846 bet 1866) un von’n Provinziallanddag Hannover.

Von 1876 bet 1895 weer he Vörsitter von’n Stoder Geschichts- un Heimatvereen. Al 1882 is de Neubourgstraat in Stood na em nöömt worrn un 1892 hebbt se Neubourg ok to’n Ehrenbörger von Stood maakt.