Echte Loopkävers

Vun Wikipedia
Zur Navigation springen Zur Suche springen
Echte Loopkävers; Grote Loopkävers
Russt (Carabus glabratus)
Systematik
Stamm: Liddfööt (Arthopoda)
Ünnerstamm: Tracheendeerter (Tracheata)
Böverklass: Sessfööt (Hexapoda)
Klass: Insekten (Insecta)
Ünnerklass: Fleeginsekten (Pterygota)
Böverornen: Neeflunken (Neoptera)
Ornen: Kävers (Coleoptera)
Ünnerornen: Adephaga
Familie: Loopkävers (Carabidae)
Ünnerfamilie: Carabinae
Geslecht: Echte Loopkävers (Carabus]]
Wetenschoplich Naam
Carabus
Linnaeus, 1758

Bi de Echten Loopkävers oder Groten Loopkävers (Carabus[1] ) hannelt sik dat um en Geslecht mank de Loopkävers (Carabidae). Dor höört se to de Unnerfamilie vun de Carabinae mit to. As de Naam al seggt, sünd de Groten Loopkävers man groot, as de Leddern Loopkäver (Carabus coriaceus), de bit hen to 40 Millimeters lang weern kann un dor de gröttste Aart in Europa mit is. All tohopen gifft dat in Europa bi hunnert Aarden, dormank 33 in Middeleuropa. In de ganze Welt kann een mehr as 850 Aarden andrepen.

Kennteken[ännern | Bornkood ännern]

Mol af vun Aarden ut dat Geslecht Procerus , as de Kaventsmann-Loopkäver (Procerus gigas), sünd de Groten Loopkävers, mit de Poppenrövers (Calosoma), de Sandloopkävers (Cicindela) un en paar minner bekannte Geslechter de Gröttsten mank de Loopkävers. Dat langt bi de europääschen Aarden vun bi 13 Millimeters bi den Heid-Loopkäver (Carabus nitens) bit hen to den Leddern Loopkäver mit siene 40 Millimeters.[2] In de Tropen gifft dat ok Aarden, de könnt bit hen to 70 mms lang weern. As bi all Loopkävers bestaht de Footle’e (Tarsen) an all dree Beenpaar ut fiev Le’e. De Föhlspriete sitt an’e Sieten vun’e Steern un bestaht ut 11 Le’e. Bovendem sünd de Bostplaten vun de dree Bostsegmente fast tohopenwussen. De Heken sünd meist wat lüttjer, as de Seken, un to erkennen an de Le’e vun de Vörtarsen, de wat breeder sünd. Bi allerhand Aarden sünd de Deekflunken an’e Naht tohopenwussen. Bi jem fehlt dat tweede Flunkenpaar faken ganz. Butendem kann dat angahn, datt de Fleegmuskeln ganz oder to’n Deel torüchbillt wurrn sünd. De Mundwarktüge sünd normalerwiese man dannig. Je nadem, wat se freten doot, könnt de ganz verscheden utfallen. Ok de Budden vun de Groten Loopkävers könnt ganz verscheden utsehn.

Wo se vörkamen doot[ännern | Bornkood ännern]

De Echten Loopkävers kaamt vör in de Gemarken vun de Paläarktis un de Nearktis. Dor sünd se up’n Grund in ganz verscheden Umto antodrepen. Allerhand Aarden leevt as Endemiten oder in en bannig speziell Umto. Man annere sünd meist allerwegens to finnen.

Wie se leven doot[ännern | Bornkood ännern]

Goldloopkäver (Carabus auratus) mit Büte

De meisten Aarden mank de Groten Loopkävers sünd in’e Nacht togange. All Aarden leevt as Rövers un jaagt Insekten, de up’n Grund leven doot, man ok annere Liddfööt un dorto noch Sniggen un Mettjen. En paar Aarden sünd over Dag togange un jaagt ok over Dag. All sünd se anpasst an dat Leven up’n Grund. En groten Deel, sunnerlich vun de gröttern Aarden, kann nich mehr flegen, vunwegen, datt de Achterflunken un de Fleegmuskeln torüchbillt, un vunwegen, datt de Deekflunken tohopenwussen sünd. Grote Loopkävers könnt sik gegen Feende verdeffendeern, sunnerlich gegen Vagels un Söögdeerter, de Insekten freten doot, un geeft dor Sekrete to’n Verdauen ut Mund un Achtergatt bi af.

Aarden[ännern | Bornkood ännern]

Bi 850 Aarden sünd up de ganze Welt bekannt, man jummerlos weert noch ne’e Aarden beschreven. In düsse Listen steiht en Utwahl vun Aarden ut Europa:

Literatur[ännern | Bornkood ännern]

  • K.W. Harde und F. Severa: Der Kosmos Käferführer. Franckh-Kosmos Verlag, Stuttgart 2000, ISBN 3-440-06959-1.
  • Ekkehard Wachmann, Ralph Platen, Dieter Barndt: Laufkäfer – Beobachtung, Lebensweise. Naturbuch Verlag, Augsborg 1995, ISBN 3-89440-125-7.
  • C.H. Lindroth: The Carabidae (Coleoptera) of Fennoscandia and Denmark. Scandinavian Science Press Ltd., Leiden 1985, ISBN 90-04-07727-8
  • T. Deuve: Illustrated Catalogue of the Genus Carabus of the World. Pensoft Publishers 2004
  • Edmund Reitter: Fauna Germanica - Die Käfer des Deutschen Reiches. Band 1, K. G. Lutz, Stuttgart 1908

Belege[ännern | Bornkood ännern]

  1. Wieldes dat latiensche carabus , so wiet, as dat bekannt is, bloß man "Krabbe" bedüden deit, finnt sik κάραβος bi Aristoteles ok as (en Aart) "Holtkäver" (Wöerböker: Pape 1880, Georges 1913).
  2. Jiři Zahradník, Irmgard Jung, Dieter Jung et al.: Käfer Mittel- und Nordwesteuropas, Parey Berlin 1985, ISBN 3-490-27118-1

Weblenken[ännern | Bornkood ännern]

Commons-logo.svg Loopkävers. Mehr Biller, Videos oder Audiodateien to’t Thema gifft dat bi Wikimedia Commons.