Benromach

Vun Wikipedia
Benromach

Brenneree Benromach

Land Schottland
Region Speyside
Tyyp Malt
Status aktiv
Besitter Gordon and MacPhail
Grünnt 1898
Grünner Benromach Distillery Company
Architekt Charles Chree Doig
Waterborn Chapelton Borns
Washstill(s) 1 × 7.500 l
Spiritstill(s) 1 × 5.000 l
Produkschoonsvolumen 500.000 l
Websteed www.benromach.com

Benromach is en Whisky-Brenneree in Forres, Morayshire, Schottland. Dat Molteree-Huus is in de schottischen Denkmollisten in de Kategorie B inordent[1].

Historie[ännern | Bornkood ännern]

De Brenneree is vun de Bröder Duncan un John MacCallum vun de Brenneree Glen Nevis in Campbeltown un F. W. Brickmann grünnt worrn. Dorto weer 1898 de Benromach Distillery Company in’t Leven ropen. Mit den Bo hebbt se den Architekt Charles Doig beopdraagt, de ok al annere Brennereen plaant un boet hett. De Arbeiten hebbt noch dat glieke Johr anfungen. De Whiskyprodukschoon füng in’n Mai 1990 an, man al 1907 weer de Brenneree stillleggt, vunwegen dat Brickmann in Geldnoot kamen weer. Ünner den Naam Forres Distillery hebbt de MacCallum-Bröder versöcht, alleen över de Runnen to kamen, man 1910 hebbt se wedder opgeven un de Brenneree wedder stillleggt. 1911 hebbt se ehr an Harvey McNair & Co verköfft, de de Destille vun 1912 bit 1914 bedreven un se na den Eersten Weltkrieg an John Joseph Calder wieterverköfft hebbt. De hett se foorts wietergeven an de Benromach Distillery Ltd, de 1919 grünnt weer un de Destille bit 1925 bedreven hett.

Wedder weer de Produkschoon instellt, ditmol bit 1937, as de Brenneree vun Joseph Hobbes köfft weer, de se al een Johr later an Train & McIntyre wieterverköfft hett. Train & McIntyre weer 1952 denn vun de Distillers Company Limited (DCL) övernahmen, de de Brenneree an dat Dochterünnernehmen Scottish Malt Distillers Ltd (SMD) övergeven hett. 1966 weer de Destille renoveert, 1968 weern de Moltbodden in en Lagerhuus ümboet un 1974 weern vun de SMD twee ne’e Brennblasen inboet. An’n 24. März 1983 is de Brenneree denn noch mol wedder stilllegt worrn. As de DCL vun de United Distillers (vundaag: Diageo) övernahmen worrn is, weern ünner annern de Brennblasen afmonteert. De utrüümte Brenneree mitsams de Lagerbestännen is 1993 denn vun Gordon and MacPhail opköfft worrn, de de Destille renoveert un mit twee ne’e Brennblasen utrüst hebbt. An’n 15. Oktober 1998 weer de Destille offiziell dör Prinz Charles nee apenmaakt.

Produkschoon[ännern | Bornkood ännern]

Whisky ut de Brenneree Benromach

De Destille Benromach höört to dat schottische Whiskyrebeet Speyside. Dat Water för de Produkschoon kummt ut de Chapelton Borns. In de Brenneree gifft dat en Meeschfatt (mash tun) ut Eddelstahl vun ruchweg 1,5 t un veer Gäärfatten (wash backs) ut Lärkenholt tpo 11.000 l. Brennt warrt in Brennblasen, de mit Damp hitt maakt waart. Dat gifft een wash still vun 7.500 l un een spirit still vun 5.000 l.

Ünner de Produkten vun Benromach is ok en Whisky, de ut Gasten ut ökoloogschen Anbo wunnen warrt (Benromach Organic).

Kiek ok[ännern | Bornkood ännern]

Literatur[ännern | Bornkood ännern]

  • Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
  • Walter Schobert: Das Whiskylexikon. Fischer Taschenbuch Verlag, Frankfort an’n Main, 2003, ISBN 978-3-596-15868-3.

Borns[ännern | Bornkood ännern]

  1. Indrag in de schottischen Denkmollisten

Weblenken[ännern | Bornkood ännern]

Benromach. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:57° 37′ N, 3° 37′ W