Anslag up den Wiehnachtsmarkt in Berlin 2016

Vun Wikipedia
Hier is de Anslag in Berlin utöövt wurrn (Den Sadelsleper sien Fohrweg in intekent

Bi den Anslag up den Wiehnachtsmarkt in Berlin sünd 12 Minschen to Dode kamen. An’n 19. Dezember 2016 gegen Klock 20 stüer en Mann, de wohrschienlich en islamistischen Terroristen weer, en Sadelsleper in de Lüde rin, de up den Wiehnachtsmarkt bi de Kaiser-Willem-Gedächtniskarken an’n Breitscheidplatz in Berlin- Charlottenborg spazeern gungen. Dör den LKW sünd ölben Besökers vun den Wiehnachtsmarkt umkamen un 56 annere Lüde hefft dor bannig wat bi afkregen. De Fohrer vun den LKW, en Mann ut Polen, is wohrschienlich vun den Ansläger dootschaten wurrn.[1][2][3] Veertein vun de Verwunnten weern an’n 22. Dezember noch in Levensgefohr.[4] De Mann, de den Anslag utöövt hett, konn toeerst utkniepen. De Terrormiliz „Islaamschen Staat“ (IS) ehre Propagandaagentur Amaq hett an’n 20. Dezember rutgahn laten, de Ansläger harr dat as en „Suldaten vun den Islaamschen Staat“ daan.[5] Vun den Namiddag vun’n 21. Dezember af an hett de Generalbundsanwaltschop na den 24 Johre olen Anis Amri ut Tunesien söken laten. He stunn unner Verdacht, he harr den Anslag utföhrt.[6] Amri is toeerst na Frankriek, un vun dor na Italien utbüxt. Up siene Flucht is he an’n 23. Dezember in Sesto San Giovanni bi en Routinekuntroll vun de Polizei dootschaten wurrn.[7][8] De Anslag up den Wiehnachtsmarkt in Berlin seeg liek so ut, as de Anslag in Nizza an’n 14. Juli 2016. Bi beide Veranstaltens stüer en Terrorist en LKW mit Afsicht in de Lüde rin, de sik bi de Veranstaltung upholen döen.[9]

Belege[ännern | Bornkood ännern]

  1. [1] „Italienerin und Israelin sind unter den Toten des Anschlags“, rbb-online.de, 2016-12-22
  2. [2] „IS reklamiert Anschlag für sich“ Spiegel Online 2016-12-22
  3. [3] „Lkw rast in Weihnachtsmarkt – Polizei geht von Vorsatz aus“, Spiegel Online, 2016-12-20
  4. [4] „De Maizière bestätigt: Spuren von Anis Amri am Anschlags-Lastwagen gefunden“, FAZ.net, 2016-12-22
  5. [5] „IS reklamiert Attacke auf Weihnachtsmarkt für sich“ , Frankfurter Allgemeine Zeitung, 2016-12-20
  6. Öffentlichkeitsfahndung, generalbundesanwalt.de
  7. Julius Müller-Meiningen: Italien feiert die Helden von Mailand. In: RP.online, 23. Dezember 2016.
  8. Presseverklaren vun dat Italieensche Binnenministerium
  9. [6] „Anschlag am Berliner Breitscheidplatz: Wie in Nizza“, vun: Yassin Musharbash, zeit.de, 2016-12-20