Anna Carin Zidek

Vun Wikipedia
Anna Carin Helena Cecilia Zidek

Anna Carin Zidek (* 1. April 1973 in Sveg als Anna Carin Helena Cecilia Olofsson) is en ehmalge sweedsch Biathletin.

Loopbahn[ännern | Bornkood ännern]

Anna Carin Zidek keem 2003 to’n Biathlon, nahdem se tovör as Langlöperin aktiv weer un to’n Bispeel mit de sweedsch Langloopstaffel bi de Junioren-Weltmeesterschapen 1993 Viezweltmeesterin wurrn weer. De ok ünner hör Ökelnaam „Aco“ (vun hör Gebortsnaam „Olofsson“ afleit) bekannt Sportlerin kunn sück gau in de Weltspitze fastsetten. So wunn se bi de Biathlon-Weltmeesterschapen 2005 in Hochfilzen Sülver in’n Massenstart achter Gro Marit Istad-Kristiansen un vör Olga Pyljowa. Bi den Weltcup vun Antholz keem se tovör mit en tweeten Platz in dat Eenzelrennen eerstmals up dat Podium. In’n Gesamtweltcup keem se insgesamt up den teihnten Platz.

In de Saison 2005/06 wunn se hör eerst dree Weltcup-Rennen: Anfang Dezember 2005 in dat Eenzel vun Hochfilzen as ok een Week later in Osrblie in‘n Sprint un in de Verfolgung. Bi de Olympisch Winterspelen 2006 in Turin wunn se de Sülvermedaille in den 7,5 km-Sprint achter Florence Baverel-Robert , kunn dissen Platz aber in der Verfolgung nich hollen. Bi den eerstmals bi Olympisch Winterspelen utdragen Massenstart-Wettbewarf över 12,5 km wunn se de Goldmedaille vör de dree Dütschen Kati Wilhelm, Uschi Disl un Martina Glagow. Mit dissen Erfolg wurr se to de eerst sweedsch Olympiasiegerin in‘n Biathlon. In den Gesamt-Weltcup keem se in dit Johr up den 2. Platz achter Uschi Disl.

De Saison 2006/07 leep ähnlich goot. In den Gesamt-Weltcup keem se up den darten Platz achter Andrea Henkel un Kati Wilhelm, wunn aber den Sprintweltcup vör Wilhelm un Henkel. Bi de Biathlon-Weltmeesterschapen 2007 in Antholz hett Zidek weer Sülver achter Magdalena Neuner in’n Sprint haalt, denn Bronze in de Verfolgung un sluutend de Goldmedaille mit de sweedsch Mixed-Staffel an de Siet vun Helena Jonsson, Björn Ferry un Carl Johan Bergman.

In de Saison 2007/08 keem se in de eenzelt Rennen nie up dat Podest, reck aber Platz 12 in den Gesamt-Weltcup. Dat leeg ok dormit an, dat se en Kind kreeg un dorum blots bit to de Biathlon-Weltmeesterschapen 2008 loopen is. Dorto noch mit en Gripp gesundheitlich anslahn, wunn se mit de Mixed-Staffel kien Medaille. In Sprint un Verfolgung kreem se nich ünner de best 20.

De Saison 2008/09 sloot se in’n Gesamt-Weltcup as Teihnte af un keem bi de letzte Statschoon noch mal up dat Podest. Bi de Biathlon-Weltmeesterschapen 2009 verpass se in dat Eenzelrennen en Medaille as Veerte man knapp, reck aber mit de sweedsch Mixed-Staffel en Sülvermedaille.

De Olympiasaison 2009/10 broch hör weer en goot Form. In den Gesamt-Weltcup reck se an’t Enn‘ Platz 5, wunn aber den Eenzelweltcup. Bi de Olympisch Winterspelen reck se in’n Sprint blots Platz 19, kunn sück aber in de Verfolgung noch up Platz 4 verbetern. Dorbi hulp hör ok en Tietgootschrift, wiel se to laat in dat Rennen schickt wurrn weer. Tora Berger, de oorsprünglich as Veert in’t Teel kommen weer, keem dordör up den 5. Platz un Anna Bulygina keem up Platz 6. Mit de Fruen-Staffel belegg se bi disse Veranstaltung Platz 5.

In hör letzt Biathlon-Saison keem se in den Gesamtweltcup noch Mal up den 8. Platz un in all Eenzeldisziplinen immer ünner de best 10. Starten dee se glieks mit en Sieg in dat eerste Saison-Rennen, dat Eenzelrennen in Östersund, wo se vör Marie-Laure Brunet un Helena Ekholm in’t Teel kommen dee. Bi de Biathlon-Weltmeesterschapen 2011 in Chanty-Mansijsk keem se mit de sweedsch Fruen-Staffel up den 6. Platz un mit de Mixed-Staffel vun Sweden up den veerten Platz.

Midden Juli 2011 hett Zidek hör Rückträe vun den Leistungssport verkünnd.[1]

Zidek tell to de starksten Löperinnen in‘ Weltcup. Se wurr vun den düütschen Trainer Wolfgang Pichler traineert, anfangs as „Een-Fru“-Team. Later keemen in den sweedschen Kader noch wieder Sportlerinnen as Helena Ekholm, Anna Maria Nilsson un Sofia Domeij.

Persönliches[ännern | Bornkood ännern]

Zidek broch an’n 28. Juni 2008 in Kanada en Söhn to Welt. Vader is Tom Zidek, Cheftechniker vun dat kanaadsch Team, den se twee Maand tovör heiraadt harr.[2] Nah en körten Paus weer se siet November 2008 weer in’n Biathlon-Weltcup dorbi, tonächst ünner den Düppelnaam Olofsson-Zidek un in de Saison 2010/11 blots noch ünner de Naam vun hör Ehemann.

Zidek weer in de Grundschool in de sülvig Klass as de Curling-Olympiasiegerin Anna Le Moine.[3]

Enkeld Nahwiesen[ännern | Bornkood ännern]

  1. Anna Carin Zidek beendet Karriere: „Ich habe keine Motivation mehr“. biathlon-online.de, 18. Juli 2011, afropen an’n 8. Juli 2011.
  2. Anna Carin Olofsson: „Mein Sohn wird Sommersportler…“ biathlon-online.de, 4. Juli 2008, afropen an’n 11. Dezember 2010.
  3. Bästa vänner – och medaljhopp i OS. dn.se, 14. Januar 2006, afropen an’n 11. Dezember 2010 (schwedisch).

Weblinks[ännern | Bornkood ännern]

Commons-logo.svg Anna Carin Zidek. Mehr Biller, Videos oder Audiodateien to’t Thema gifft dat bi Wikimedia Commons.