Blauvigeletten Loopkäver

Stamm:	Liddfööt (Arthopoda)
Ünnerstamm:	Tracheendeerter (Tracheata)
Böverklass:	Sessfööt (Hexapoda)
Klass:	Insekten (Insecta)
Ünnerklass:	Fleeginsekten (Pterygota)
Böverornen:	Neeflunken (Neoptera)
Ornen:	Kävers (Coleoptera)
Ünnerornen:	Adephaga
Familie:	Loopkävers (Carabidae)
Ünnerfamilie:	Carabinae
Geslecht:	Echte Loopkävers (Carabus)
Oort:	Blauvigeletten Loopkäver (Carabus problematicus)

Wetenschoplich Naam

Carabus problematicus

Herbst, 1786

Bi den Blauvigeletten Loopkäver (Carabus problematicus) hannelt sik dat um en Käver ut de Familie vun de Echten Loopkävers (Carabus).

Kennteken

De Blauvigelette Loopkäver warrt bit hen to 30 Millimeters lang un höört dor to de groten Aarden mank de Kävers mit. Sien Lief, un sunnerlich de Deekflunken un dat Halsschild lücht blau bit blauswatt. Langs over de Deekflunken hen loopt Gölen un Kedenregen, de man nich sunnerlich düütlich utpräägt sünd.

Wo he vörkamen deit

In grode Deele vun Europa kummt düsse Käver vör, meist is he faken antodrepen, sunnerlich in MIddel- un Süüdwesteuropa. Ööstlich vun’e Elv warrt he raar un lett sik bloß noch he nun wenn mol sehn. In Skandinavien is he bit över den Polarkreis hen to finnen. He leevt sunnerlich in de Middelbarge un up högere Barge bit dorhen, wo bloß noch lüttje Strüker wassen doot.

Wie he leven deit

De Blauvigelette Loopkäver wohnt in allerhand verscheden Aarden vun Woold, as Nadel-, Loof- un Mischwoold, ok in Hecken un utdröögt Moor mit Woold dorup. In Gemarken, de wat höger in’e Barge liggt un in Noordeuropa mag he dat an’n leevsten, wenn dat dröge is. De Deerter sünd to finnen unner Steen, Stubben vun Doodholt, Boomstämm, de umfullen sünd, ok unner Bark un Moss an Bööm. As de meisten groten Loopkävers is de Blauvigelette Loopkäver en Röver un jaagt sunnerlich annere Insekten un de ehre Budden, dorto ok Sniggen un Wörmer. He is unnerwegens in de Schummertied vun Mai- bit Septembermaand. Dat hangt vun dat Umto af, ob he as Budde oder as Imago överwintern deit. Ok de Tied, wo he sik vermehren deit, hangt vun de Temperatur af.