Arteria carotis interna

Vun Wikipedia
Halsarterien: De dicke Ader, de na baven löpt, is de A. carotis interna

De Arteria carotis interna oder Binnere Halsslagader tellt to de Bloodfatten, de den Bregen mit Blood versorgt. Över de Arteria ophthalmica versorgt se ok dat Oog.

Verloop[ännern | Bornkood ännern]

De Arteria carotis interna kummt an de „Karotisgavel“ tostannen, woneem sik de Arteria carotis communis optwiegt. De annere Ast is de tomeist lüttere Arteria carotis externa, de de buteren Andelen an’n Kopp un to’n Deel ok de Halsorganen versorgen deit. Twüschen de beiden bestaht vele Verbinnen (Anastomosen).

An de Steed, woneem de A. carotis interna afgeiht, den Sinus caroticus, leegt Druckrezepters, de ok as Presso- oder Barorezepters betekent warrt, un op den Blooddruck in’t arteriell System oppassen doot. De Informatschonen vun de Rezepters warrt an’n Bregen wietergeven. Dat is gliektietig ok dat Rezepterrebeet för den Karotissinusreflex. Butendem finnt sik an’n Anfang vun de A. carotis interna Chemorezepters in’n so nöömten Glomus caroticum, de den Andeel vun Kohlenstoffdioxid, Suerstoff un den pH-Weert in’t Blood faststellt.

In ehrn Afsnitt to Anfang liggt de A. carotis interna normalerwies achter (dorsal) de A. carotis externa. Se löpt den wieter na medial („op de Mitt to“) un kummt den an de Schädelbasis an. Se geiht denn dör den Canalis caroticus un maakt dorbi en Bagen. Glieks op de Binnensiet vun de Schädelbasis löpt se dör’n Sinus cavernosus. Se maakt noch en Bagen na achtern, den so nöömten Syphon, bevör den de A. ophthalmica na’t Oog hen aftwiegt. Dorna deelt se sik in de vördere (Arteria cerebri anterior) un de middlere (Arteria cerebri media) Bregenarterie. As’n roor Fall, kann ok mol de achtere Bregenarterie (Arteria cerebri posterior) primär ut de A. carotis interna togang kamen. Verbinnen vun de Bloodfatten vun beid Sieten un de Arteria basilaris billt tohopen den Circulus arteriosus cerebri.

De Arteria carotis interna warrt vun en symphatisch Nervengeflecht begleidt, dat vun böveren Grenzstrang herkummt.

Anatoomsch Vergliek[ännern | Bornkood ännern]

Bi enige Söögdeerten (Wedderkauers, Swien) billt sik de buten vun de Schädelhöhl liggen Afsnitt vun de Arteria carotis interna na de Geboort wedder torüch. Dor warrt denn de gröttste Deel vun’t Bloodversogren na’n Bregen vun de Arteria carotis externa mit övernahmen.

Pathologie[ännern | Bornkood ännern]

Sünners dat Anfangsstück vun de Arteria carotis interna is en Steed, de sünners geern arteriosklerotisch Plaques ansetten deit. De künnt dat Bloodfatt enger maken oder sogor afsluten. Wat ok passeren kann is en Embolie, de denn en Bregeninfarkt utlöst. De Dissekschoon is dat Billn vun en Reet, de ok wedder to en Fattversluten föhren kann. Dat is tomeist en Naklapp vun en traumatisch Sehr. In’n intrakraniellen Verloop, d. h. binnen den Schädel, kamt mitünner lütte Utsacken (Aneurysmen) tostannen, de in’n Fall vun’t Rieten to Subarachnoidalblöden föhren künnt.

Borns[ännern | Bornkood ännern]

  • T.H. Schiebler (Hrsg.): Anatomie. Springer, Heidelbarg 2005. ISBN 3-540-21966-8.
  • U. Gille: Herz-Kreislauf- und Abwehrsystem, Angiologia. In: Salomon, F.-V. u. a. (Rgv.): Anatomie für die Tiermedizin. Enke-Verlag, Stuttgart 2004, S. 404-463. ISBN 3-8304-1007-7